រដ្ឋមន្ត្រីក្រសួងដែនដី ៖ ក្រុមហ៊ុនធំៗរបស់ជប៉ុន កំពុងបោះទុនវិនិយោគស្ទើរគ្រប់វិស័យនៅកម្ពុជា និងមាន៨៦ក្រុមហ៊ុនទៀត កំពុងប្រតិបត្តិការនៅតាមតំបន់សេដ្ឋកិច្ចពិសេសនានា

ភ្នំពេញ ៖ ការលើកឡើងរបស់ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បែបនេះ បានធ្វើឡើងនៅវេទិកាសាធារណៈឯកជន ស្តីពីការអភិវឌ្ឍនគរូបនីយកម្មកម្ពុជា-ជប៉ុន លើកទី១ ដែលវេទិកានេះរៀបចំឡើង កាលពីព្រឹកថ្ងៃទី២៧ ខែកុម្ភៈ ឆ្នាំ២០១៩។

មានប្រសាសន៍ទៅកាន់អ្នកចូលរួមនៅក្នុងវេទិកាសាធារណៈឯកជន ឯកឧត្តមឧបនាយករដ្ឋមន្ត្រី ជា សុផារ៉ា បានលើកឡើងថា រាជរដ្ឋាភិបាលកម្ពុជាតែងចាត់ទុកវិស័យឯកជនជាក្បាលម៉ាស៊ីន នៃកំណើនសេដ្ឋកិច្ច និងមានតួនាទីគន្លឹះក្នុងការជំរុញកំណើន និងការអភិវឌ្ឍន៍សេដ្ឋកិច្ចសង្គម។ ជាងនេះទៀត ក៏បានពង្រីកភាពជាដៃគូរវាងវិស័យសាធារណៈ និងវិស័យឯកជននិងជួយអភិវឌ្ឍទីផ្សារការងារ លើកស្ទួយសហគ្រាសធុនតូច មធ្យម លើកកម្ពស់ប្រសិទ្ធភាពធុរកិច្ច និងពង្រឹងការប្រកួតប្រជែង។ ឯកឧត្តមឧបនាយករដ្ឋមន្ត្រីបន្តថា វេទិកាសាធារណៈឯកជន ស្ដីពីការអភិវឌ្ឍន៍នគរូបនីយកម្មកម្ពុជាជប៉ុននេះ រៀបចំឡើងក្នុងគោលបំណងជំរុញបង្កើតឱកាសធុរកិច្ច និងវិស័យ និងវិនិយោគពីប្រទេសជប៉ុន មកប្រទេសកម្ពុជាលើការអភិវឌ្ឍន៍នគរូបនីយកម្ម រួមមានការអភិវឌ្ឍអចលនទ្រព្យ ការអភិវឌ្ឍសំណង់ លំនៅឋាន ពាណិជ្ជកម្ម សេវាកម្ម ឧស្សាហកម្ម ហេដ្ឋារចនាសម្ព័ន្ធរូបវន្ត និងបរិស្ថានទីក្រុង ដែលកំពុងមានកំណើនក្នុងល្បឿនដ៏លឿន។ វេទិកាលើកទី១ នេះមានក្រុមហ៊ុនជប៉ុនចំនួន៥៨ និងក្រុមហ៊ុនកម្ពុជាចំនួន១២៣ បានចូលរួម។ ជាមួយគ្នានោះ ឯកឧត្តមឧបនាយករដ្ឋមន្ត្រីបានវាយតម្លៃខ្ពស់ចំពោះការផ្ដួចផ្ដើមរៀបចំវេទិកាជាប្រវត្តិសាស្ត្រនេះ និងបានថ្លែងអំណរគុណចំពោះរដ្ឋាភិបាលជប៉ុន ដែលបានសម្រេចជ្រើសរើសកម្ពុជា ជាប្រទេសទី១ ក្នុងចំណោមប្រទេសអាស៊ានសម្រាប់រៀបចំវេទិកាសាធារណៈឯកជនដំបូងគេ ស្ដីពីការអភិវឌ្ឍរូបនីយកម្ម ដែលបង្ហាញនូវការជឿជាក់របស់អ្នកវិនិយោគជប៉ុន លើសក្កដានុពលសេដ្ឋកិច្ចកម្ពុជា ហើយវេទិកានេះ ក៏នឹងកាន់តែពង្រឹងបានថែមទៀតនូវសាមគ្គីភាព និងមិត្តភាពនៃប្រជាជាតិយើងទាំងពីរ។

