ប្រធានាធិបតីកូរ៉េខាងត្បូងលោក Moon Jae-in បាននិយាយកាលពីថ្ងៃព្រហស្បតិ៍ថា បណ្តាមេដឹកនាំនយោបាយរបស់ប្រទេសជប៉ុនមិនគួរធ្វើឲ្យប៉ះពាល់ដល់ចំណងទាក់ទងទ្វេភាគីដោយការបង្វែរបញ្ហារបស់ប្រជាជនកូរ៉េខាងត្បូងដែលត្រូវបានបង្ខំឲ្យធ្វើការដោយក្រុមហ៊ុនជប៉ុនអំឡុងសង្គ្រាមលោកលើកទីពីរឲ្យក្លាយទៅជារឿងនយោបាយទេ។
ទំនាក់ទំនងរវាងប្រទេសជិតខាងអាស៊ីខាងកើតទាំងពីរបានធ្លាក់ចុះចាប់តាំងពីតុលាការកំពូលរបស់កូរ៉េខាងត្បូងបានសម្រេចកាលពីខែតុលាថា ក្រុមហ៊ុន Nippon Steel & Sumitomo Metal Corp គួរតែផ្តល់សំណងដល់អតីតកម្មករចំនួន៤នាក់។
កាលពីថ្ងៃពុធ ក្រុងតូក្យូបានទាមទារឲ្យមានការពិគ្រោះយោបល់ផ្នែកការទូតជាមួយទីក្រុងសេអ៊ូលបន្ទាប់ពីតុលាការកូរ៉េខាងត្បូងបានអនុម័តការរឹបអូសទ្រព្យសម្បត្តិក្នុងស្រុកដោយផ្នែករបស់ក្រុមហ៊ុនផលិតដែកជប៉ុនដោយហៅទង្វើនេះថាជា “ការសោកស្តាយជាទីបំផុត”។
លោក Moon បានអំពាវនាវឲ្យរដ្ឋាភិបាលជប៉ុនបង្កើនអាកប្បកិរិយារម្យទមជាងមុនចំពោះបញ្ហាសម័យសង្គ្រាមនិងត្រូវគោរពសេចក្តីសម្រេចរបស់តុលាការដែលក្នុងនោះលោកបាននិយាយថា រដ្ឋបាលរបស់លោកមិនអាចប្រើឥទ្ធិពលណាមួយបានឡើយ។
លោក Moon បានប្រាប់សន្និសីទសារព័ត៌មានមួយថា “យើងបាននិយាយថា យើងគួរតែបន្តការពិភាក្សាផ្នែកការទូតស្តីពីបញ្ហានេះហើយមិនគួរធ្វើឲ្យប៉ះពាល់ដល់ទំនាក់ទំនងរបស់យើងជាមួយប្រទេសជប៉ុនទេ”។ លោកបន្តថា “ខ្ញុំមិនគិតថា វាជាការឈ្លាសវៃទេសម្រាប់អ្នកនយោបាយនិងមេដឹកនាំជប៉ុនដែលបន្តប្រើប្រាស់រឿងនេះឲ្យក្លាយទៅជារឿងនយោបាយ”។
កូរ៉េខាងត្បូងនិងជប៉ុនបានចែករំលែកប្រវត្តិសាស្ត្រដ៏ជូរចត់ដូចជាការធ្វើអាណានិគមនិយមរបស់ប្រទេសជប៉ុនឆ្នាំ១៩១០-៤៥លើឧបទ្វីបកូរ៉េ, ការកៀងគរកម្លាំងពលកម្មទាំងបង្ខំនៅក្រុមហ៊ុនជប៉ុននិងការប្រើប្រាស់ទាសករផ្លូវភេទឲ្យធ្វើការនៅក្នុងផ្ទះបនសម័យសង្គ្រាមរបស់ខ្លួន៕ REUTERS
Source: Kampuchea Thmey Daily
0 Comments