ភ្នំពេញ ៖ នារីជាអ្នកចម្រៀងភោជនីយដ្ឋានបឹងមាសម្នាក់ បានមកដាក់ពាក្យបណ្តឹងនៅប៉ុស្តិ៍រដ្ឋបាលជ្រោយចង្វា បន្ទាប់ពីបុរសម្នាក់ អួតខ្លួនថាជាមន្ត្រីយោធាពាក់ផ្កាយ៣ រួមនឹងបក្ខពួកប្រុស/ស្រី៥ ទៅ៦នាក់ ទៀត ជិះរថយន្ត២ ទៅ៣គ្រឿង មកចូលផឹកស៊ីនៅភោជនីយដ្ឋានបឹងមាស បានបបួលនាងទៅដេកជាមួយ តែនាងមិនព្រម ស្រាប់តែលោកផ្កាយ៣រូបនោះទះកំផ្លៀង៣ដៃ រួចរត់គេចខ្លួនបាត់។
ហេតុការណ៍នេះ បង្កការភ្ញាក់ផ្អើលកាលពីវេលាម៉ោង១១និង១០នាទីយប់ ថ្ងៃទី២៧ ខែកុម្ភៈ ឆ្នាំ២០១៩ ចំណុចភោជនីយដ្ឋាន បឹងមាស តាមបណ្ដោយផ្លូវជាតិលេខ៦A ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។
ជនរងគ្រោះមាន ឈ្មោះ យិន ស្រីពៅ អាយុ៣៥ឆ្នាំ មុខរបរអ្នកចម្រៀងប្រចាំភោជនីយដ្ឋាន បឹងមាស ស្នាក់នៅសង្កាត់ព្រែកលៀប ខណ្ឌជ្រោយចង្វា បានរៀបរាប់ប្រាប់អ្នកសារព័ត៌មានថា នាងបានមកច្រៀងនៅភោជនីយដ្ឋានបឹងមាស បានប្រាំមួយខែមកហើយ មិនដែលមានភ្ញៀវណាម្នាក់មើលងាយនាងបែបនេះទេ ទើបតែយប់ថ្ងៃកើតហេតុ ស្រាប់តែមានបុរសម្នាក់អួតខ្លួនថា ជាយោធាពាក់ផ្កាយ៣និងបក្ខពួកប្រុស/ស្រី៥ ទៅ៦នាក់ទៀត បានបើករថយន្ត២ទៅ៣គ្រឿង មកផឹកស៊ី ចំណែកបុរសដែលអួតខ្លួនថាជាមន្ត្រីយោធាពាក់ផ្កាយ៣នោះ បើករថយន្តម៉ាស្តារ ពណ៌ខ្មៅមួយគ្រឿង ពាក់ស្លាកលេខខេមរភូមិន្ទ02-2-1215 បាននាំគ្នាចូលមកផឹកស៊ីយ៉ាងសប្បាយ។ លុះមកដល់ម៉ោងកើតហេតុខាងលើ ស្រាប់តែបុរសដែលបានអួតខ្លួនថា ជាមន្ត្រីយោធានោះ បានហៅអ្នកចម្រៀងចំនួន៤នាក់ រួមនឹងរូបនាងផង ដែលកំពុងច្រៀងនៅលើឆាកឲ្យចុះមករាំកំដរនៅខាងក្រោម ស្រាប់តែកំពុងតែរាំៗជនដៃដល់នោះ បានមកនិយាយជាមួយនាងថា នៅផឹកស៊ីកំដររូបគេទៅ គេនឹងឲ្យលុយធីប២០ដុល្លារ បន្ទាប់មករូបនាង ក៏មិនបានឆ្លើយឆ្លងវែងឆ្ងាយនោះដែរ ស្រាប់តែជនដៃដល់នោះ បានមកនិយាយលួងលោមនាងទៀត ហើយបានបបួលរូបនាងទៅដេកជាមួយ តែនាងឆ្លើយវិញថា នាងខ្ញុំមិនលក់ខ្លួនទេ លក់តែសំឡេងទេ ធ្វើឲ្យជនដៃដល់ផ្ទុះកំហឹង ខឹងសម្បាយ៉ាងខ្លាំង បានស្ទុះមកទះកំផ្លៀងនាងចំនួន៣ដៃ បន្ទាប់មកក៏ប្រញាប់ប្រញាល់បើករថយន្តចេញពីកន្លែងហេតុ តែត្រូវបានរូបនាងលួចថតបានរូបភាពមួយចំនួន។ តែមិនបានស្គាល់ឈ្មោះ និងប្រវត្តិលោកផ្កាយ៣ធូរថ្លៃនោះទេ។
ជនរងគ្រោះ មិនបានស្គាល់ឈ្មោះ ឬអត្តសញ្ញាណរបស់លោកផ្កាយបីខាងលើទេ ប៉ុន្តែស្គាល់តែស្លាកលេខរថយន្តតែប៉ុណ្ណោះ និងភិនភាគរថយន្តប៉ុណ្ណោះ។
ក្រោយកើតហេតុ នារីរងគ្រោះ ត្រូវបានក្រុមអ្នកសារព័ត៌មាននាំមកដាក់ពាក្យបណ្ដឹងនៅប៉ុស្តិ៍នគរបាលសង្កាត់ជ្រោយចង្វា ដើម្បីឲ្យសមត្ថកិច្ចជួយស្វែងរកចាប់ខ្លួនជនដៃដល់ដែលអួតខ្លួនថាជាផ្កាយ៣ យកមកដោះស្រាយគ្នាទៅតាមផ្លូវច្បាប់៕
Source: Kampuchea Thmey Daily
0 Comments