ភ្នំពេញ ៖ លោក គង់ គាំ ប្រធានកិត្តិយសគណបក្សឆន្ទៈខ្មែរ និងជាអតីតមនុស្សជំនិតរបស់លោក សម រង្ស៊ី បានអះអាងថា ការជឿលើមេដឹកនាំជ្រុលនិយម និងហួសហេតុនិយម (សម រង្ស៊ី ) លើអ្វីដែលមិនអាចកើតឡើងបាន គឺជារឿងឆ្កួតលីលាបំផុត ពីព្រោះសកម្មភាពរបស់លោក សម រង្ស៊ី ទាំងការនិយាយ ទាំងការត្រៀម ដើម្បីងើបឡើងផ្តួលរំលំអំណាចរបស់ ហ៊ុន សែន ដែលកំពុងគ្រប់គ្រងប្រទេស គឺជាភាពស្រមើស្រមៃ ដែលមិនអាចកើតមានបានឡើយ។
ប្រធានកិត្តិយសគណបក្សឆន្ទៈខ្មែរ លោក គង់ គាំ លើកឡើងបែបនេះ តាមរយៈបណ្ដាញសង្គម Facebook ផ្លូវការរបស់ខ្លួន កាលពីថ្ងៃទី០៦ ខែកុម្ភៈ ឆ្នាំ២០១៩ ហើយការលើកឡើងនេះ បន្ទាប់ពីលោក សម រង្ស៊ី និយាយនៅក្នុងកិច្ចប្រជុំជាមួយសកម្មជនរបស់ខ្លួននៅក្រៅប្រទេសកាលពីថ្ងៃទី០៣ កុម្ភៈថា លោកវិលត្រឡប់ទៅប្រទេសកម្ពុជាវិញនៅឆ្នាំ ២០១៩នេះ គឺមិនមែនទៅឲ្យសម្តេចតេជោ ហ៊ុន សែន ចាប់ទេ តែរូបលោក រួមជាមួយប្រជារាស្ត្រខ្មែររាប់លាននាក់ នឹងទៅចាប់សម្តេច ហ៊ុន សែន វិញ។
លោក គង់ គាំ បានបញ្ជាក់ថា ការជឿលើ សម រង្ស៊ី មេដឹកនាំជ្រុលសម័យ និងហួសហេតុនិយម អំពីអ្វីដែលមិនអាចកើតឡើងបាន គឺជាភាពលីលាបំផុត ពីព្រោះសម រង្ស៊ី ថា ទៅស្រុកខ្មែរ មិនឲ្យសម្តេច ហ៊ុន សែន ចាប់ទេ គឺប្រជាពលរដ្ឋងើបឡើងជាមួយសម រង្ស៊ី ទៅចាប់សម្តេច ហ៊ុន សែន វិញ។ តាមលោក គង់ គាំ ការចង់ឆាចោលរបបសម្តេច ហ៊ុន សែន ចេញ គឺជាអ្វីដែលមិនអាចកើតមាន ពីព្រោះរបបនេះ ខ្មែរបាត់បង់ដីធ្លី បានដីធ្លីមកវិញ ខ្មែរជំពាក់គេ លែងជំពាក់គេ។ កសិផលបានថ្លៃខ្ពស់ ប្រាក់ខែមន្ត្រីរាជការ ប្រាក់ឈ្នួលកម្មករខ្ពស់ ប៉ុន្តែនយោបាយឆុងៗរបស់សម រង្ស៊ី វានឹងកំពប់អស់ ធ្វើឲ្យច្របូកច្របល់អស់ រលំរលាយ ហើយនេះជាការពិត។
លោក គង់ គាំ លើកឡើងទៀតថា “ភាសា និងអំពើ ត្រៀមធ្វើ (ជាអាទិ៍) របស់សម រង្ស៊ី អំពីការងើបឡើងផ្តួលរំលំអំណាច ដែលកំពុងគ្រប់គ្រងប្រទេស ដើម្បីភាពស្រមើស្រមៃទាំងឡាយ គឺអំពើប្រទូសរ៉ាយ ភាពអន្តរាយតាំងពីដើមទីរហូតទីបញ្ចប់។ គណបក្ស ឆន្ទៈខ្មែរ ដែលស្របច្បាប់ ស្ថិតក្នុងបញ្ជីស្រាប់ (ជាគណបក្សប្រឆាំងថ្មី - រូបសញ្ញាព្រះអាទិត្យថ្មី - ជាជម្រើសថ្មី - ដើម្បីការផ្លាស់ប្តូរថ្មី) ដែលចូលរួម ទាំងការការពារ ការកសាង ទាំងការប្រកួតប្រជែងឲ្យមានការផ្លាស់ប្ដូរតាមក្រឹត្យក្រម (គតិច្បាប់) ដោយសន្តិវិធីតទៅ”។
ទាក់ទងបញ្ហានេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានបញ្ជាក់កាលពីព្រឹកថ្ងៃទី០៧ ខែកុម្ភៈថា ដើម្បីមហិច្ឆតាអំណាច ទណ្ឌិត សម រង្ស៊ី បានរត់ចោលស្រុក និងខិតខំបំផុស ដោយយកនយោបាយខ្មែរក្រហមប៉ុលពត មកដុតកំហឹងប្រជាជន និងកងទ័ពដូចជា ចង់ផ្តួលរំលំរបបសព្វថ្ងៃចោល ដើម្បីឆាចោលបំណុលធនាគារ និងបំណុលផ្សេងៗ, រឹបអូសយកលុយកាក់ និងទ្រព្យសម្បត្តិ ដីធ្លីរបស់អ្នកមានមកចែកអ្នកក្រ, យកប្រាក់កម្ចីពីបរទេសសម្រាប់កសាង និងអភិវឌ្ឍន៍ប្រទេសមកចែកប្រជាជនក្រីក្រ និងរឹបអូសទ្រព្យសម្បត្តិ និងប្រាក់កាសត្រកូលហ៊ុនមកចែកប្រជាជនជាដើម។
តាមលោក សុខ ឥសាន គម្រោងផែនការរបស់ទណ្ឌិតរត់ចោលស្រុកនេះ គឺជានយោបាយ ប៉ុល ពត សុទ្ធសាធ ដែលប្រជាជនកម្ពុជាធ្លាប់បានភ្លក់រសជាតិដ៏ជូរចត់ហួសវិស័យរួចមកហើយ ហើយនេះគ្រាន់តែជានយោបាយចងអាឃាតរបស់ទណ្ឌិត សម រង្ស៊ី តែប៉ុណ្ណោះ៕
Source: Kampuchea Thmey Daily
0 Comments