អ្នកប្រដាល់ជើងខ្លាំង ផល សោភ័ណ្ឌ ក្លិបតាឡីដំរីមានរិទ្ធ នឹងត្រូវជួបជាមួយអ្នកប្រដាល់ជើងខ្លាំងថៃ អេកអាំនួយ ឆ.ឈោកអាំនួយ (Eakaumnuay Chhor. Chhork amnuay) នាយប់ថ្ងៃសុក្រទី០១ ខែកុម្ភៈ ឆ្នាំ២០១៩នេះ នៅលើសង្វៀនគូបូតាបាយ័នស្ទឹងមានជ័យ។ពួកគេទាំងពីរ នឹងប្រកួតគ្នាក្នុងទម្ងន់៦៥ គីឡូក្រាម ។
អេកអាំនួយ ជាអ្នកប្រដាល់ជើងចាស់នៅស្រុកថៃ ។ តាមប្រវត្តិ អេកអាំនួយ ធ្លាប់មកប្រកួតនៅសង្វៀនស្រុកខ្មែរច្រើនលើកហើយកន្លងមក។ ទោះជាយ៉ាងនេះក្តី អ្នកប្រដាល់ថៃរូបនេះ លើកនេះជួបប្រកួតជាមួយផលសោភ័ណ្ឌ ប្រហែលជាមានការលំបាកបន្តិចហើយ ព្រោះសោភ័ណ្ឌមានបច្ចេកទេសល្អ កណ្តាប់ដៃរហ័ស ខ្លាំង ហើយកែង ក៏មុតស្រួចទៀត ។
ប៉ុន្តែយ៉ាងណា អ្នកប្រដាល់ថៃនេះ គឺមិនអាចថា គេខ្សោយជាងសោភ័ណ្ឌនោះទេ ព្រោះ អេកអាំនួយ គេធ្លាប់វាយឈ្នះចាញ់ជាមួយអ្នកប្រដាល់ជើងខ្លាំងខ្មែរយើងច្រើននាក់ហើយ ដូចជា ឈឿន ឆៃដែន ,មឿន សុខហ៊ុច, ផាន់ គ្រាន់ ,មាស ច័ន្ទមាន, សេក គឹមរួន, សុខ សុវណ្ណ, ហ៊ឹម សារ៉ាន់ , ទេស សំខាន់ ,ឡៅ ចន្ទ្រា...ជាដើម ហើយគេមកប្រកួតលើកចុងក្រោយនៅកម្ពុជា (២៦មករា២០១៩) គឺវាយឈ្នះ មាសសុជាតិ ក្លិបឃ្លាំងមឿងកីឡា ដោយពិន្ទុ ។
បើតាមលោកProsith Phramkeson អ្នកដឹកនាំកីឡាករថៃមកប្រកួត បាននិយាយប្រាប់អោយដឹងថា ” អេកអាំនួយនេះ គេមិនធ្លាប់ដែលជួបផលសោភ័ណ្ឌទេ.......ជាដៃគូទី១របស់ផល សោភ័ណ្ឌ...” ។
អេកអាំនួយ គេជាជើងខ្លាំងម្នាក់ដែលមានកណ្តាប់ដៃខ្លាំង ។ អ្នកប្រដាល់ថៃរូបនេះសឹងតែជាខ្លាចាស់ទៅហើយ ដោយមានប្រវត្តិប្រកួតមិនតិចជាង១០០លើកនោះទេ ។ តែផល សោភ័ណ្ឌ គេក៏មានប្រវត្តិប្រកួតច្រើនដែរ គឺចំនួន១៣៦លើក ។ ក្នុងនោះ ផល សោភ័ណ្ឌ វាយឈ្នះ១២០លើកហើយ ដោយចាញ់តែ១៤លើក និងស្មើ០២លើក ហើយធ្លាប់ផ្តួលគូប្រកួតអោយសន្លប់លើរេញចំនួន៤៤លើក។សោភ័ណ្ឌ ខ្លាំងកណ្តាប់ដៃនិងទាត់ ។ តែទោះជាយ៉ាងណា សោភ័ណ្ឌ ក៏ត្រូវប្រយ័ត្នដែរ សម្រាប់ការប្រកួតលើកនេះ។ ដូច្នេះចាំមើល តើនរណាឈ្នះរវាងផល សោភ័ណ្ឌ និង អេកអាំនួយ នេះ ? ។
សូមបញ្ជាក់ថា ផល សោភ័ណ្ឌ គេប្រកួតជាមួយថៃលើកចុងក្រោយនេះ បានវាយចាញ់ជេនវ៉េត(Janwat)ដោយពិន្ទុ នៅសង្វៀនស្ទឹងមានជ័យ កាលពីថ្ងៃទី១១មករា២០១៩ ។
