ខ្សែប្រយុទ្ធ រ៉ឹម ប៊ុនហៀង ដែលជាប្រធានក្រុមប្រចាំក្លិបក្រសួងការពារជាតិ និងជាសមាជិកក្នុងក្រុមជម្រើសជាតិកម្ពុជា បានបរាជ័យក្នុងការចរចាប្រាក់ខែជាមួយក្លិបមួយនៅលីគលំដាប់ទី២ប្រទេសឥណ្ឌា ខណៈថ្មីៗនេះរូបគេក៏មានការចាប់អារម្មណ៍ពីពីភ្នាក់ងារទិញដូរកីឡាករនៅលីគម៉ាឡេស៊ី និងប្រទេសថៃ ផងដែរមុនរដូវកាលថ្មីឆ្នាំ២០១៩ មកដល់។
កីឡាកររូបនេះជាអ្នករកគ្រាប់បាល់បញ្ចូលទីឲ្យក្រសួងការពារជាតិ បានច្រើនជាងគេនាពេលកន្លងទៅទាំងក្នុងពានរង្វាន់លីគកំពូលកម្ពុជា និងពានរង្វាន់បាល់ទាត់សម្តេចតេជោ ហ៊ុន សែន។ រ៉ឹម ប៊ុនហៀង បានបញ្ជាក់ថា «ក្រៅពីក្លិបនៅឥណ្ឌា គេទាក់ទងមកខ្ញុំ ក៏មានក្លឹបថៃ និងម៉ាឡេស៊ី ទាក់ទងខ្ញុំដែរ តែគេឲ្យខ្ញុំទៅធ្វើតេស្ដសិន។ អីចឹងក្លិបក្រសួងការពារជាតិ របស់ខ្ញុំអត់អនុញ្ញាតិទេ ព្រោះគេចង់ឲ្យខ្ញុំទៅហ្វឹកហាត់សិន ហើយក្លឹបជាអ្នកចំណាយទៀត ចឹងហើយបានក្លឹបអត់ព្រម ព្រោះអត់ប្រាកដពួកគេត្រូវការ និងយកយើងផង»។
យ៉ាងណាក្តីកីឡាករខាងលើមិនបានបញ្ជាក់ពីឈ្មោះក្លិបដែលព្យាយាមទាក់ទងមករូបគេនោះទេ ប៉ុន្តែរូបគេបានបញ្ជាក់ថា ពេលនេះខ្លួនកំពុងផ្តោតលើការហ្វឹកហាត់ជាមួយក្រុមក្រសួងការពារជាតិតែមួយមុខប៉ុណ្ណោះ។ លក្ខខណ្ឌជាក់ស្តែងណាមួយចំពោះក្លិបបរទេសដែលចង់បានខ្លួនគឺរង់ចាំការចរចារវាងថ្នាក់ដឹកនាំក្លិបជាមួយពួកគេសិនថាអាចឬមិនអាច។
កីឡាករកម្ពស់១,៧៨ម៉ែត្ររូបនេះ ធ្លាប់ជាសមាជិកក្លិបបៀលប្រាយយូណាយធីត រហូតដល់ឆ្នាំ២០១៨ ដល់បច្ចុប្បន្នរូបគេបានផ្ទេរមកចូលរួមជាមួយក្រុមក្រសួងការពារជាតិ។ ម្ចាស់អាវលេខ១២ប្រចាំក្រុមធ្លាប់បានកោះហៅឲ្យចូលក្នុងក្រុមជម្រើសជាតិកម្ពុជា តាំងពីឆ្នាំ២០១២ មកម្ល៉េះគឺជំនាន់លោក Lee Tae Hoon នៅជាគ្រូបង្វឹក។ រូបគេធ្លាប់បានជួយក្រុមឈ្នះជើងឯកពានរង្វាន់សម្តេចតេជោ ហ៊ុន សែន ចំនួន២លើកគឺនៅឆ្នាំ២០១៦ និង ២០១៨ផងដែរ៕
Source: Kampuchea Thmey Daily
0 Comments