ការប្រកួតពាក់កណ្តាលផ្តាច់ព្រ័ត្រដណ្តើមពានរង្វាន់ជើងឯក TV5 Knock Out Series by k.cement ទម្ងន់៥៧គីឡូក្រាម លើសង្វៀន TV5 ព្រែកកំពឹស កាលពីយប់ថ្ងៃទី០៩កុម្ភៈ ២០១៩ ធន អៀងឡៃ អ្នកប្រដាល់សមាគមកីឡាប្រដាល់ក្រសួងការពារជាតិ និង ម៉ន សាម៉េត អ្នកប្រដាល់ក្លិបកងចក្ររាជសីហ៍មានរិទ្ធ ពួកគេទាំងពីរនឹងត្រូវឡើងទៅជួបគ្នានៅក្នុងវគ្គផ្តាច់ព្រ័ត្រ បន្ទាប់ពីពួកគេបានវាយឈ្នះលើគូប្រកួតនោះក្នុងវគ្គពាក់កណ្តាលផ្តាច់ព្រ័ត្រនោះ ។
នៅក្នុងការប្រកួតពាក់កណ្តាលផ្តាច់ព្រ័ត្រនេះ ធន អៀងឡៃ គេបានយកឈ្នះជើងខ្លាំងបឺត សង្ឃឹម ក្លិបរ៉ាហាប់ស្វាយប៉ាកដែលឈ្នះវគ្គជម្រុះចំនួន៣វគ្គមកហើយនោះ ដោយវាយឲ្យសន្លប់នៅទឹកទី១ ដោយសារថ្វីកណ្តាប់ដៃរបស់គេ ។ ការប្រកួតដែលនរណាក៏មានជំនឿចិត្តថាពួកគេនឹងតស៊ូជាមួយគ្នា៣ទឹកពេញនោះបែរជាសង្ឃឹមត្រូវអៀងឡៃវាយឲ្យសន្លប់មុនស្នូរជួងបញ្ចប់ទឹកទី១ទៅវិញ ។រវាងអ្នកប្រដាល់ទាំង២រូបនេះ សង្ឃឹមស្គាល់សង្វៀនប្រដាល់មុនអៀងឡៃ ហើយក៏មានឈ្មោះបោះសម្លេងមុន ធន អៀងឡៃដែរ ។
ចំពោះអ្នកប្រដាល់ជើងចាស់ ម៉ន សាម៉េត ក្លិបកងចក្ររាជសីហ៍មានរិទ្ធ បានផ្ដួលដៃគូប្រកួតរបស់ខ្លួនគឺគួនប៊ុនហ៊ីមក្លិបពន្លឺសាមគ្គីខេត្តបាត់ដំបង ឲ្យសន្លប់មុនស្នូរជួងបញ្ចប់ទឹកទី៣ ។
គួន ប៊ុនហ៊ីម ធ្លាប់ចូលរួមប្រកួតក្នុងព្រឹត្តិការណ៍នេះ ២-៣លើកហើយ តែគេពុំធ្លាប់បានឡើងដល់វគ្គពាក់កណ្ដាលផ្ដាច់ព្រ័ត្របែបនេះទេ ។ អាចនិយាយបានថា លើកនេះគេត្រៀមខ្លួនបានល្អទើបឆ្លងផុតវគ្គជម្រុះទាំង៣វគ្គ ។
ជាមួយនឹងជ័យជំនះនេះ ម៉ន សាម៉េត និង ធនអៀងឡៃ ត្រៀមខ្លួនជួបគ្នានៅវគ្គផ្ដាច់ព្រ័ត្រដើម្បីដណ្ដើមពានដែលមានរង្វាន់អមចំនួន៤.០០០ដុល្លារ ចំពោះអ្នកចាញ់បាន២.០០០ដុល្លារ ។
ចំណែកបឺត សង្ឃឹម និង គួន ប៊ុនហ៊ីម ត្រៀមប្រកួតគ្នាដណ្ដើមចំណាត់ថ្នាក់លេខ ៣ ដែលមានរង្វាន់អមចំនួន២.០០០ដុល្លារ ។
ដោយឡែក ការប្រកួតជាលក្ខណះមិត្តភាពអន្តរជាតិជាមួយអ្នកប្រដាល់ថៃវិញនោះអ្នកប្រដាល់វ័យចំណាស់កម្ពុជាព្រំ សំណាង ក្លិបកងពលតូចទ័ពឆ័ត្រយោង៩១១បានយកឈ្នះអ្នកប្រដាល់ថៃម៉ានូ វ៉ាន់(Manouv Van)នៅទឹកទី៤ ។
ចំណែក នន់ ជំនិត អ្នកប្រដាល់ជើងចាស់ក្លិបស្វាយរលំឫទ្ធិជ័យ បានវាយឈ្នះទេស សំខាន់ អ្នកប្រដាល់ក្លិបកងពលតូចលេខ៧០ដោយពិន្ទុ បន្ទាន់ពីវាយគ្នាប្រាំទឹកពេញនោះ៕
Source: Kampuchea Thmey Daily
0 Comments