ភ្នំពេញ ៖ សិក្ខាកាមទាំអស់ត្រូវតែខិតខំយកទុកដាក់រៀនសូត្រឲ្យបានចប់វគ្គដើម្បីសម្រេចបានជោគជ័យក្នុងការធ្វើជំរឿនប្រជាពលរដ្ឋឆ្នាំ២០១៩ជូនប្រទេសជាតិមាតុភូមិរបស់យើងទាំងអស់គ្នា។
លោកសុខ ពេញវុធ អភិបាលខណ្ឌដូនពេញបានមានប្រសាសន៍បែបនេះនៅព្រឹក ថ្ងៃទី១១ ខែកុម្ភៈ ឆ្នាំ២០១៩នេះ ខណៈដែលលោកបានចូលរួមជាអធិបតី ក្នុងពិធីបើកវគ្គបណ្តុះបណ្តាលជំរឿនទូទៅប្រជាជន នៅក្នុងព្រះរាជាណាចក្រកម្ពុជាឆ្នាំ២០១៩ ដែលប្រារព្ធធ្វើឡើងនៅវិទ្យាល័យវត្តកោះ ស្ថិតនៅក្នុងសង្កាត់ផ្សារថ្មីទី៣ ខណ្ឌដូនពេញ។
ក្នុងវគ្គបណ្តុះបណ្តាលនេះ មានការអញ្ជើញចូលរួមពី លោក ហែម អាន ប្រធានក្រុមប្រឹក្សាខណ្ឌដូនពេញ តំណាងមន្ទីរផែនការរាជធានីភ្នំពេញ អធិការរងនគរបាលខណ្ឌ លោក លោកស្រីចៅសង្កាត់ទាំង១១ លោកនាយនគរបាលប៉ុស្តិ៍ទាំង១១ លោក លោកស្រីជាគ្រូបង្គោលប្រចាំខណ្ឌ និង លោក លោកស្រីជាមន្ត្រីជំរឿនទាំងអស់ សរុបចំនួន ៨៣នាក់។
គោលបំណងនៃវគ្គបណ្តុះបណ្តាលជំរឿននេះ គឺដើម្បីទទួលបានការរាប់ប្រជាជនទាន់សម័យកាល (តាមអាយុ និងភេទ) តាមលក្ខណៈប្រជាសាស្ត្រ សេដ្ឋកិច្ចសង្គម ស្របតាមគោលនយោបាយ និង យុទ្ធសាស្ត្រអភិវឌ្ឍន៍របស់រាជរដ្ឋាភិបាលកម្ពុជា។
មុននឹងបញ្ចប់លោកអភិបាលខណ្ឌដូនពេញក៏បានផ្តាំផ្ញើដល់សិក្ខាកាមទាំងអស់ ត្រូវខិតខំយកទុកដាក់រៀនសូត្រ និង ចូលរួមឲ្យបានពេញលេញក្នុងពេល ៤ថ្ងៃនេះ ដើម្បីសម្រេចបានជោគជ័យក្នុងការធ្វើជំរឿនប្រជាពលរដ្ឋឆ្នាំ២០១៩ ជូនប្រទេសជាតិមាតុភូមិ៕
Source: Kampuchea Thmey Daily
0 Comments