ភ្នំពេញ ៖ កម្ពុជា-ចិន បានឯកភាពគ្នាថា នឹងសម្រេចឲ្យបាននូវទំហំពាណិជ្ជកម្មរវាងប្រទេសទាំងពីរ ឲ្យកើនដល់៦.០០០លានដុល្លារអាមេរិកនៅឆ្នាំ២០២០។ នេះបើតាមប្រសាសន៍លោក ឯក សំអុល ទីប្រឹក្សារាជរដ្ឋាភិបាល និងជាប្រធានសមាគមមិត្តភាពកម្ពុជា-ចិនថ្លែង នៅក្នុងពិធីសម្ពោធបើកជាផ្លូវការ សមាគមសហគ្រិនចិនជាំងស៊ូនៅកម្ពុជា កាលពីថ្ងៃទី៥ ខែមករា ឆ្នាំ២០១៩នេះ នៅសណ្ឋាគារសូហ្វីថែលភ្នំពេញ ភូគីត្រា។
ក្នុងពិធីនោះ លោក ឯក សំអុល ក៏បានលើកឡើងថា ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ប្រទេសកម្ពុជាមានសន្តិសុខ សន្តិភាព ឯកភាពទឹកដី និងមានការអភិវឌ្ឍយ៉ាងខ្លាំងក្លា។
លោកបន្តថា ក្នុងភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ចិន បានធ្វើឲ្យទំនាក់ទំនងរវាងប្រទេសទាំងពីរ កាន់តែមានការរីកចម្រើនលើគ្រប់វិស័យពីមួយឆ្នាំទៅមួយឆ្នាំ។ តាមរយៈទំនាក់ទំនងនេះ បានធ្វើឲ្យទំហំពាណិជ្ជកម្មប្រទេសទាំងពីរកើនដល់៥.៥៧៧លានដុល្លារអាមេរិក ក្នុងឆ្នាំ២០១៧ និងគ្រោងឲ្យកើនដល់ទំហំ៦.០០០លានដុល្លារអាមេរិក នៅ២០២០។
លោកប្រធានសមាគមមិត្តភាពកម្ពុជា-ចិនរូបនេះ ក៏បានបង្ហាញឲ្យដឹងដែរថា ជាលទ្ធផលផ្លែផ្កាសំខាន់ៗ ដែលកើតចេញពីកិច្ចសហប្រតិបត្តិការកម្ពុជា-ចិនកន្លងមក ចិន បានផ្តល់ហិរញ្ញប្បទានដល់កម្ពុជាពីឆ្នាំ២០០១ ដល់ឆ្នាំ២០១៨ មានទឹកប្រាក់៥.២៧០លានដុល្លារអាមេរិក ក្នុងនោះហិរញ្ញប្បទានឥតសំណងចំនួន១.២០០លានដុល្លារអាមេរិក។
ក្រៅពីនេះប្រទេសចិនបានជួយ សាងសង់ផ្លូវបានចំនួន២៤ខ្សែ មានប្រវែង២.៧៧៨គ.ម, ជួយសាងសង់ស្ពានធំៗបានចំនួន៨ ប្រវែង៧៧៦៦ម. និងមានផ្លូវជាតិចំនួន៦ទៀត កំពុងសាងសង់មានប្រវែង ៦៤២គ.ម និងស្ពានមួយកន្លែងកំពុងសាងសង់មានប្រវែង១.១៣១គ.ម។ លើផ្នែកថាមពលអគ្គិសនី ចិនបានជួយកសាងវារីអគ្គិសនីបានចំនួន៧កន្លែង មានលទ្ធភាពផលិតថាមពលបាន១.៣២៨មេហ្គាវ៉ាត់។
ដោយឡែក លើផ្នែកវិនិយោគចិននៅកម្ពុជាក្នុងឆ្នាំ២០១៧ បានកើនដល់១.៦៤៤លានដុល្លារអាមេរិក ជាប់ចំណាត់ថ្នាក់លេខ១ ក្នុងចំណោមវិនិយោគទុនបរទេសនៅកម្ពុជា។ រីឯទេសចរណ៍ចិននៅកម្ពុជាឆ្នាំ២០១៧ បានកើនឡើងដល់ជាង១,២លាននាក់ ចំណាត់ថ្នាក់លេខ១ ហើយរំពឹងថា ចំនួនទេសចរណ៍ចិន នឹងកើនឡើងដល់២លាននាក់ នៅឆ្នាំ២០២០៕
Source: Kampuchea Thmey Daily
0 Comments