បាត់ដំបង ៖ គណៈកម្មការចម្រុះមួយក្រុម ត្រូវបានបង្កើតឡើង ដើម្បីចុះពិនិត្យ និងសិក្សាទៅលើផ្ទៃដី នៅក្នុងតំបន់រនាមក្រោម ដែលត្រូវបានមន្ត្រីរាជការ និងអាជ្ញាធរមូលដ្ឋាន ឃុបឃិតគ្នាចុះធ្វើការឈូសឆាយ បង្កើតជាព្រំដីរៀងៗខ្លួនដែលសរុបមានទំហំរាប់ពាន់ហិកតា។
គួរបញ្ជាក់ដែរថា កន្លងមកមានការដាក់គ្រឿងចក្រចុះឈូសឆាយដីព្រៃក្នុងតំបន់៣ស្ថិតនៅចំណុច គុម្ពតូច អណ្តូងថ្កូវ និងអណ្តូងស្នោ ដែលមានទីតាំងនៅខាងកើត ឆៀងខាងជើង អូរតាចាន់ ក្នុងភូមិសាស្ត្រ ភូមិដូនទ្រី និងភូមិអង្គ្រង ក្នុងឃុំជ្រៃ ស្រុកមោងឬស្សី ខេត្តបាត់ដំបង។
បើតាមប្រភពច្បាស់ការមួយបានបង្ហើបថា អស់លោកដែលជាមន្ត្រីរាជការ និងអាជ្ញាធរ ដែលជាប់ពាក់ព័ន្ធក្នុងការទន្ទ្រានដីព្រៃរនាមក្រោម ដោយបានប្រើប្រាស់គ្រឿងចក្រក្នុងការឈូសឆាយ កាយជាប្រឡាយធ្វើព្រំដីនោះ គឺមាន លោក ពេជ្រ ម៉ាឡៃ អតីតអភិបាលស្រុកមោង លោក នូ ស៊ីធឿន ក្រុមប្រឹក្សាស្រុកមោងឬស្សី លោក ប្រាក់ ងួន មេបញ្ជាការរង កងរាជអាវុធហត្ថស្រុក និងលោក ថាន់ ស៊ន ប្អូនបង្កើតរបស់លោកមេឃុំជ្រៃតែម្ដង។
ជុំវិញបញ្ហានេះ លោកអភិបាលស្រុកមោងឬស្សី ទេព ហន បានលើកឡើងតាមរយៈទូរស័ព្ទថា លោកទទួលស្គាល់ថា ពិតជាមានការឈូសឆាយដីព្រៃនៅក្នុងតំបន់ខាងលើមែន ហើយនៅពេលដែលលោកដាក់កម្លាំងឲ្យចុះទៅពិនិត្យ គឺជនសង្ស័យបានដកគ្រឿងចក្រចេញមុនអស់បាត់ទៅហើយ ប៉ុន្តែទោះបីជាយ៉ាងនេះក្តី ក៏លោកនៅតែបន្តឲ្យកម្លាំងតាមឃ្លាំមើលតទៅទៀតដែរ ដើម្បីចង់ដឹងអំពីមុខសញ្ញា ព្រោះលោកបានស្គាល់អត្តសញ្ញាណអ្នកបើកបរគ្រឿងចក្រអស់ហើយ។
កាលពីថ្ងៃទី២១មករា កន្លងទៅថ្មីៗនេះ កម្លាំងចម្រុះ ដែលក្នុងនោះ មានសហគមន៍នេសាទដូនទ្រី ក្រុមប្រឹក្សាឃុំជ្រៃ សង្កាត់រដ្ឋបាលជលផលសង្កែ សង្កាត់រដ្ឋបាលជលផលមោងឬស្សី ផ្នែករដ្ឋបាលជលផលអន្លង់វិល និងអាជ្ញាធរស្រុកមោងឬស្សី បានចុះពិនិត្យជាក់ស្ដែង លើករណីការកាយព្រំដី
