យោងតាមការបញ្ជាក់របស់វិបសាយអគ្គស្នងការដ្ឋាននគរបាលជាតិ បានលើកឡើងថាកីឡាករបាល់ទាត់ ជម្រើសជាតិកម្ពុជា ចាន់ វឌ្ឍនាកា បានបើករថយន្តរបស់ខ្លួនបុកនឹងខឿនច្រមុះជ្រូកក្រោមស្ពានអាកាស៧មករា ក្នុងរាជធានីភ្នំពេញ នៅយប់ឆ្លងចូលថ្ងៃទី៨ ខែមករា ឆ្នាំ២០១៩ ថ្មីៗនេះ ខណៈសាមីខ្លួននិងអ្នករួមដំណើរមកមានគ្រោះថ្នាក់អ្វីជាបញ្ហាចោទនោះទេ។
ប្រភពបានបន្តថា កីឡាករ ចាន់ វឌ្ឍនាកា បានរួមជាមួយនារីស្រស់សោភាម្នាក់ បានបើករថយន្តសេរីទំនើប Lexus Nx200t បុកខឿនច្រមុះជ្រូកក្រោមស្ពានអាកាស៧មករា បណ្តាលឲ្យខូច ហើយព្យាយាមបើករថយន្ត គេចជិតដល់មុខពេទ្យលោកសង្ឃ ត្រូវមន្ត្រីនគរបាលចរាចរណ៍ចាប់បាន។ ករណីនេះបានកើតឡើង កាលពីវេលាម៉ោង២រំលងអធ្រាត្រ ឈានចូលថ្ងៃទី៨ ខែមករា ឆ្នាំ២០១៩ ស្ថិតនៅខាងក្រោមស្ពានអាកាស៧ មករា ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
ប្រភពបានស្រង់សម្តីរបស់សមត្ថកិច្ចមូលដ្ឋានថា រថយន្តបង្កម៉ាក Lexus Nx200t ស្លាកលេខ ភ្នំពេញ 2AX-7011 បើកតាមបណ្តោយមហាវិថី សហពន្ធរុស្ស៊ី ខណៈមកដល់ខាងក្រោមស្ពាន ៧មករា ជាចំណុចផ្លូវកោងខ្លាំង បានជ្រុលទៅបុកខឿនច្រមុះជ្រូក បណ្តាលឲ្យរថយន្តរងការខូចខាត ហើយព្យាយាមបើករត់មកជិតដល់មន្ទីរពេទ្យលោកសង្ឃ ទើបសមត្ថកិច្ចឃាត់បាន។ លុះពេលចុះពីរថយន្តទើបដឹងថា ជាកីឡាករដ៏ល្បីរបស់កម្ពុជា មួយរូប ចាន់ វឌ្ឃនាកា រួមជាមួយនារីដ៏ស្រស់ សោភាម្នាក់ទៀតផងដែរ ហើយពួកគាត់ទាំងពីរពុំមានរងរបួសនោះទេ។ ក្រោយកើតហេតុ ពួកគេបានចាកចេញពីកន្លែងកើតហេតុ បន្សល់ទុកតែរថយន្តប៉ុណ្ណោះ។ ចំណែករថយន្តត្រូវបានប្រគល់ឲ្យនគរបាលចរាចរផ្លូវគោក នៃស្នងការដ្ឋាននគរបាល ក្រុងភ្នំពេញ ស្ទូចយកទៅរក្សាទុក ដើម្បីរង់ចាំម្ចាស់ទៅដោះស្រាយ។
សូមបញ្ជាក់ថា កីឡាករ ចាន់ វឌ្ឍនាកា ជាអតីតយុវជនរបស់ក្លិបព្រះខ័នរាជស្វាយរៀង (ព្រះខ័នរាជ) ដែលចាប់អាជីពដំបូងកាលពីឆ្នាំ២០១១ នៅក្នុងឈុតធំក្រុមនេះ ស្របពេលនៅឆ្នាំ២០១២ រូបគេបានផ្ទេរទៅកាន់ក្លិបបឹងកេត រហូតដល់ចុងឆ្នាំ២០១៦ មុនចេញទៅជប៉ុន ដោយចូលរួមជាមួយក្លិប Fujieda MYFC សមាជិកពានរង្វាន់លីគលំដាប់ទី៣ (J3-league) នៅឆ្នាំ២០១៧។ នៅដើមឆ្នាំ២០១៨ ក្រោយចប់កិច្ចសន្យានៅប្រទេសជប៉ុន ចាន់ វឌ្ឍនាកា បានបន្តដំណើរទៅប្រទេសម៉ាឡេស៊ី ជាមួយ Pahang FA តែពាក់កណ្តាលរដូវកាលបានត្រឡប់មកចូលរួមជាមួយក្រុមបឹងកេត របស់កម្ពុជា វិញម្តង។
រូបគេធ្លាប់ឈ្នះពានរង្វាន់ឯកជនជាច្រើនទៀតដូចជាពានរង្វាន់កីឡាករវ័យក្មេងឆ្នើមប្រចាំឆ្នាំ២០១២ ដែលផ្ដល់ដោយគណៈកម្មធិការជាតិអូឡាំពិកកម្ពុជា នៅឆ្នាំ២០១៣ ឈ្នះស្បែកជើងមាស ក្នុងពានរង្វាន់សម្តេចតេជោ ឆ្នាំ២០១៤ ឈ្នះពានកីឡាករល្អប្រចាំពានរង្វាន់លីគកំពូលកម្ពុជា ហើយឆ្នាំ២០១៥ រក្សាពានរង្វាន់កីឡាករឆ្នើមប្រចាំពានរង្វាន់លីគកំពូលកម្ពុជា និងជាម្ចាស់ស្បែកជើងមាសប្រចាំរដូវកាលនិងស្បែកជើងមាសក្នុងពានរង្វាន់ Toyota Mekong Club Championship 2015។ នៅឆ្នាំ២០១៦ រូបគេរក្សាពានរង្វាន់កីឡាករឆ្នើមប្រចាំពានរង្វាន់លីគកំពូលកម្ពុជា និងជាម្ចាស់ស្បែកជើងមាសប្រចាំរដូវកាលបានដដែល៕
Source: Kampuchea Thmey Daily
0 Comments