ចំពោះ មាស សារ៉ាក់ អ្នកប្រដាល់ក្លិបអាណាចក្រគុនខ្មែរ ត្រូវគេផ្គូអោយជួបប្រកួតជាមួយអ្នកប្រដាល់ថៃចំណូលថ្មីដែរ គឺស៊ុបពើបាស ថ.ត គុតណាមសៃ(Superbass Thor.Tor Kudnamsai) ដោយប្រកួតក្នុងទម្ងន់៦០គីឡូក្រាម ។
មាស សារ៉ាក់ ជាអ្នកប្រដាល់ជើងខ្លាំងចាស់វស្សាម្នាក់ ក្នុងទម្ងន់៦០គីឡូក្រាម ។គេ ជួបប្រកួតជាមួយថៃចុងក្រោយនេះ គឺវាយស្មើជាមួយអ្នកប្រដាល់ថៃភេត រ៉ាវី (Petch Ravy) កាលពីថ្ងៃទី២៨ខែធ្នូ២០១៨កន្លងទៅនេះ ។
ស៊ុបពើបាស ដែលជាគូរបស់មាសសារ៉ាក់នេះ មិនធ្លាប់មកប្រកួតនៅកម្ពុជានោះឡើយពីមុនមក ។ អ្នកប្រដាល់ថៃនេះ ជាជើងខ្លាំងទម្ងន់៦០គីឡូក្រាមប្រចាំនៅស្រុកថៃ។គេធ្លាប់ឆ្លងកាត់ការប្រកួត៦៦លើក ដោយវាយឈ្នះ៥៣លើក ចាញ់១២លើក និងស្មើ០១លើក។
មាស សារ៉ាក់ គេមានប្រវត្តិប្រកួតចំនួន៨៩លើក ឈ្នះ៦៦លើក និងចាញ់២១លើក និងស្មើ០២លើក ។ សារ៉ាក់ គេមានថ្វីដៃ និងកែង ល្អណាស់ តែយ៉ាងណាការឈ្នះចាញ់រវាងសារ៉ាក់ និង ស៊ុបពើបាស នេះ ពុំមាននរណាហ៊ានទាយមុនថាអ្នកណាឈ្នះនោះទេ ?
អ្នកប្រដាល់កម្ពុជាយើងនេះ គេអន់តែមួយមុខទេ គឺប្រើតែកណ្តាប់ដៃច្រើនជាងការប្រើកែង ជង្គង់ ម្ល៉ោះហើយក្នុងការប្រកួត គេផ្តួលគូប្រកួតរាងតឹងបន្តិច ។ ជាក់ស្តែងដូចជាប្រកួតជាមួយអ្នកប្រដាល់ថៃ ថេត រ៉ាវី កន្លងមក គឺសារ៉ាក់ប្រកួតបីទឹកដំបូង វាយថៃថេត រ៉ាវី អោយអាជ្ញាកណ្តាលរាប់៨ ទាំង៣ទឹក ដោយសារ៉ាក់ប្រើកណ្តាប់ដៃដាល់ចំមុខ ដួលពីរដង និងដួលដោយសារកែងម្តង ។ តែសារ៉ាក់ ក៏ប៊ិះតែនឹងចាញ់ថេត រ៉ាវី វិញដែរនៅចុងទឹកទី៣ និងដើមទឹកទី៤ ដោយសារត្រូវ ថេត រ៉ាវី ទាត់អោយខូចដៃខាងឆ្វេង ប៉ុន្តែក្រោយអាជ្ញាកណ្តាលរាប់៨ពីរដងហើយ មាស សារ៉ាក់ បានបន្តការប្រកួតបានរហូតដល់ចប់ទឹកទី៥ ។
ទោះជាយ៉ាងណា ការប្រកួតលើកនេះ មាស សារ៉ាក់ គេបានត្រៀមខ្លួនយ៉ាងល្អ សម្រាប់ការឡើងប្រកួតជាមួយស៊ុបពើបាសនេះ ។ យ៉ាងណា សារ៉ាក់អាចថា គេមានការប្រុងប្រយ័ត្នខ្ពស់ ព្រោះថាជាលើកទី៣ ដែលគេជួបជាមួយអ្នកប្រដាល់បរទេសនោះ ។ ចាំមើល រវាងមាស សារ៉ាក់ និងអ្នកប្រដាល់ថៃ ស៊ុបពើបាស តើនរណាជាអ្នកឈ្នះនោះ ? ។
ដោយឡែក ក្នុងការប្រកួតរវាងអ្នកប្រដាល់រួមជាតិវិញ ឌុម កែវដប អ្នកប្រដាល់ក្លិបយុវវាលស្បូវ នឹងជួបប្រកួតជាមួយឯម សុធី អ្នកប្រដាល់ក្លិបថ្មគោលពោធិសែនជ័យ ដោយជួបគ្នាក្នុងទម្ងន់៥៧គីឡូក្រាម៕
Source: Kampuchea Thmey Daily
0 Comments