អាជ្ញាធរ​អប្សរា​ បើក​សវនកម្ម​ផ្ទៃក្រៅ​លើក​ទី​១ ​លើ​ប្រព័ន្ធ​គ្រប់គ្រង​បរិស្ថាន ISO14001: 2015

សៀមរាប​ ៖​ នៅ​ស្នាក់ការ​អាជ្ញាធរ​ជាតិ​អប្សរា នា​ព្រឹក​ថ្ងៃទី​២២ ខែ​មករា ឆ្នាំ​២០១៩​នេះ បានរៀបចំ​ពិធី​បើក​សវនកម្ម​ផ្ទៃក្រៅ​លើក​ទី​១ លើ​ប្រព័ន្ធ​គ្រប់គ្រង​បរិស្ថាន ISO14001: 2015 ដោយ​ស្ថាប័ន​ធានា​គុណ​ភាព​ជប៉ុន ហៅ​កាត់​ថា JQA (Japan Quality Assurance)​។ សវនកម្ម​នេះ​ ធ្វើឡើង​រយៈពេល​៣​ថ្ងៃ គឺ​ចាប់ពី​ថ្ងៃទី​២២ ដល់​ថ្ងៃទី​២៤​មករា​។​

​តំណាង​ស្ថាប័ន JQA និង​ជា​សវនករ​ លោក ម៉ា​ម៉ូ​រុ យ៉ាម៉ាដា (Mamoru YAMADA) បានធ្វើ​បទ​បង្ហាញ​ខ្លី​ដើម្បី​ពន្យល់​ពី​នីតិវិធី ក៏ដូចជា​គោលបំណង​ក្នុង​ការចុះ​ធ្វើ​សវនកម្ម​ប្រព័ន្ធ​គ្រប់គ្រង​បរិស្ថាន ISO14001: 2015 លើក​ទី​១​នេះ​។ គោលបំណង​ក្នុង​ការធ្វើ​សវនកម្ម​នេះ គឺ​ដើម្បី​បញ្ជាក់​នូវ​ភាព​អនុ​លោម​ជាប្រចាំ​ថ្ងៃ ​នៃ​ប្រព័ន្ធ​គ្រប់គ្រង​បរិស្ថាន នៅក្នុង​រយៈពេល​ នៃ​សុពលភាព​៣​ឆ្នាំ នៃ​ស្តង់ដារ ISO14001: 2015 បន្ត​ពី​សវនកម្ម​ឆ្នាំទៅ​មិញ​។​

​តាម​ការបង្ហាញ​របស់​ លោក ម៉ា​ម៉ូ​រុ យ៉ាម៉ាដា ចំណុច​យកចិត្តទុកដាក់​នៅពេល​ធ្វើ​សវនកម្ម​ជាថ្មី​នេះ មាន​៥​ចំណុច​។ ទី​១-ប្រសិទ្ធិភាព​ នៃ​ប្រព័ន្ធគ្រប់គ្រង​បរិស្ថាន​ទាំងមូល ឆ្លើយតប​នឹង​សភាព​ការ​ប្រែ​ប្រួល​ផ្ទៃក្រៅ និង​ផ្ទៃក្នុង។ ទី​២-ភាពទាក់ទង​គ្នា​ជាប្រចាំ ព្រមទាំង​លក្ខណៈ​អាចអនុវត្ត​បាន​ នៃ​ប្រព័ន្ធ​គ្រប់គ្រង​បរិស្ថាន​ ឆ្លើយតប​នឹង​វិសាលភាព​ នៃ​វិញ្ញាបនបត្រ។ ទី​៣-ប្រសិទ្ធភាព​ នៃ​ប្រព័ន្ធ​គ្រប់គ្រង​បរិស្ថាន ព្រមជាមួយ​ការចាត់ចែង​បន្ដ​ការ​កែលំអ។ ទី​៤-អំណោយផល​ នៃ​ការអនុវត្ត​ប្រព័ន្ធ​គ្រប់គ្រង​ទៅលើ​ការសម្រេច​គោលនយោបាយ​បរិស្ថាន និង​គោលដៅ​បរិស្ថាន​របស់​ស្ថាប័ន និង​ទី​៥-សវនកម្ម​លើក​នេះ នឹង​ពិនិត្យ​អំពី​ស្ថានភាព​កែលំអ​ជាប្រចាំ​តាមរយៈ​ការ​បង្វិល​កង PDCA (Plan, Do, Check, Act)​។​

