ភ្នំពេញ ៖ លោកទេសរដ្ឋមន្ត្រី ស៊ុន ចាន់ថុល បានដឹកនាំកិច្ចប្រជុំលើកដំបូងរបស់គណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការ នៃក្រសួងសាធារណការ និងដឹកជញ្ជូន។
ពិធីនេះប្រព្រឹត្តឡើង ដោយមានការចូលរួមពីសំណាក់ថ្នាក់ដឹកនាំសំខាន់ៗ និងមន្ត្រីរាជការរបស់ក្រសួង កាលពីថ្ងៃព្រហស្បតិ៍ ៣កើត ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៧ ខែកុម្ភៈ ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន។
កិច្ចប្រជុំនេះមានគោលបំណងពិភាក្សាលើលទ្ធភាព នៃការផ្ទេរសេវាសាធារណៈផ្សេងៗទៀតឲ្យបានច្រើនតាមដែលអាចធ្វើទៅបាន ទៅថ្នាក់ក្រោមជាតិ ដោយមានការជួយជ្រោមជ្រែងផ្នែកបណ្ដុះបណ្ដាលធនធានមនុស្សឲ្យមានសមត្ថភាពគ្រប់គ្រាន់ ក្នុងការបម្រើសេវាសាធារណៈឲ្យមានប្រសិទ្ធភាពខ្ពស់បំផុត ព្រមទាំងការប្រកាសសុពលភាពសមាសភាពរបស់គណៈកម្មការ និងលេខាធិការដ្ឋានរបស់ក្រសួងផងដែរ។
ថ្លែងនៅក្នុងអង្គពិធីទាំងមូល លោកទេសរដ្ឋមន្ត្រី ស៊ុន ចាន់ថុល បានបង្ហាញការគាំទ្រយ៉ាងពេញទំហឹងក្នុងការធ្វើប្រតិភូកម្មសេវាសាធារណៈ លើវិស័យសាធារណការ និងដឹកជញ្ជូន ទៅថ្នាក់ក្រោមជាតិឲ្យបានច្រើនតាមដែលអាចធ្វើបាន តាមរយៈមន្ទីរសាធារណការ និងដឹកជញ្ជូន អង្គភាពច្រកចេញចូលតែមួយ ការិយាល័យច្រកចេញចូលតែមួយ និងយន្តការច្រកចេញចូលតែមួយ ដើម្បីជំរុញឲ្យមានអភិបាលកិច្ចល្អ ពង្រឹងគុណភាពសេវាសាធារណៈ បណ្ដុះស្មារតីភាពជាម្ចាស់ លើកកម្ពស់ការចូលរួមរបស់ប្រជាពលរដ្ឋ និងឆ្លើយតបតាមតម្រូវការរបស់ប្រជាពលរដ្ឋ។
លោកទេសរដ្ឋមន្ត្រីបានបន្តថា ដើម្បីឆ្លើយតបនឹងគោលនយោបាយរបស់រាជរដ្ឋាភិបាល ក៏ដូចជាគោលនយោបាយរបស់ក្រសួង សេវាសាធារណៈមួយចំនួនធំ ត្រូវបានផ្ទេរទៅថ្នាក់ក្រោមជាតិ រួមមាន ៖ ការប្រឡងយកប័ណ្ណបើកបរ ប្ដូរ ឬពន្យារប័ណ្ណបើកបរ ការត្រួតពិនិត្យលក្ខណៈបច្ចេកទេសយានជំនិះ និងសេវាសាធារណៈមួយចំនួនទៀត ដើម្បីធ្វើឲ្យប្រសើរឡើងនូវសេវាសាធារណៈ ស្របតាមប្រសាសន៍ដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គឺ ធ្វើឲ្យបានលឿន ធ្វើឲ្យមានប្រសិទ្ធភាព និងធ្វើឲ្យមានតម្លាភាព។
លើសពីនេះទៅទៀត ក្រសួងសាធារណការ និងដឹកជញ្ជូន ក៏បានបើកឲ្យមានមណ្ឌលប្ដូរ និងពន្យារប័ណ្ណបើកបរនៅតាមផ្សារទំនើបអ៊ីអន១ និងអ៊ីអន២ ឆៀកចល័ត និងប្រើប្រាស់យន្តការបច្ចេកវិទ្យាព័ត៌មានវិទ្យាតាមប្រព័ន្ធអ៊ីនធឺណិត (ប្រព័ន្ធស្វ័យប្រវត្តិកម្មចុះបញ្ជីយានយន្ត ប្រព័ន្ធស្វ័យប្រវត្តិកម្មត្រួតពិនិត្យលក្ខណៈបច្ចេកទេសយានជំនិះ ប្រព័ន្ធស្វ័យប្រវត្តិកម្មដាក់ពាក្យប្រឡងយកប័ណ្ណបើកបរ និងប្រព័ន្ធស្វ័យប្រវត្តិកម្មអាជីវកម្មដឹកជញ្ជូនផ្លូវគោក) ដែលអាចឲ្យប្រជាពលរដ្ឋប្រើប្រាស់សេវានេះបានគ្រប់ទីកន្លែង និងគ្រប់ពេលវេលា ទោះបីនៅក្រៅប្រទេសក្ដី ក៏អាចប្រើសេវាទាំងនេះបានដែរ៕
Source: Kampuchea Thmey Daily
0 Comments