ប្រព័ន្ធផ្សព្វផ្សាយរដ្ឋចិនបានបញ្ចេញវីដេអូមួយដែលខ្លួននិយាយថា វាបង្ហាញថា កវីជនជាតិអ៊ុយហ្គ័រនិងជាតន្ត្រីករឈ្មោះ Abdurehim Heyit នៅរស់រានមានជីវិត បន្ទាប់ពីប្រទេសទួរគីបានលើកឡើងពីសេចក្តីរាយការណ៍នៃការស្លាប់របស់គាត់ក្នុងមន្ទីរឃុំឃាំងដោយទួរគីបានថ្កោលទោសប្រើពាក្យខ្លាំងៗអំពី “ការរំលោភបំពានសិទ្ធិមនុស្ស” នៅតំបន់ស៊ីនជាំង។
នៅក្នុងវីដេអូឃ្លីបរយៈពេល២៦វិនាទីដែលបង្ហោះតាមអ៊ីនធឺណេតដោយសេវាកម្មភាសាទួរគីរបស់វិទ្យុអន្តរជាតិចិនកាលពីល្ងាចថ្ងៃអាទិត្យបានបង្ហាញថា បុរសម្នាក់ដែលពាក់អាវយឺតពណ៌ប្រផេះបានកំណត់ខ្លួនគាត់ថាមានឈ្មោះ Heyit មុនពេលប្រកាសខ្លួនឯងថាមានសុខភាពល្អ។
លោកបាននិយាយថា “ថ្ងៃនេះគឺថ្ងៃទី១០ខែកុម្ភៈឆ្នាំ២០១៩។ ខ្ញុំកំពុងស្ថិតនៅក្នុងដំណើរការស៊ើបអង្កេតពីបទបំពានច្បាប់ជាតិ។ ឥឡូវនេះខ្ញុំមានសុខភាពល្អហើយមិនដែលត្រូវបានគេរំលោភបំពានឡើយ”។
ទោះបីជាយ៉ាងណាក៏ដោយ រ៉យទ័រមិនអាចបញ្ជាក់ពីភាពត្រឹមត្រូវនៃវីដេអូនេះបានទេ។
កាលពីថ្ងៃសៅរ៍ នៅក្នុងសកម្មភាពដ៏កម្រមួយពីប្រទេសមហាអំណាចមូស្លីម, ក្រសួងការបរទេសទួរគីបានអំពាវនាវឲ្យប្រទេសចិនបិទជំរំឃុំឃាំងសម្រាប់អ្នកកាន់សាសនាឥស្លាមរបស់ខ្លួនដោយទទូចថា ជំរំដែលគេនិយាយថាបានឃុំឃាំងជនជាតិអ៊ុយហ្គ័ររាប់លាននាក់មួយនេះគឺបានក្លាយទៅជាភាពអាម៉ាស់យ៉ាងខ្លាំងមួយចំពោះមនុស្សជាតិ។
សេចក្តីថ្លែងការណ៍នោះគឺបានឆ្លើយតបទៅនឹងសំណួរទាក់ទងនឹងរបាយការណ៍នាពេលថ្មីៗនេះដែលថា លោក Heyit បានស្លាប់ខណៈពេលកំពុងឃុំខ្លួននៅក្នុងប្រទេសចិនហើយត្រូវបានកាត់ទោសឲ្យជាប់គុក៨ឆ្នាំសម្រាប់បទចម្រៀងមួយបទក្នុងចំណោមបទចម្រៀងរបស់គាត់។
អ្នកនាំពាក្យក្រសួងលោក Hami Aksoy បាននិយាយកាលពីថ្ងៃអាទិត្យថា “សោកនាដកម្មនេះបានជំរុញបន្ថែមទៀតនូវប្រតិកម្មរបស់សាធារណជនទួរគីចំពោះការរំលោភបំពានសិទ្ធិមនុស្សយ៉ាងធ្ងន់ធ្ងរនៅក្នុងតំបន់ស៊ីនជាំង”។
យ៉ាងណាក្តី ស្ថានទូតចិនប្រចាំនៅទីក្រុងអង់ការ៉ាបាននិយាយថា ការចោទប្រកាន់របស់លោក Aksoy គឺខុសហើយបានជំរុញឲ្យរដ្ឋាភិបាលទួរគីកែប្រែ៕ REUTERS
Source: Kampuchea Thmey Daily
0 Comments