ការវាយប្រហារ​គ្រាប់បែកដៃ​សម្លាប់​មនុស្ស​២​នាក់​នៅ​វិហារ​ឥស្លាម​ភាគខាងត្បូង​ប្រទេស​ហ្វីលីពីន

អាជ្ញាធរ​បាន​និយាយថា ការវាយប្រហារ​ដោយ​គ្រាប់បែកដៃ​មួយ​ទៅលើ​វិហារ​ឥស្លាម​មួយ​នៅ​ភាគ ខាងត្បូង​ប្រទេស​ហ្វីលីពីន​ បានសម្លាប់​មនុស្ស​ពីរ​នាក់​កាលពី​ព្រឹក​ថ្ងៃ​ពុធ ​ដែល​ហេតុការណ៍​នេះ ​បាន​កើតឡើង​ត្រឹមតែ​ប៉ុន្មាន​ថ្ងៃ​ប៉ុណ្ណោះ ​បន្ទាប់ពី​មានការ​បំផ្ទុះ​គ្រាប់បែក​សម្លាប់​មនុស្ស​នៅ​ព្រះវិហារ​កាតូលិក​និង​ការបោះឆ្នោត​ដែល​គាំទ្រ​ការគ្រប់គ្រង​ដោយ​ខ្លួនឯង​របស់​ពួក​មូស្លីម។

ការផ្ទុះ​នេះ​បាន​វាយប្រហារ​អគារ​ខណៈដែល​ជនរងគ្រោះ​កំពុង​ដេក​លង់លក់​នៅក្នុង​ភាព​ងងឹត​មុនពេល​ថ្ងៃ​រះ​លើ​កោះ Mindanao ដែលជា​ប្រភព​នៃ​ជនជាតិភាគតិច​មូស្លីម​របស់​ហ្វីលីពីន​។​

កន្ទេល​អធិស្ឋាន​ដែល​ប្រឡាក់​ដោយ​ឈាម​និង​កញ្ចក់​បែក​ខ្ចាត់ខ្ចាយ​អាច​ត្រូវបាន​គេ​ឃើញ​លើ​ឥដ្ឋ​នៅ​ខាងក្នុង​ព្រះវិហារ​ខណៈដែល​កងក​ម្លាំ​ង​សន្តិសុខ​កំពុងធ្វើការ​នៅ​កន្លែងកើតហេតុ​។​

ការផ្ទុះ​នេះ​បានកើត​ឡើងខណៈ​ប្រជាជាតិ​កាន់សាសនា​កាតូលិក​ភាគច្រើន​មួយ​នេះ​កំពុងមាន​ការប្រុងប្រយ័ត្ន​ខ្ពស់​បន្ទាប់ពី​ការ​បំផ្ទុះ​គ្រាប់បែក​ក្នុង​ព្រះវិហារ​មួយ​ដែល​បានសម្លាប់​មនុស្ស​ចំនួន​២១​នាក់​កាលពី​ថ្ងៃអាទិត្យ​នៅក្នុង​ការវាយប្រហារ​មួយ​ដែល​អះអាង​ដោយ​ក្រុម​រដ្ឋ​ឥស្លាម​។​

អ្នកនាំពាក្យ​យោធា​ប្រចាំ​តំបន់​លោក​វរសេនីយ៍ឯក Gerry Besana បាន​ប្រាប់ AFP ថា មនុស្ស​ចំនួន​២​នាក់​ត្រូវបាន​សម្លាប់​និង​៤​នាក់​ផ្សេងទៀត​បាន​រងរបួស​នៅក្នុង​ការវាយប្រហារ​ក្នុង​ព្រះវិហារ​ឥស្លាម​នៅ​ទីក្រុង Zamboanga​។​

លោក Besana បាន​ថ្លែងថា “​វា​ពិបាក​ណាស់​ក្នុងការ​សន្និដ្ឋានថា​តើ​នេះ​ជាការ​សងសឹក​ចំពោះ​ការវាយប្រហារ​នៅ​ព្រះវិហារ​មែន​ឬក៏​មិនមែន​។ មានការ​ពន្យល់​ជាច្រើន​”​។​

អាជ្ញាធរ​ក៏​កំពុង​តាម​ប្រមាញ់​អ្នក​វាយប្រហារ​ដែល​ពាក់​ព័ន្ធ​នឹង​ការវាយប្រហារ​កាលពី​ថ្ងៃ​អាទិត្យ​នៅលើ​កោះ Jolo ផងដែរ​ដែល​កងកម្លាំង​សន្តិសុខ​បាន​និយាយ​ពីដំបូង​ថា មិនមែនជា​ការវាយប្រហា​រ​អត្តឃាត​ទេ​។​

ទោះបីជា​យ៉ាងណាក៏ដោយ កាលពី​ថ្ងៃ​អង្គារ លោក​ប្រធានាធិបតី Rodrigo Duterte បាន​ជំទាស់​ចំពោះ​ការលើកឡើង​នេះ​ដោយ​និយាយថា អ្នក​បំផ្ទុះ​គ្រាប់បែក​ម្នាក់​បាន​បំផ្ទុះ​ខ្លួនឯង​នៅ​ខាងក្រៅ​ព្រះវិហារ​លើ​កោះ​ដែលមាន​ជន​មូស្លីម​ដ៏​ច្រើន​លើសលប់​មួយ​នេះ​។​

ការស៊ើបអង្កេត​បាន​ចង្អុល​ទៅ​ក្រុម​មួយ​ដែលមាន​ទំនាក់​ទំនងជា​មួយក្រុម Abu Sayyaf ដែល​បាន​សន្យា​ភក្ដីភាព​ចំពោះ​ក្រុម​រដ្ឋ​ឥស្លាម​៕ AFP



Source: Kampuchea Thmey Daily