សហភាពអឺរ៉ុបបានវាយប្រហារទៅលើសេវាស៊ើបការណ៍សម្ងាត់របស់អ៊ីរ៉ង់ជាមួយនឹងការដាក់ទណ្ឌកម្មកាលពីថ្ងៃអង្គារបន្ទាប់ពីចោទប្រកាន់ថា ទីក្រុងតេរ៉ង់កំពុងស្ថិតនៅពីក្រោយផែនការធ្វើឃាតអ្នកប្រឆាំងរបបនៅលើទឹកដីហូឡង់ ដាណឺម៉ាកនិងបារាំង។
សេចក្តីសម្រេចដោយប្លុក២៨ប្រទេសមួយនេះត្រូវបានប្រកាសខណៈរដ្ឋាភិបាលហូឡង់និយាយថា ខ្លួនជឿជាក់ថា អ៊ីរ៉ង់គឺស្ថិតនៅពីក្រោយឃាតកម្មលើអ្នកប្រឆាំងពីរនាក់ក្នុងឆ្នាំ២០១៥និងឆ្នាំ២០១៧។
នាយករដ្ឋមន្ត្រីដាណឺម៉ាកលោក Lars Lokke Rasmussen បាននិយាយថា “យើងពេញចិត្តយ៉ាងខ្លាំងដែលសហភាពអឺរ៉ុបទើបតែឯកភាពលើទណ្ឌកម្មគោលដៅថ្មីប្រឆាំងនឹងប្រទេសអ៊ីរ៉ង់ដើម្បីជាការឆ្លើយតបទៅនឹងសកម្មភាពអរិភាពព្រមទាំងផែនការដែលកំពុងរៀបចំនិងប្រព្រឹត្តទៅនៅទ្វីបអឺរ៉ុបរួមទាំងក្នុងប្រទេសដាណឺម៉ាកផងដែរ”។
ក្រុមមន្ត្រីបាននិយាយថា ការដាក់ទណ្ឌកម្មនេះរួមមានការបង្កកមូលនិធិនិងទ្រព្យសម្បត្តិហិរញ្ញវត្ថុដទៃទៀតរបស់ក្រសួងចារកម្មនិងបុគ្គលរបស់ប្រទេសអ៊ីរ៉ង់។
ប៉ុន្តែរដ្ឋមន្ត្រីការបរទេសអ៊ីរ៉ង់លោក Mohammad Javad Zarif បានចង្អុលទៅកាន់ប្រជាជាតិអឺរ៉ុបដែលលោកបាននិយាយថា កំពុងផ្តល់ទីជ្រកកោនដល់ភេរវជន។
លោកបាននិយាយនៅក្នុង Twitter ថា “ការចោទប្រកាន់អ៊ីរ៉ង់គឺមិនបានដោះលែងទ្វីបអឺរ៉ុបពីការទទួលខុសត្រូវរបស់ខ្លួនចំពោះការផ្តល់ទីជ្រកកោនដល់ភេរវករឡើយ”។
ប្រទេសដាណឺម៉ាកបានដឹកនាំកិច្ចខិតខំប្រឹងប្រែងសម្រាប់ការដាក់ទណ្ឌកម្មបន្ទាប់ពីបានចោទប្រកាន់ថា ទីក្រុងតេរ៉ង់បានព្យាយាមសម្លាប់អ្នកប្រឆាំងអ៊ីរ៉ង់បីនាក់នៅលើទឹកដីដាណឺម៉ាក។
ការប្រមាញ់ពាក់ព័ន្ធនឹងផែនការប្រឆាំងជនជាតិអ៊ីរ៉ង់បីនាក់ដែលគេសង្ស័យថាជាកម្មសិទ្ធិរបស់ចលនាតស៊ូអារ៉ាប់ដើម្បីរំដោះ Ahvaz (ASMLA) បាននាំឲ្យមានការបិទស្ពានដែលតភ្ជាប់ទៅកាន់ប្រទេសស៊ុយអ៊ែតក៏ដូចជាសាឡាងផងដែរនៅថ្ងៃទី២៨ខែកញ្ញា។
កាលពីឆ្នាំមុន ប្រទេសបារាំងបានដាក់ទណ្ឌកម្មលើភ្នាក់ងារអ៊ីរ៉ង់ពីរនាក់និងអ្នកផ្សេងទៀតមកពីក្រសួងចារកម្មនិងសន្តិសុខអ៊ីរ៉ង់។
សេវាសន្តិសុខបារាំងបានសន្និដ្ឋានថា ប្រមុខប្រតិបត្តិការនៅក្រសួងចារកម្មអ៊ីរ៉ង់បានបញ្ជាឲ្យមានផែនការបំផ្ទុះគ្រាប់បែកក្នុងការជួបជុំមួយរបស់ក្រុមប្រឆាំង Mujahedeen of Iran (MEK) នៅជាយក្រុងប៉ារីសកាលពីខែមិថុនាឆ្នាំមុន។
ទោះបីជាយ៉ាងណាក៏ដោយ ការសន្និដ្ឋាននេះត្រូវបានទីក្រុងតេរ៉ង់បដិសេធយ៉ាងដាច់អហង្ការ៕ AFP
Source: Kampuchea Thmey Daily
0 Comments