លោកស្រី ពេជ ចន្ទមុន្នី ហ៊ុនម៉ាណែត បានមានប្រសាសន៍ថា ថ្ងៃនេះលោកស្រីពិតជាមានអារម្មណ៍សប្បាយរីករាយ ដែលបានជួបមុខក្មួយៗទាំងចាស់ទាំងថ្មីនៅទីនេះ ហើយសម្តេចតេជោហ៊ុនសែន និងសម្ដេចកិត្តិព្រឹទ្ធបណ្ឌិត មិនដែលភ្លេចក្មួយៗនោះទេ គឺលោកតែងតែយកចិត្តទុកដាក់ជាប់ជានិច្ចតាមរយៈការចាត់ឱ្យបងប្រុសហ៊ុនម៉ាណែត និងរូបលោកស្រីផ្ទាល់ចុះជួបជាមួយក្មួយៗ ព្រមទាំងផ្ដល់នូវគ្រឿងឧបភោគបរិភោគ ថវិកា សម្ភារៈសិក្សា រួមទាំងការពិនិត្យព្យាបាលពីសំណាក់សមាគមគ្រូពេទ្យស្ម័គ្រចិត្តយុវជនសម្តេចតេជោ(TYDA)ជាប់ជាប្រចាំ។
លោកស្រី ពេជ ចន្ទមុន្នី បានលើកឡើងបែបនេះ ខណៈដែលលោកស្រីបានដឹកនាំក្រុមការងារចុះជួបសំណេះសំណាលនិងសួរសុខទុក្ខក្មួយក្មួយគណៈគ្រប់គ្រងបុគ្គលិកលោកគ្រូអ្នកគ្រូក្នុងគម្រោងSunrise Children's Villagesនៃអង្គការ The Australia Cambodia foundationនៅព្រឹកថ្ងៃទី២៩ ខែមករា ឆ្នាំ២០១៩។
លោកស្រីបានថ្លែងអំណរគុណចំពោះគណៈគ្រប់គ្រងបុគ្គលិក លោកគ្រូ អ្នកគ្រូ ដែលបានយកចិត្តទុកដាក់នៅក្នុងការបណ្ដុះបណ្ដាល និងការថែទាំមើលការខុសត្រូវចំពោះក្មួយៗដែលធ្វើឲ្យពួកគេបានទទួលនូវការបញ្ចប់ការសិក្សាដោយជោគជ័យ មានការងារធ្វើ និងមានអនាគតល្អ។
លោកស្រី ពេជចន្ទមុន្នី ហ៊ុនម៉ាណែត ក៏បានផ្តាំផ្ញើឲ្យក្មួយៗទាំងអស់ថែរក្សាសុខភាព ខិតខំសិក្សារៀនសូត្រដើម្បីឱ្យមានអនាគតល្អ ហើយវិលត្រឡប់មកជួយកន្លែងដែលខ្លួនធ្លាប់បានបណ្តុះបណ្តាល និងផ្តល់អនាគត។
លោកស្រី Garaldine នាយិកាអង្គការ The Australia Cambodia foundation (sunrise children's village s) បានលើកឡើងថា អំណោយថ្ងៃនេះពិតជាពិសេសណាស់សម្រាប់ក្មួយៗនៅក្នុងអង្គការនេះដែលសកម្មភាពមនុស្សធម៌នេះបានបង្ហាញពីការយកចិត្តទុកដាក់ចំពោះក្មួយៗ និងបុគ្គលិកនៅទីនេះ។ ពួកគេសូមគោរពថ្លែងអំណរគុណចំពោះសកម្មភាពមនុស្សធម៌ដ៏មានតម្លៃនេះ និងពិតជាមានចិត្តរំភើបសប្បាយរីករាយនៅក្នុងការទទួលវត្តមានរបស់លោកស្រីពេជ ចន្ទមុន្នី ហ៊ុនម៉ាណែត និងគណៈប្រតិភូដែលបានយកចិត្តទុកដាក់គិតគូរចំពោះការសិក្សា និងការស្នាក់នៅរបស់ក្មួយៗនៅទីនេះ។
សូមបញ្ជាក់ថា នេះគឺជាលើកទី៧ ហើយដែលលោកស្រីពេជ ចន្ទមុន្នី ហ៊ុនម៉ាណែត និងក្រុមការងារគ្រូពេទ្យស្ម័គ្រចិត្តសម្តេចតេជោ(TYDA) ដែលបានចុះជួបសំណេះសំណាលសួរសុខទុក្ខ និងផ្តល់ការពិនិត្យព្យាបាលដល់ក្មួយៗព្រមទាំងផ្ដល់នូវគ្រឿងឧបភោគ បរិភោគ សម្ភារៈសិក្សា នៅថ្ងៃនេះក៏ដូចជានាពេលកន្លងមក៕
Source: Kampuchea Thmey Daily
0 Comments