ការធ្វើចំណាកស្រុកទៅកាន់សហរដ្ឋអាមេរិកដើម្បីគេចចេញពីភាពក្រីក្រនៅឯផ្ទះគឺជាក្តីសុបិនរបស់ពលរដ្ឋជាច្រើននៃសហគមន៍ជនជាតិដើមភាគតិច Mayan ក្នុងតំបន់ Yalambojoch នៃប្រទេសហ្គាតេម៉ាឡា។
វាគឺជាក្តីសុបិនមួយដែលទីបំផុតបានធ្វើឲ្យកុមារ Felipe Gomez អាយុប្រាំបីឆ្នាំត្រូវបាត់បង់ជីវិតបន្ទាប់ពីគាត់បានឆ្លងចូលសហរដ្ឋអាមេរិកជាមួយឪពុករបស់គាត់ឈ្មោះ Agustin ។
ក្មេងប្រុសម្នាក់នេះបានធ្លាក់ខ្លួនឈឺខណៈពេលកំពុងស្ថិតនៅក្រោមការឃុំឃាំងរបស់សហរដ្ឋអាមេរិកនិងបានស្លាប់ក្នុងមន្ទីរពេទ្យមុនថ្ងៃបុណ្យណូអែលដោយសារឆ្លងមេរោគមួយ។
ម្តាយរបស់គាត់ឈ្មោះ Catarina Alonzo អាយុ៣១ឆ្នាំមានភាពសោកសៅសម្រាប់ការបាត់បង់នេះ។ លោកស្រី Alonzo ចងចាំពាក្យសន្យារបស់កូនប្រុសនាងមុនពេលចាកចេញ។
លោកស្រីនិយាយថា “កូនរបស់ខ្ញុំបានប្រាប់ខ្ញុំថា ម៉ាក់! ខ្ញុំនឹងទៅជាមួយប៉ាខ្ញុំ។ ខ្ញុំនឹងទៅទីនោះដើម្បីសិក្សាហើយបន្ទាប់មកខ្ញុំនឹងផ្ញើប្រាក់ឲ្យអ្នក”។
ពីផ្ទះដ៏ទ្រុឌទ្រោមរបស់នាងនៅភូមិភ្នំ Chuj, លោកស្រី Alonzo បាននិយាយថា “គ្មាននរណាម្នាក់ត្រូវស្តីបន្ទោស” ចំពោះការស្លាប់របស់កូនប្រុសនាងទេ។ ប៉ុន្តែពេលនេះអ្វីដែលនាងចង់បាននោះគឺការធ្វើមាតុភូមិនិវត្តន៍សាកសពកូនរបស់នាង។
លោកស្រីបានទទួលស្គាល់ថា លោកស្រីនិងស្វាមីវ័យ៤៧ឆ្នាំបានព្រមព្រៀងគ្នាឲ្យកូនប្រុស Felipe ធ្វើដំណើរទៅព្រោះជីវិតនៅក្នុងតំបន់ Yalambojoch “ពិបាកខ្លាំងណាស់”។
បងស្រីរបស់ Felipe បាននិយាយថា ឪពុករបស់នាងលឺថា គាត់នឹងមានឱកាសកាន់តែប្រសើរឡើងក្នុងសហរដ្ឋអាមេរិកប្រសិនបើគាត់យកកូនទៅជាមួយគាត់។
តំបន់ Yalambojoch គឺជាកន្លែងដែលអត្ថប្រយោជន៍នៃការធ្វើចំណាកស្រុកទៅកាន់សហរដ្ឋអាមេរិកត្រូវបានគេមើលឃើញយ៉ាងច្បាស់។
អភិបាលតំបន់ឈ្មោះ Lucas Perez អាយុ៤៥ឆ្នាំបាននិយាយថា “សម្រាប់មនុស្សគ្រប់រូបដែលទៅនិងរស់នៅសហរដ្ឋអាមេរិក កិច្ចការដំបូងដែលពួកគេត្រូវធ្វើគឺសន្សំលុយរបស់ពួកគេហើយផ្ញើវាដើម្បីចាប់ផ្តើមសាងសង់ផ្ទះនិងជួយគ្រួសារ។
លោកមានការសោកស្តាយចំពោះការពិតដែលថា ប្រជាជនក្នុងតំបន់មានអារម្មណ៍ថាពួកគេចាំបាច់ត្រូវតែផ្លាស់ប្តូរទីលំនៅដោយសារតែខ្វះខាតការងារខណៈដែលកសិកររកប្រាក់ចំណូលបានត្រឹមតែ៤.៥០ទៅ៦.៥០ដុល្លារប៉ុណ្ណោះក្នុងមួយថ្ងៃ៕ AFP
Source: Kampuchea Thmey Daily
0 Comments