នៅព្រឹកថ្ងៃទី៩ ខែមករា ឆ្នាំ២០១៩នេះ លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា បានអញ្ជើញទៅធ្វើជាសាក្សី ក្នុងការដំឡើងបង្គំកៅអី សម្រាប់អង្គុយទស្សនាបាល់ទាត់ក្នុងពហុកីឡដ្ឋានមរតកតេជោ។
ពិធីនេះ ក៏មានការចូលរួមពីសំណាក់លោកWang Chun Xian ដែលជាតំណាងក្រសួងពាណិជ្ជកម្មចិនទៀតផង។
សូមបញ្ជាក់ថា បង្គំកៅអីថ្មនេះ មានចំនួន៤.៦២៤ដុំ ជណ្ដើរមាន២.៣៩២កាំ និង បង្កាន់ដៃចំនួន១៩២ ។ បន្ទាប់ពីចាប់បង្គំបេតុងនេះហើយ ទើបបំពាក់កៅអីជ័រ ដែលអាចផ្ទុកមនុស្សបានចំនួន៥៥.០០០នាក់ និងកៅអីបម្រុងចំនួន៥.០០០កៅអីទៀតផង។
កីឡដ្ឋាននេះ មានសមត្ថភាពជម្លៀសមនុស្សដោយប្រើពេលតែ៧នាទីប៉ុណ្ណោះ។ មណ្ឌល ទស្សនាបាល់ទាត់នេះ មាន៥ជាន់ ដោយមានជាន់ផ្ទាល់ដី ជាន់កណ្ដាល និងជាន់ខ្ពស់បំផុត។
រយៈពេល១៦ខែហើយ ដែលពហុកីឡដ្ឋាននេះចាប់ផ្ដើមសាងសង់។ ពហុកីឡដ្ឋាននេះ ប្រើកម្លាំងពលកម្មទាំងវិស្វករ ទាំងអ្នកបច្ចេកទេស និងកម្មករចំនួន៥៨០នាក់ ដែលក្នុងនោះមានកម្មករ និង អ្នកបច្ចេកទេសខ្មែរចំនួន២៤០នាក់។
ពហុកីឡដ្ឋានដែលធ្វើឡើងក្រោមជំនួយឥតសំណងរបស់រដ្ឋាភិបាលចិននេះ មានតម្លៃជាង១៦០លានដុល្លារសហរដ្ឋអាមេរិក។ មកទល់ពេលនេះ កសាងសម្រេចបានជាង៤០ភាគរយហើយ។
បើតាមការគ្រោងទុក ការសាងសង់នឹងបញ្ចប់នៅចុងឆ្នាំ២០២០ ដែលពេលនោះរដ្ឋាភិបាលចិន នឹងប្រគល់ជូនរដ្ឋាភិបាលកម្ពុជាតែម្ដង។
លោក ថោង ខុន បានចាត់ទុកថា តំបន់ពហុកីឡដ្ឋានមរតកតេជោនេះ នឹងក្លាយជាទីក្រុងរណបដ៏ទាក់ទាញបំផុតមួយនាពេលអនាគត។
សូមបញ្ជាក់ថា ពហុកីឡដ្ឋានមរតកតេជោ បានបញ្ចប់ការសាងសង់មជ្ឈមណ្ឌលហែលទឹក និង វិមានសម្រាប់ប្រកួតកីឡាក្នុងសាល បានរួចរាល់អស់ហើយ។ សម្រាប់មណ្ឌលហែលទឹក និង កីឡាក្នុងសាលមួយចំនួនបានបើកការប្រកួតខ្លះៗហើយ៕
Source: Kampuchea Thmey Daily
0 Comments