បាត់ដំបង ៖ បុរសវ័យចំណាស់ម្នាក់ ដែលគ្មាននរណាស្គាល់អត្តសញ្ញាណ បានស្លាប់យ៉ាងអាណោចអាធ័មជាទីបំផុត បន្ទាប់ពីត្រូវរថយន្តបុកអូសជាច្រើនម៉ែត្រ រហូតដាច់ខោ ដាច់អាវ គ្មានសល់ ដែលប្រភពមួយចំនួនបានសន្និដ្ឋានថាអាចជាជនអនាថា។
ករណីគ្រោះថ្នាក់ចរាចរណ៍នេះបានកើតឡើង នៅវេលាម៉ោង៤និង២០នាទីទៀបភ្លឺ ព្រឹកថ្ងៃទី២៨ ខែ កុម្ភៈ ឆ្នាំ២០១៩ រវាងរថយន្ត និង ថ្មើរជើង លើកំណាត់ផ្លូវជាតិលេខ៥៧ ស្ថិតក្នុងភូមិកំប៉ូវ ឃុំភ្នំសំពៅ ស្រុកបាណន់ ខេត្តបាត់ដំបង ដោយរថយន្តធ្វើដំណើរក្នុងទិសដៅពីលិចទៅកើត។
បើតាមប្រភពនៅទីនោះបាននិយាយថា ពួកគេបានឮសំឡេងរថយន្តមានល្បឿនលឿន ដោយបានបុកមនុស្ស ឮប្រាវ បន្ទាប់មករថយន្តបានបន្ថែមល្បឿនទៅកាន់ក្រុងបាត់ដំបង បាត់ស្រមោលទាំងយប់តែម្តង។ លុះពេលពួកគេចេញមកមើល ទើបបានប្រទះឃើញមនុស្សប្រុសវ័យប្រមាណជាង ៥០ឆ្នាំ ម្នាក់ បានដេកស្លាប់ក្នុងសភាពអាក្រាត ដោយសារតែកម្លាំងរថយន្ត ដែលបុកហើយអូស ជាច្រើនម៉ែត្រ។
នៅពេលនោះដែរ កម្លាំងប៉ុស្តិ៍នគរបាលរដ្ឋបាល ភ្នំសំពៅ បានចុះត្រួតពិនិត្យ ព្រមទាំងបានបញ្ជូនសពយកទៅតម្កល់នៅក្នុងវត្តភ្នំសំពៅជាបណ្ដោះអាសន្ន ក្រែងមានសាច់ញាតិមករក ប៉ុន្តែរហូតមកទល់នឹងម៉ោង១០ព្រឹក ថ្ងៃដដែល ក៏នៅតែមិនមាននរណាស្គាល់ឡើយ ដែលសមត្ថកិច្ចបាន សន្និដ្ឋានថា អាចជាមនុស្សអនាថា ចេះតែដើររសាត់អណ្ដែតគ្មានទិសដៅ ក៏ត្រូវរថយន្តបុកស្លាប់
តែម្ដង៕
Source: Kampuchea Thmey Daily
0 Comments