សៀមរាប ៖ បុរសជាមគ្គទេសក៍ទេសចរណ៍ភាសាចិនម្នាក់ ត្រូវបាន បុរសជនជាតិកូរ៉េដែលជាអ្នកបកប្រែបន្តមគ្គទេសក៍ទេសចរណ៍ភាសាកូរ៉េ ទះ២កំផ្លៀង ដោយសារទំនាស់ពាក្យសម្តីនិងគ្នា។
ហេតុការណ៍នេះ កើតឡើងនៅវេលាម៉ោងប្រហែល ១០និង០០នាទីព្រឹកថ្ងៃទី ០៩ ខែ កុម្ភៈ ឆ្នាំ ២០១៩ នៅចំនុចប្រាសាទតាព្រហ្ម ស្ថិតនៅភូមិរហាល សង្កាត់នគរធំ ក្រុងសៀមរាប ខេត្តសៀមរាប។
លោកវរសេនីយ៍ឯក តូច សុគន្ធ នាយការិយាល័យ អនុវត្តន៍នីតិវិធី នៃស្នងការដ្ឋានខេត្តសៀមរាបបានឲ្យដឹងថា មានករណីហិង្សា មួយកើតឡើងដោយជនជាតិកូរ៉េ ម្នាក់បានទះកំភ្លៀងទៅលើមុខរបស់ជនរងគ្រោះមគ្គទេសក៍ទេសចរណ៍ភាសាចិនម្នាក់ចំនួន មួយឬពីរដៃ។
លោកបន្តថា ជនបង្កឈ្មោះ SHIN JUNSEOB ភេទ ប្រុសអាយុ៤១ឆ្នាំ ជនជាតិ កូរ៉េ មុខរបរអ្នកបកប្រែបន្តមគ្គុទេសក៍ទេសចរណ៍ភាសាកូរ៉េ។ ចំណែកជនរងគ្រោះឈ្មោះ ស៊ិន ហ៊ូ ភេទ ប្រុស អាយុ៣៨ឆ្នាំ ជនជាតិខ្មែរ មុខរបរមគ្គទេសក៍ទេសចរណ៍ភាសាចិន។
លោកបន្តថា មូលហេតុ ដែលឈានដល់ការវ៉ៃនេះ គឺដោយសារទំនាស់ពាក្យសំដី។ បច្ចុប្បន្នភាគីទាំងសងខាងបានធ្វើការសម្របសម្រួលបញ្ចប់រឿងដោយព្រមបង់សំណងជំងឺចិត្តចំនួន៤០០០ដុល្លារ។ ទាក់ទិននឹងករណីនេះដែរ គេបានរិះគន់ទៅលើមន្ទីរទេសចរណ៍ ដែលបានចេញអាជ្ញាប័ណ្ណនាំភ្ញៀវទេសចរណ៍និងមកធ្វើជាមគ្គទេសក៍ទេសចរណ៍ ជំនួសខ្មែរយើងបានយ៉ាងស្រួល។ ដែលប្រការទាំងនេះ វាបានធ្វើឲ្យបាត់បង់ការងារដល់មគ្គទេសក៍ជាច្រើនរូប។ ប្រភពបន្តថា ការដែរមន្ទីរជំនាញគេធ្វើបែបនេះ គឺដើម្បីតែប្រយោជន៍តែប៉ុណ្ណោះ។
ទាក់ទិននឹងករណីនេះដែរ មិនអាចសុំការពន្យល់ពីលោកង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានទេនៅរសៀលថ្ងៃទី១១ ខែកុម្ភៈ៕
Source: Kampuchea Thmey Daily
0 Comments