ក្រុម​តា​លី​បង់​និយាយ​ថា កិច្ច​ចរចា​​ក្រុង​មូស្គូ​ជាមួយ​អ្នកនយោបាយ​អាហ្វហ្គានីស្ថាន​ទទួល​បាន “​ជោគជ័យ​ខ្លាំង​”

កាលពី​ថ្ងៃ​ពុធ ក្រុម​តា​លី​បង់​បាន​សាទរ​កិច្ចចរចា​ដែល​មិន​ធ្លាប់មាន​ពីមុនមក​ជាមួយ​ក្រុម​អ្នកនយោបាយ​អា​ហ្វ​ហ្គា​នី​ស្ថាន​ថា​ជា “​ជោគជ័យ​យ៉ាងខ្លាំង​” បើទោះបីជា​មានការ​ខ្វែង​គំនិត​គ្នា​លើ​បញ្ហា​សិទ្ធិ​របស់​ស្ត្រី​និង​ការទាមទារ​របស់​ក្រុម​នេះ​សម្រាប់​រដ្ឋធម្មនុញ្ញ​ឥស្លាម​នៅក្នុង​ប្រទេស​ដែល​ហែកហួរ​ដោយ​សង្គ្រាម​ក៏ដោយ​។​

សម្រាប់​ការជួបជុំ​ខុសប្លែក​ពី​ធម្មតា​រយៈពេល​ពីរ​ថ្ងៃ​នៅ​ទីក្រុង​មូ​ស្គូ​នេះ​ត្រូវបាន​គេ​មើលឃើញថា មេដឹកនាំ​ក្រុម​តា​លី​បង់​បាន​ឈរ​ប្រកៀក​ស្មារ​គ្នា​ជាមួយ​អតីត​ប្រធានាធិបតី​លោក Hamid Karzai ដែល​បាន​ហៅ​ក្រុម​បះបោរ​នេះ​ថា​ជា “​បងប្អូន​” របស់គាត់​ខណៈ​ភាគី​ទាំងពីរ​បាន​យល់ព្រម​ស្វែងរក​សន្តិភាព​យូរអង្វែង​។​

មិនមាន​មន្ត្រី​រដ្ឋាភិបាល​ណា​ម្នាក់​ត្រូវបាន​គេ​អញ្ជើញ​ឲ្យ​មក​ចូលរួម​ក្នុង​កិច្ចប្រជុំតុមូល​នេះ​ទេ​។​
​នេះ​ជា​លើក​ទី​២​ហើយ​ដែល​លោក​ប្រធានាធិបតី Ashraf Ghani បានគេច​ផុតពី​ការចរចា​បែបនេះ​ក្នុង​រយៈពេល​ប៉ុន្មាន​សប្តាហ៍​ថ្មីៗ​បន្ទាប់ពី​សហរដ្ឋអាមេរិក​បានរៀបចំ​កិច្ចពិភាក្សា​ដាច់ដោយឡែក​ជាមួយ​ក្រុម​បះបោរ​នៅ​ទីក្រុង​ដូ​ហា​ដោយ​គ្មាន​វត្តមាន​របស់​រដ្ឋាភិបាល​ក្រុង​កា​ប៊ុល​។​

លោក Sher Mohammad Abbas Stanikzai ដែល​ដឹកនាំ​គណៈប្រតិភូ​តា​លី​បង់​បានបង្ហាញ​ខ្លួន​ដ៏​កម្រ​នៅមុខ​ប្រព័ន្ធ​ផ្សព្វផ្សាយ​អន្តរជាតិ​នៅក្បែរ​លោក Karzai ។​

មន្ត្រី​តា​លី​បង់​ប្រាប់​ក្រុមអ្នកកាសែត​ថា “​កិច្ចប្រជុំ​នេះ​ទទួលបាន​ជោគជ័យ​យ៉ាង​ធំធេង​។ យើង​បាន​ឯកភាពគ្នា​លើ​ចំណុច​ជាច្រើន​ហើយ​ខ្ញុំ​សង្ឃឹមថា នៅពេល​អនាគត​យើង​អាច​ទទួលបាន​ជោគជ័យ​បន្ថែម​ទៀតហើយ​ទីបំផុត​យើង​អាច​ឈានដល់​ដំណោះស្រាយ​មួយ​។ យើង​អាច​រកបាន​សន្តិភាព​ពេញលេញ​មួយ​នៅក្នុង​ប្រទេស​អា​ហ្វ​ហ្គា​នី​ស្ថាន​”​។​

ភាគី​ទាំងអស់​បាន​ព្រមព្រៀងគ្នា​គាំទ្រ​កិច្ចចរចា​សន្តិភាព​ក្រុង​ដូ​ហា​ជាមួយ​ក្រុម​អ្នកចរចា​អា​មេ​រិច​ដែល​លោក​ប្រធានាធិបតី Donald Trump ពិពណ៌នា​កាលពី​ថ្ងៃ​អង្គា​រថា​ជា “​ការស្ថាបនា​”​។​

សេចក្តីថ្លែងការណ៍​ប្រាំបួន​ចំណុច​ដែល​បាន​បញ្ចេញ​ក្នុងនាម​ភាគី​ទាំងអស់​ក៏បាន​ព្រមព្រៀងគ្នា​លើ​ការដក​កងទ័ព​បរទេស​ទាំងស្រុង​ចេញពី​ប្រទេស​អា​ហ្វ​ហ្គា​នី​ស្ថាន​ផងដែរ​៕ AFP

​ 

Source: Kampuchea Thmey Daily