តាមឯកឧត្តមឧបនាយករដ្ឋមន្ត្រី ជា សុផារ៉ា វេទិកានេះបានប្រព្រឹត្តទៅស្របពេលដែលមាតុភូមិកម្ពុជា កំពុងស្ថិតនៅក្នុងសន្តិភាព ឯកភាពជាតិ និងទឹកដី ស្ថិរភាពនយោបាយ សន្តិសុខ សណ្ដាប់ធ្នាប់សង្គម និងការអភិវឌ្ឍសេដ្ឋកិច្ច ក្រោមការដឹកនាំរបស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខ។

ឯកឧត្តមឧបនាយករដ្ឋមន្ត្រី ជា សុផារ៉ា បានលើកឡើងដែរថា កម្ពុជាទទួលបានចំណាត់ថ្នាក់ជាប្រទេស ដែលមានកំណើនសេដ្ឋកិច្ចខ្ពស់ និងលឿនបំផុតលំដាប់ទី៦ លើពិភពលោក ដោយសម្រេចបានកំណើនខ្ពស់តាមរយៈការរីកចម្រើន នៃវិស័យឧស្សាហកម្ម កម្មន្តសាល សំណង់ កសិកម្ម សេវាកម្ម ទេសចរណ៍ អចលនទ្រព្យ គមនាគមន៍ និងការដឹកជញ្ជូន។ ជាក់ស្ដែងទៅឆ្នាំ២០១៨ កំណើនសេដ្ឋកិច្ចរបស់កម្ពុជាមាន៧.៥ ភាគរយចំណូលមធ្យមសម្រាប់មនុស្សម្នាក់ បានកើនដល់១៥៦៣ដុល្លារ អត្រាភាពក្រីក្រក៏បានធ្លាក់ចុះមកនៅត្រឹមរង្វង់៩ភាគរយ ទេសចរអន្តរជាតិមាន៦,២ លាននាក់ រួមចំណែកប្រមាណ១២,៧ ភាគរយ នៃផលិតផលក្នុងស្រុកសរុប។ រចនាសម្ព័ន្ធសេដ្ឋកិច្ចកម្ពុជា ក៏កំពុងផ្លាស់ប្ដូរពីប្រទេសដែលពឹងផ្អែកលើវិស័យកសិកម្ម គឺជាប្រទេសដែលពឹងផ្អែកជាសំខាន់លើវិស័យឧស្សាហកម្ម និងសេវាកម្ម។ បច្ចុប្បន្នកម្ពុជា មានសហគ្រាស គ្រឹះស្ថានសេដ្ឋកិច្ច ក្នុងប្រព័ន្ធសរុបចំនួន១២០០០ មានកម្មករនិយោជិតសរុប១លាន៥សែននាក់ និងសហគ្រាសគ្រឹះស្ថានសេដ្ឋកិច្ចក្រៅប្រព័ន្ធសរុប៦សែន មានកម្មករជាង២លាន៤ សែននាក់។ ផ្លូវ ស្ពាន បណ្ដាញ អគ្គិសនី ទឹកស្អាត ប្រព័ន្ធធារាសាស្ត្រ មន្ទីរពេទ្យ សាលារៀន រោងចក្រ សហគ្រាស កសិដ្ឋាន មជ្ឈមណ្ឌលពាណិជ្ជកម្ម ទីផ្សារទំនើបអាគារខ្ពស់ ក៏បាននិងកំពុងរីកដុះដាលពាសពេញផ្ទៃប្រទេសនិងបានផ្តល់ការងារជូនប្រជាពលរដ្ឋរាប់លាននាក់។

