ខ្យល់កន្ត្រាក់ បានបំផ្លាញឃ្លាំងសាយឡូ និងផ្ទះពលរដ្ឋ អស់ជាង២០ខ្នង

បាត់ដំបង ៖ ផ្ទះប្រជាពលរដ្ឋប្រមាណជាង២០ខ្នង រួមជាមួយនឹងឃ្លាំងសាយឡូ១កន្លែង ដែលក្នុងនោះមានរបស់របរជាច្រើន ព្រមទាំងបានចំណាយថវិកាសាងសង់ប្រមាណ៥ម៉ឺនដុល្លារ ត្រូវខ្ទេចខ្ទីរាបស្មើដល់ដី បន្ទាប់ពីមានខ្យល់កន្ត្រាក់បានបោកបក់មកចំ កាលពីល្ងាចម្សិលមិញនេះ។

ហេតុការណ៍ នៃគ្រោះធម្មជាតិនេះ បានកើតឡើងកាលពីវេលាម៉ោង៣និង៤០នាទីរសៀល ថ្ងៃទី១៧ ខែកុម្ភៈ ឆ្នាំ២០១៩ ត្រង់ចំណុចភូមិតាក្រី ឃុំតាក្រី ស្រុកកំរៀង ខេត្តបាត់ដំបង ខណៈដែលមានភ្លៀងមួយមេរួចមក ក៏ស្រាប់តែខ្យល់កំណាចនោះបានបោកបក់មកយ៉ាងខ្លាំងតែម្តង។

ក្រោយពីមានការចុះត្រួតពិនិត្យពីសំណាក់អាជ្ញាធរ និងសមត្ថកិច្ចនៅក្នុងតំបន់នោះរួចមក ក៏បានធ្វើរបាយការណ៍រួមមួយ ដើម្បីផ្ញើជូនទៅសាខាកាកបាទក្រហមខេត្ត ដោយក្នុងនោះការខូចខាតរួមមាន សាយឡូ១កន្លែង ដែលមានទំហំ៣០ម៉ែត្រ គុណ៦០ម៉ែត្រ ធ្វើអំពីថ្ម ដែក និងប្រក់ ស័ង្កសី ត្រូវបានបំផ្លាញរាបដល់ដី ដែលការសាងសង់មានតម្លៃប្រមាណ៥០.០០០ដុល្លារ នៅក្នុងនោះក៏មានរបស់របរមួយចំនួនផងដែរដូចជា រថយន្តឡង់គ្រីស័រ១គ្រឿង ម៉ូតូ១គ្រឿង គោយន្តកន្ត្រៃ៣គ្រឿង ម៉ាស៊ីនកិនដំឡូង៣គ្រឿង ម៉ាស៊ីនបូមទឹក៥គ្រឿង ឡសំងួត៣ ( ឡ នីមួយៗ មានចំណុះ៣តោន) ដំឡូងស្រស់ ៦០តោន ត្រាក់ទ័រ២គ្រឿង ម៉ាស៊ីនបាញ់ស្មៅ១០គ្រឿង និង ស្រូវ២០តោន ដោយសាយឡូ និង របស់របរទាំងនេះ ជារបស់ លោក ហែម ថ្លៃថ្លា និង អ្នកស្រី ឆេង មុំ។

ក្រៅពីនេះ ក៏មានផ្ទះប្រជាពលរដ្ឋចំនួន២១ខ្នង ផងដែរ ដែលត្រូវបានខ្យល់កន្ត្រាក់វាយបំផ្លាញគ្មានសល់ នៅក្នុងរយៈពេលតែមួយ ដោយបច្ចុប្បន្នខាងអាជ្ញាធរស្រុក បានរៀបចំឯកសារហើយ ដើម្បីបញ្ជូនទៅសាលាខេត្ត និងកាកបាទក្រហមខេត្ត ប៉ុន្តែនៅក្នុងហេតុការណ៍នេះដែរ គឺពុំមានប៉ះពាល់ដល់អាយុជីវិតនរណាម្នាក់ឡើយ៕