ភ្នំពេញ ៖ យោងតាមរបាយការណ៍ពីនាយកដ្ឋាន ចរាចរណ៍ និងសណ្ដាប់ធ្នាប់ សាធារណៈ នៃអគ្គស្នងការដ្ឋាននគរបាលជាតិប្រាប់ថា កាលពីថ្ងៃទី៦ ខែកុម្ភៈ ឆ្នាំ២០១៩ មានហេតុការណ៍គ្រោះថ្នាក់ចរាចរណ៍ នៅទូទាំងប្រទេសកើតឡើង ចំនួន៩លើក បណ្តាលឲ្យមនុស្សស្លាប់៦នាក់ ( ស្រី ១នាក់ ) រងរបួសធ្ងន់ ៨នាក់ ( ស្រី២នាក់ ) និងរងរបួសស្រាល ១នាក់ ( ប្រុស ) ក្នុងនោះគ្រោះថ្នាក់ចរាចរណ៍ ដោយមិនបានពាក់មួកសុវត្ថិភាព១៤នាក់ ( យប់៦នាក់ )។
នៅក្នុងករណីគ្រោះថ្នាក់ចរាចរណ៍ទាំង៩លើកនេះ បានបណ្តាលឲ្យមានការខូចខាតយានយន្តសរុប ១៧គ្រឿង ក្នុងនោះមាន ម៉ូតូ ចំនួន១០គ្រឿង រថយន្តធុនតូច ចំនួន៥គ្រឿង រថយន្តធុនធំ ចំនួន២គ្រឿង និងអ្នកថ្មើរជើង ចំនួន១នាក់។
របាយការណ៍ខាងលើប្រាប់បន្តថា មូលហេតុ ដែលបណ្តាលឲ្យកើតមានហេតុការណ៍គ្រោះថ្នាក់ចរាចរណ៍ គឺបណ្តាលមកពី ល្មើសល្បឿន៤លើក ( ស្លាប់៣នាក់ ) , មិនគោរពសិទ្ធិ ១លើក ( ស្លាប់១នាក់ ) , ស្រវឹង១លើក , មិនប្រកាន់ស្តាំ១លើក , ប្រជែងគ្រោះថ្នាក់១លើក ( ស្លាប់១នាក់ ) , និងបត់គ្រោះថ្នាក់ ១លើក ( ស្លាប់១នាក់ )។
គ្រោះថ្នាក់នៅលើដងផ្លូវ រួមមាន ផ្លូវជាតិ ចំនួន៧លើក និងផ្លូវខេត្ត ចំនួន២លើក។ ដោយឡែកយានយន្តដែលបង្កហេតុ រួមមាន ម៉ូតូ ចំនួន៥លើក និងរថយន្តធុនតូច ចំនួន៤លើក។
រាជធានី ខេត្ត ដែលមានគ្រោះថ្នាក់ និងរងគ្រោះថ្នាក់ រួមមាន ខេត្តក្រចេះ២លើក ស្លាប់២នាក់ របួស ១នាក់ ខេត្តកណ្តាល១លើក ស្លាប់១នាក់ របួស២នាក់ ( ស្រី១នាក់ ) ខេត្តកោះកុង១លើក ស្លាប់១នាក់ ( ស្រី ) របួស១នាក់ ខេត្តពោធិ៍សាត់២លើក ស្លាប់១នាក់ និងខេត្តស្វាយរៀង១លើក ស្លាប់១នាក់។
ដោយឡែក រយៈពេល៣ថ្ងៃ ថ្ងៃទី៤-៦ ខែកុម្ភៈ ឆ្នាំ២០១៩ ក្នុងថ្ងៃសែនចូលឆ្នាំចិន គ្រោះថ្នាក់ចរាចរណ៍នៅទូទាំងប្រទេស កើតឡើង៥២លើក បណ្តាលឲ្យមនុស្សស្លាប់២៩នាក់ របួសសរុប៦៥នាក់ ក្នុងនោះរបួសធ្ងន់៥១នាក់ និងរបួសស្រាល១៤នាក់៕
Source: Kampuchea Thmey Daily
0 Comments