​លោក សុខ លក្ខិណា ប្រធាន​អង្គភាព​ប្រព័ន្ធ​គ្រប់គ្រង​បរិស្ថាន​ នៃ​អាជ្ញាធរ​ជាតិ​អប្សរា និង​ជា​តំណាង​លោក​អគ្គនាយក​អាជ្ញាធរ​ជាតិ​អប្សរា បាន​សម្ដែង​អារម្មណ៍​រីករាយ និង​កោតសរសើរ​ចំពោះ​ការ​ចូលរួម​របស់​មន្ត្រី​ជំនាញ​ជា​សេនាធិការ​តាម​នាយកដ្ឋាន​ទាំងអស់ ​នៃ​អាជ្ញាធរ​ជាតិ​អប្សរា ដែល​បាន​ចូលរួម​ជាប្រចាំ​ក្នុង​ការងារ​មួយ​នេះ​។

លោក​លើកឡើងថា ទោះបី​ការធ្វើ​សវនកម្ម​ថ្មី​នេះ​មាន​ភាព​លំបាក​ខ្លះៗ​ក៏ពិតមែន តែ​លោក​សប្បាយ​រីករាយ ពេល​ឃើញ​មានការ​ចូលរួម និង​យកចិត្តទុកដាក់​ពី​មន្ត្រី​ជំនាញ​តាម​នាយកដ្ឋាន ដែល​ធ្វើឲ្យ​ការងារ​នេះ​មាន​លទ្ធផល​ល្អ​នាពេល​កន្លងមក​។​

​តាមរយៈ​ការធ្វើ​សវនកម្ម​លើក​នេះ លោក សុខ លក្ខិណា រំពឹងថា មន្ត្រី​ជំនាញ​តាម​នាយកដ្ឋាន​ទាំង​អស់​នឹង​ខិតខំ​យកចិត្តទុកដាក់ និង​បន្ត​សហការ​ឲ្យ​បាន​ល្អជា​មួយ​សវន​ករ​ ដើម្បី​ជោគជ័យ​ថែមទៀត ក្នុងការ​អនុវត្ត​ប្រព័ន្ធ​គ្រប់គ្រង​បរិស្ថាន​ថ្មី​នេះ​។​

​គួរ​បញ្ជាក់ថា នេះ​ជា​លើក​ទី​៥​ហើយ ដែល​អាជ្ញាធរ​ជាតិ​អប្សរា​ទទួល​វិញ្ញាបនបត្រ​ស្តង់ដារ ISO​។ ក្នុង​នោះ លើក​ទី​១ ឆ្នាំ​២០០៦ វិញ្ញាបនបត្រ ISO 14001 ដោយមាន​ស្ថាប័ន​ជប៉ុន​ទាំង​៤ មាន JQA, Sophia, ISRI, JQAI នៅ​បន្ត​ជួយ​ជា​បច្ចេកទេស​ដើម្បី​ជំរុញ​ការងារ​ប្រព័ន្ធគ្រប់គ្រង​បរិស្ថាន​នេះ​ឲ្យ​ដំណើរការ​ជា​ប្រក្រតី​។ លើក​ទី​២ ឆ្នាំ​២០០៩ លើក​ទី​៣​ឆ្នាំ​២០១២ ទី​៤ ឆ្នាំ​២០១៥ ទទួល​បាន​វិញ្ញាបនបត្រ ISO 14001 តាមរយៈ​ការវាយតម្លៃ និង​ផ្តល់​វិញ្ញាបនបត្រ​នេះ​ដោយ​ស្ថាប័ន JQA និង​ទី​៥ ឆ្នាំ​២០១៨ វិញ្ញា​បន​បត្រ ISO 14001:2015 តាមរយៈ​ការវាយតម្លៃ និង​ផ្តល់​វិញ្ញាបនបត្រ​នេះ​ដោយ​ស្ថាប័ន JQA៕​



Source: Kampuchea Thmey Daily