ភ្នំពេញ ៖ ប្រជាពលរដ្ឋកម្ពុជា នឹងមានប្រាក់ចំណូលមធ្យមកម្រិតខ្ពស់ និងបញ្ចប់ភាពក្រីក្រនៅឆ្នាំ២០៣០ខាងមុខនេះ ខណៈដែលប្រទេសកម្ពុជានាពេលបច្ចុប្បន្ន នេះអត្រានៃប្រជាពលរដ្ឋក្រីក្រ បានកាត់បន្ថយយ៉ាងឆាប់រហ័ស ជាមួយនឹងកំណើនសេដ្ឋកិច្ចជាតិ៧ភាគរយរាល់ឆ្នាំ។
នេះបើតាមការបញ្ជាក់ពីលោកស្រី ហង់ លីណា ប្រតិភូរាជរដ្ឋាភិបាលទទួលបន្ទុកអគ្គនាយកវិទ្យាស្ថានជាតិស្ថិតិ នៃក្រសួងផែនការ និងជាអគ្គនាយកជំរឿនប្រជាជនទូទៅ ក្នុងពិធីបើកវគ្គបណ្តុះបណ្តាលមន្ត្រីជំរឿនទូទៅប្រជាជនខណ្ឌទួលគោក នៅសាលាខណ្ឌទួលគោកកាលព្រឹកថ្ងៃទី១១ ខែកុម្ភៈ ឆ្នាំ២០១៩នេះ។
លោកស្រី បានមានប្រសាសន៍លើកឡើងថា ប្រទេសកម្ពុជាយើង បានធ្វើការជំរឿនកាលពីឆ្នាំ១៩៩៨ ហើយការជំរឿនប្រជាពលរដ្ឋកាលពេលនោះពិតជាមានការលំបាក ដោយតំបន់មួយចំនួនយើងចូលមិនដល់និងពិបាកក្នុងការធ្វើទំនាក់ទំនង ពិសេសនៅតំបន់អន្លង់វែងជាដើម ។ប៉ុន្តែទោះបីជាយ៉ាងណាក្តីការងារនេះយើងធ្វើទទួលបានជោគជ័យ។
លោកស្រីបានបញ្ជាក់ថា ការជំរឿនប្រជាពលរដ្ឋពិតជាមានសារៈសំខាន់ណាស់មិនអាចខ្វះបានឡើយ ពោលគឺ បើមិនមានជំរឿនទេ យើងមិនអាចអភិវឌ្ឍន៍ប្រទេសបានឡើយ។ សារៈសំខាន់នៃការជំរឿនប្រជាពលរដ្ឋនេះ គឺ រៀបចំផែនការ គោលនយោបាយអភិវឌ្ឍជាតិ តាមដានការអភិវឌ្ឍផែនការ គោលដៅ២០១៩_២០៣០ ដែលជាគោលដៅក្តៅគគុក។ លោកស្រីបញ្ជាក់ទៀតថា តាមការប្តេជ្ញាចិត្តរបស់ប្រមុខរាជរដ្ឋាភិបាល នឹងធ្វើអោយប្រជាពលរដ្ឋកម្ពុជាមានប្រាក់ចំណូលមធ្យមកម្រិតខ្ពស់និងបញ្ចប់ភាពក្រីក្រនៅឆ្នាំ២០៣០ខាងមុខនេះ។
លោកឯក ឃុនដឿន អភិបាលខណ្ឌទួលគោកបានអោយដឹងថា ខណ្ឌទួលគោកមានចំនួន១០សង្កាត់និងមានប្រជាពលរដ្ឋរស់នៅចំនួន១៣០០២២នាក់ ស្រី៦៦១៩៨នាក់ មានដង់ស៊ីតេប្រជាពលរដ្ឋ១៦,២៩៣នាក់ក្នុងមួយគីឡូម៉ែត្រ។ ខណ្ឌទួលគោកមានមណ្ឌលជំរឿនចំនួន២៩៧មណ្ឌល និងបានជ្រើសរើសមន្ត្រីសរុបចំនួន៣៧៧នាក់ ក្នុងនោះមានមន្ត្រីសម្ភាសន៍មានចំនួន២៩៧នាក់ មន្ត្រីត្រួតពិនិត្យចំនួន៧៥នាក់និងមន្ត្រីត្រៀមបម្រុងចំនួន៥នាក់។ រៀបចំតារាងស្រង់ទីតាំង សណ្ឋាគារ ផ្ទះសំណាក់ វត្តអារាម មន្ទីរពេទ្យ គ្លីនិកធំៗ ផ្សារ។ល។ ពិសេសយើងនឹងធ្វើសម្ភាសន៍ជំរឿនប្រជាពលរដ្ឋគ្មានផ្ទះសំបែងនិងប្រជាពលរដ្ឋឆ្លងកាត់នៅយប់នាថ្ងៃទី២ មីនា ២០១៩ខាងមុខនេះ៕
Source: Kampuchea Thmey Daily
0 Comments