ការរីកចម្រើនរបស់ប្រទេសកម្ពុជាពិតជាមានការចូលរួមចំណែកដ៏ធំធេងរបស់រដ្ឋាភិបាលប្រជាជននិងវិនិយោគិនជប៉ុន។ ក្នុងនាមរាជរដ្ឋាភិបាល និងប្រជាជនកម្ពុជាឯកឧត្តមឧបនាយករដ្ឋមន្ត្រីជាសុផារ៉ាបានថ្លែងអំណរគុណយ៉ាងជ្រាលជ្រៅចំពោះការគាំទ្ររបស់រដ្ឋាភិបាលនិងប្រជាជនជប៉ុនដែលបានផ្ដល់សមិទ្ធផលជាច្រើនមានដូចជាហេដ្ឋារចនាសម្ព័ន្ធ ផ្លូវ ស្ពាន កំពង់ផែ ការផ្គត់ផ្គង់ទឹកស្អាត ប្រព័ន្ធធារាសាស្ត្រ ប្រព័ន្ធការពារទឹកជំនន់ ការងារកំចាត់មីន និងយុទ្ធភណ្ឌមិនទាន់ផ្ទុះ ការអភិរក្សប្រាសាទបុរាណ និងបេតិកភណ្ឌ ក៏ដូចជាការបណ្តុះបណ្តាលដល់មន្ត្រីរាជការ និងនិស្សិតកម្ពុជា។ នៅឆ្នាំ២០១៨ ទេសចរណ៍ជប៉ុនមាន២១ម៉ឺននាក់ កើនឡើង៣,៥ ភាគរយធៀបនឹងឆ្នាំ២០១៧ ឈរនៅលំដាប់លេខ៧ ក្នុងចំណោមទេសចរអន្តរជាតិ។ ក្រុមហ៊ុនធំៗរបស់ជប៉ុន កំពុងបោះទុនវិនិយោគស្ទើរគ្រប់វិស័យនៅកម្ពុជា ដូចជាវិស័យអេឡិចត្រូនិក វាយនភណ្ឌ កសិកម្ម សំណង់ ផ្សារទំនើប ភោជនីយដ្ឋាន សណ្ឋាគារ និងទេសចរណ៍ជាដើម។ ជាងនេះទៀតក្រុមហ៊ុនជប៉ុនប្រមាណ៨៦ក្រុមហ៊ុន ប្រើប្រាស់កម្មករប្រមាណជាង២ម៉ឺននាក់ទុនវិនិយោគជាង៤២៥លានដុល្លារ កំពុងប្រតិបត្តិការនៅតាមបណ្តាតំបន់សេដ្ឋកិច្ចពិសេសនានា។

ឯកឧត្តមឧបនាយករដ្ឋមន្ត្រី ជា សុផារ៉ា បានលើកឡើងទៀតថា រាជរដ្ឋាភិបាលកម្ពុជាបានដាក់ចេញនូវគោលនយោបាយដ៏ត្រឹមត្រូវក្នុងការអភិវឌ្ឍវិស័យឯកជន និងទាក់ទាញការវិនិយោគ និងបានផ្ដល់ការអនុគ្រោះយ៉ាងច្រើនដល់វិនិយោគិនបរទេស ចំពោះសិទ្ធិលើអចលនទ្រព្យតាមច្បាប់កម្ពុជា។ ក្នុងការលើកកម្ពស់សុវត្ថិភាពនៃការកាន់កាប់ដីធ្លី ក្រសួងរៀបចំដែនដីបានចុះបញ្ជីដីធ្លីបានចំនួន៥,១៥លានប័ណ្ណ ត្រូវជា៧៣,៥ភាករយ នៃក្បាលដី សរុបប្រមាណ ៧លានក្បាលដី។ លើសពីនេះរាជរដ្ឋាភិបាលរៀបចំបានរៀបចំសម្រួលពាណិជ្ជកម្ម និងពង្រឹងការប្រកួតប្រជែងជូនវិនិយោគិន ដើម្បីទទួលផលប្រយោជន៍កាន់តែច្រើន ដែលមានដូចជា ការកែសម្រួលស្ថាប័នមានសមត្ថកិច្ចត្រួតពិនិត្យទំនិញ នាំចេញ នាំចូល ការអនុញ្ញាតឲ្យវិនិយោគិនក្រៅប្រទេសទាំងអស់មានសិទ្ធិវិនិយោគភាគហ៊ុនផ្ទាល់ខ្លួន១០០ភាគរយ ដោយមិនចាំបាច់មានដៃគូក្នុងស្រុក និងការមិនកំណត់ប្រាក់ចំណេញលើការវិនិយោគ ដែលអាចទាញយកចេញទៅក្រៅប្រទេសជាដើម។