ធ្វើជាក្រវាត់ដីព្រៃលិចទឹក ក្នុងកន្លែងនេសាទ សហគមន៍ដូនទ្រី ឃុំជ្រៃ។
ជាក់ស្តែងនៅចំណុច ព្រៃអ្នកតា ក្នុងភូមិអង្គ្រង ឃុំជ្រៃ ជនល្មើសបានកាយប្រឡាយ លើកភ្លឺ ព័ទ្ធជុំវិញយកដីព្រៃលិចទឹក សរុប១៥០ហិកតា(ចតុកោណកែង) ស្ថិតក្នុងតំបន់៣ ជាប់ស្ទឹងដូនទ្រី ដែលជាតំបន់ហាមឃាត់។
ដោយឡែកដីព្រៃលិចទឹកចំនួន២កន្លែងទៀត ដែលគេសង្ស័យថា អាចមាន៣ម្ចាស់ គឺស្ថិតនៅតំបន់ ភ្នំភ្នាង ត្រសេក រាំង ផ្ទោល ប្របួយប្របាច និង ថ្វាង ត្រូវបានជនល្មើសប្រើគ្រឿងចក្រកាយជាប្រឡាយ និងលើកភ្លឺ ដែលមានកម្ពស់០,៦១ម៉ែត្រ ខ្នងលើ១ម៉ែត្រ និង បាតក្រោម១,៥០ម៉ែត្រ ដែលមានបណ្ដោយប្រវែង១.៥០០ម៉ែត្រ ( ត្បូង ជើង ) និង ទទឹង ប្រវែង១.០០០ម៉ែត្រ ( លិច កើត )។
ក្រោយពីការស្រាវជ្រាវរបស់ក្រុមការងារចម្រុះរួចមក បានបង្ហាញថា ម្ចាស់គ្រឿងចក្រគឺមាន ឈ្មោះ ម៉ៅ សល រស់នៅភូមិដូនទ្រី និងឈ្មោះ ថាន់ ស៊ន រស់នៅឃុំជ្រៃ។
ជុំវិញបញ្ហានេះ កម្ពុជាថ្មី បានព្យាយាមទំនាក់ទំនង ទៅកាន់មន្ត្រីរាជការ និងអាជ្ញាធរដែលមានឈ្មោះ លើការទន្ទ្រានដីព្រៃនេះ ប៉ុន្តែគឺមិនអាចទាក់ទងបានទាំងអស់ ទើបតែនៅព្រឹកថ្ងៃទី២៤មករា នេះ ក៏អាចទាក់ទងទៅលោកក្រុមប្រឹក្សាស្រុកបាន គឺលោក នូ ស៊ីធឿន ដែលល្បីថា មានដីធំជាងគេ នៅក្នុងតំបន់រនាមក្រោមនេះ ដោយលោកបានលើកឡើងថា លោកមិនបានដឹងរឿងអ្វីទាំងអស់ ដោយសារតែលោកទើបនឹងត្រឡប់មកពីក្រៅប្រទេស ដូច្នេះសូមរង់ចាំឲ្យលោកធ្វើដំណើរទៅដល់មូលដ្ឋានសិន។
ពាក់ព័ន្ធនឹងការទន្ទ្រានដីព្រៃលិចទឹកនេះ ក៏មាននៅក្នុងភូមិសាស្ត្រស្រុកសង្កែដែរ ដូចជា នៅក្នុងឃុំ អន្លង់វិល ឃុំកំពង់ព្រះ និងឃុំកំពង់ព្រៀង ជាដើម ..។ល.។ ដែលនៅទីនោះ ក៏ល្បីថាមានពាក់ព័ន្ធទៅនឹងមន្ត្រីរាជការដែរ ពិសេសគឺប៉ូលិសតែម្ដង ប៉ុន្តែបញ្ហានេះ គឺកម្ពុជាថ្មី នឹងធ្វើការផ្សាយជាបន្ត ប្រសិនបើ កម្ពុជាថ្មី រកបានឯកសារពាក់ព័ន្ធ៕
Source: Kampuchea Thmey Daily
0 Comments