បាត់ដំបង ៖ ជនសង្ស័យម្នាក់ដែលពាក់ព័ន្ធនឹងករណី រក្សាទុកដោយខុសច្បាប់នូវសារធាតុញៀន ត្រូវបានកម្លាំងផ្នែកជំនាញ នៃអធិការដ្ឋាននគរបាលស្រុកសង្កែ ធ្វើការឃាត់ខ្លួន រួមជាមួយនឹងថ្នាំញៀន ចំនួន ១៧ កញ្ចប់ ខណៈដែលកម្លាំងចុះល្បាតហើយមានការសង្ស័យ។
លោក អនុសេនីយ៍ឯក សំ ប៊ុនហេង នាយផ្នែកប្រឆាំងគ្រឿងញៀន បានលើកឡើងថា កិច្ចប្រតិបត្តិការដែលបានសហការជាមួយកម្លាំងផ្នែកយុត្តិធម៌ នេះបានធ្វើឡើងកាលពីថ្ងៃទី ៨ ខែ កុម្ភៈ ឆ្នាំ ២០១៩ វេលាម៉ោង១២និង៣០នាទីថ្ងៃត្រង់ បានចុះទៅកាន់ចំណុច ភូមិវត្តកណ្តាល ឃុំរាំងកេសី ស្រុកសង្កែ ខេត្តបាត់ដំបង។
នៅទីនោះកម្លាំងបានឃាត់ខ្លួនយុវជនម្នាក់ដោយសារមានការសង្ស័យ ហើយជននោះមានឈ្មោះ សៅ សេត ហៅ ចក់ ភេទប្រុស អាយុ២៧ឆ្នាំ រស់នៅត្រង់ចំណុចខាងលើ ។ កម្លាំងជំនាញបានរកឃើញថ្នាំញៀនចំនួន ១៧ កញ្ចប់មានទម្ងន់ ៤,៤៧ ក្រាម ទូរស័ព្ទដៃ ១ គ្រឿង និង សម្ភារៈសម្រាប់ប្រើប្រាស់មួយចំនួនថែមទៀត ។ បច្ចុប្បន្នជនសង្ស័យខាងលើ រួមជាមួយនឹងវត្ថុតាងត្រូវបានកម្លាំងបញ្ជូនទៅកាន់សាលាដំបូងហើយ៕
Source: Kampuchea Thmey Daily
0 Comments