ឯកឧត្តមឧបនាយករដ្ឋមន្ត្រី ជា សុផារ៉ា បានលើកឡើងទៀតថា តាមរយៈយុទ្ធសាស្ត្រចតុកោណដំណាក់កាលទី៤ រាជរដ្ឋាភិបាលកម្ពុជាបានផ្ដោតការយកចិត្តទុកដាក់ខ្ពស់លើការពង្រឹងការគ្រប់គ្រងនគរូបនីយកម្ម និងការអភិវឌ្ឍទីក្រុងតាមគោលដៅទីក្រុងឆ្លាតវៃក្នុងគោលដៅអភិវឌ្ឍន៍ប្រកបដោយចីរភាព និងបរិយាប័ន្នតាមរយៈការជំរុញអភិវឌ្ឍន៍ និងពង្រឹងការអនុវត្តគោលនយោបាយច្បាប់ និងបទដ្ឋានបច្ចេកទេសពាក់ព័ន្ធ។ រាជរដ្ឋាភិបាលក៏បានសម្រេចដាក់ឲ្យប្រើប្រាស់នូវប្លង់គោលប្រើប្រាស់ដីរាជធានីភ្នំពេញផែនការរៀបចំដែនដីខេត្តបាត់ដំបង ខេត្តព្រះសីហនុ ប្លងគោលប្រើប្រាស់ដីក្រុង និងទីប្រជុំជនចំនួន៨ រួមមាន ក្រុងបាត់ដំបង ក្រុងតាខ្មៅ ក្រុងកំពត ក្រុងកែប ក្រុងសៀមរាប ទីប្រជុំជន ទីរួមខេត្តត្បូងឃ្មុំ ទីប្រជុំជនស្រុកជ្រៃធំ និងទីប្រជុំជនស្វាយអន្ទរ និងផែនការប្រើប្រាស់ដីក្នុងឃុំ សង្កាត់ចំនួន៨០។ ផែនការប្រើប្រាស់ដីនៅក្នុងឃុំ សង្កាត់ ចំនួន៩០ និងផែនការរូបវន្តផ្សេងទៀតកំពុងជំរុញអនុម័តជាបន្តបន្ទាប់។

ជាផ្លែផ្កានៃនគរូបនីយកម្ម ការអភិវឌ្ឍអចលនទ្រព្យ និងសំណង់បានក្លាយជាសសរស្តម្ភស្នូលដែលជំរុញកំណើនសេដ្ឋកិច្ចកម្ពុជា។ ជាក់ស្ដែងទុនវិនិយោគក្នុងវិស័យសំណង់ក្នុងរយៈពេល ១០ឆ្នាំ គឺពីឆ្នាំ២០១០ ដល់ឆ្នាំ២០១៩ មានប្រមាណ៤៣៨៩៦ លានដុល្លារសហរដ្ឋអាមេរិក។

នៅខែមករា ឆ្នាំ២០១៩ ទុនវិនិយោគក្នុងវិស័យនេះ មានប្រមាណ៨២៩ លានដុល្លារ កើនឡើង១៧៨ ភាគរយ ធៀបនឹងរយៈពេលដូចគ្នានៅឆ្នាំ២០១៨។ ក្រុមហ៊ុនសាងសង់ និងក្រុមហ៊ុនសិក្សាគម្រោងប្លង់ ដែលមានអាជ្ញាប័ណ្ណមានចំនួន២៣០៧ ក្រុមហ៊ុន មានស្ថាបត្យករប្រមាណជាង២៥០០នាក់ និងមានវិស្វករប្រមាណជាង៣ ម៉ឺននាក់។ ក្រសួងរៀបចំដែនដីនគរូបនីយកម្មនិងសំណង់កម្ពុជា បាននិងកំពុងសហការជាមួយក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន រៀបចំច្បាប់ស្ដីពីសំណង់ និងបទដ្ឋានគតិយុត្តផ្សេងៗទៀត។

ជាមួយគ្នានោះ ឯកឧត្តមឧបនាយករដ្ឋមន្ត្រី ជា សុផារ៉ា បានអំពាវនាវនិងលើកទឹកចិត្តដល់ធុរកិច្ច និងក្រុមហ៊ុនជប៉ុន ចាប់ឱកាសដ៏ប្រសើរនេះ ចូលមកវិនិយោគ ឬចាប់ដៃគូវិនិយោគជាមួយក្រុមហ៊ុនកម្ពុជា ហើយក្រសួងរៀបចំដែនដីនគរូបនីយកម្មរង់ចាំផ្ដល់កិច្ចសហការសម្របសម្រួល និងផ្ដល់សេវាគ្រប់យ៉ាងក្រោមសមត្ថកិច្ចរបស់ខ្លួនជូនវិនិយោគិនទាំងអស់ ដោយសេចក្តីរីករាយ ហើយជឿជាក់ថា ប្រធានប្រតិភូ និងក្រុមហ៊ុនទាំងអស់ នឹងបន្តបង្កើនសកម្មភាពជំរុញកិច្ចសហប្រតិបត្តិការលើវិស័យផ្សេងៗទៀតនៅកម្ពុជា។

សូមបញ្ជាក់ថា វេទិកាសាធារណៈឯកជន ស្តីពីការអភិវឌ្ឍនគរូបនីយកម្មកម្ពុជា-ជប៉ុន លើកទី១នេះ រៀបចំឡើងនៅសណ្ឋាគារកាំបូឌីយ៉ាណា ក្រោមអធិបតីភាពឯកឧត្តមឧបនាយករដ្ឋមន្ត្រី ជា សុផារ៉ា និងមានការចូលរួមពីលោក Fumihiko YUKI អនុរដ្ឋមន្ត្រីក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ព្រមទាំងគណៈប្រតិភូ តំណាងស្ថានទូតជប៉ុនប្រចាំប្រទេសកម្ពុជា តំណាងក្រសួង ស្ថាប័នពាក់ព័ន្ធ និងតំណាងក្រុមហ៊ុនវិនិយោគ និងធុរជនជប៉ុន ចំនួន៥៨ក្រុមហ៊ុន ដែលវិនិយោគលើវិស័យអចលនទ្រព្យ សំណង់ ស្ថាបត្យកម្ម លំនៅឋាន ប្រព័ន្ធលូ ធនាគារ ធានារ៉ាប់រង និងគណៈស្ថាបត្យករកម្ពុជា គណៈវិស្វករកម្ពុជា សភាពាណិជ្ជកម្ពុជា សមាគមអ្នកសាងសង់កម្ពុជា សមាគមអ្នកអភិវឌ្ឍន៍លំនៅឋាន និងសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា។

លោក Fumihiko YUKI អនុរដ្ឋមន្ត្រីក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ដែលបានដឹកនាំគណៈប្រតិភូចូលរួមក្នុងវេទិកានោះបានថ្លែងថា បើនិយាយចំនួនប្រជាជន និងGDP វិញ មានបណ្តាប្រទេសមួយចំនួននៅក្នុងអាស៊ាន មាន GDP ខ្ពស់ជាងប្រទេសកម្ពុជា ប៉ុន្តែបើពិនិត្យមើលលើអត្រាកំណើនវិញ បង្ហាញថា ប្រទេសកម្ពុជាមានអត្រាកំណើនខ្ពស់ជាងគេបំផុតនៅក្នុងបណ្តាប្រទេសក្នុងតំបន់អាស៊ាន ហើយលោកគិតថា កម្ពុជាជាប្រទេសមួយមានសក្តានុពលខ្ពស់ ខ្លាំង ក្នុងការអភិវឌ្ឍន៏វិស័យសេដ្ឋកិច្ចរបស់ខ្លួន។ លោកបន្តថា លោកមានបំណងធ្វើការអភិវឌ្ឍវិស័យមួយចំនួននៅកម្ពុជា ដូចជាវិស័យអចលនទ្រព្យជាដើម ដូចដែលបានអភិវឌ្ឍនៅប្រទេសជប៉ុន ហេតុនេះហើយបានជានៅក្នុងការជជែកពិភាក្សាជាមួយលោក ប៉ែន សុផល និងឯកឧត្តមឧបនាយករដ្ឋមន្ត្រី ជា សុផារ៉ា ឈានទៅដល់ការចុះអនុស្សរណៈជាមួយគ្នា។

លោក Fumihiko YUKI អះអាងថា លោកចង់បង្កើតគម្រោងតំបន់គំរូមួយ ដែលយើងជ្រើសរើសយកប្រទេសកម្ពុជា ជាប្រទេសដំបូងក្នុងការបង្កើតគម្រោងនេះ ហើយសង្ឃឹមថា នឹងទទួលបានការគាំទ្រលើគម្រោងនេះ៕