ហ៊ីយ៉ាន់ដាយដឹកស៊ីម៉ងត៍ពេញ បុករះរថយន្តចតស្ងៀមចំនួន៤គ្រឿងនៅផ្លូវបំបែកស្រែអំបិល ស្លាប់ម្នាក់ របួសម្នាក់

ព្រះសីហនុ ៖ មនុស្សម្នាក់ បានស្លាប់យ៉ាងអាណោចអាធ័ម ដោយខ្លួនប្រាណកៀបជាប់នៅក្នុងរថយន្ត នៅក្នុងហេតុការណ៍គ្រោះថ្នាក់ចរាចរណ៍រថយន្តធុនធំដឹកស៊ីម៉ងត៍មួយគ្រឿង បើកបុករថយន្តចតស្ងៀមចំនួន៤គ្រឿងផ្សេងទៀតនៅចំណុចផ្លូវបំបែកស្រែអំបិល។ នៅកន្លែងកើតហេតុគេឃើញមានមនុស្សជាច្រើននាក់ នាំគ្នាចោមរោមមើលព្រមទាំងជួយសង្គ្រោះអ្នករងរបួសផងដែរ។

ករណីគ្រោះថ្នាក់ដ៏រន្ធត់នេះ បានកើតមានឡើងនៅម៉ោង ១០និង១៣នាទីព្រឹក ថ្ងៃទី១៧ ខែកុម្ភៈ ឆ្នាំ២០១៩ លើផ្លូវជាតិលេខ ៤ ចន្លោះគីឡូម៉ែត្រលេខ 141-142 ចំណុចថ្នល់បំបែកស្រែអំបិល ស្ថិតក្នុងភូមិចំការហ្លួង ឃុំចំការហ្លួង ស្រុកកំពង់សិលា ខេត្តព្រះសីហនុ។

សមត្ថកិច្ចបានឲ្យដឹងថា រថយន្តបង្កហេតុដឹកស៊ីម៉ងត៍ ម៉ាកហ៊ីយ៉ាន់ដាយ ពាក់ស្លាកលេខ កំពង់ធំ 3A-1369 បើកក្នុងទិសដៅចេញពីកំពង់ផែស្រុកស្រែអំបិលទៅភ្នំពេញ លុះមកដល់ចំណុចកើតហេតុរថយន្តបើកចុះផ្លូវចុះចំណោតចំណុចថ្នល់បំបែកស្រែអំបិលផ្លូវជាតិលេខ ៤៨ ឆ្លងចូលផ្លូវជាតិលេខ ៤ ក៏បានបុករថយន្ត ចំនួន៤គ្រឿងដែលចតនៅចិញ្ចើមផ្លូវក្រួសក្រហម បណ្តាលឲ្យរងរបួសនិងស្លាប់នៅកន្លែងកើតហេតុ។

សមត្ថកិច្ចបានឲ្យដឹងទៀតថា នៅក្នុងករណីរថយន្តបុករះជាច្រើនគ្រឿងនេះ ភាគីតៃកុងរថយន្តបង្កមិនបានរត់គេចខ្លួននោះទេ ព្រោះថានៅក្នុងហេតុការណ៍នេះ អ្នកបើករថយន្តក៏បានរងរបួសធ្ងន់ដែរ។

សមត្ថកិច្ចបានឲ្យដឹងទៀតថា ករណីនេះ បានខូចខាតរថយន្ត៥គ្រឿង ក្នុងនោះ
1/ រថយន្តធំដឹកស៊ីម៉ងត៍ ម៉ាកហ៊ីយ៉ាន់ដាយ អ្នកបើកបរ ឈ្មោះ សាទ ម៉ា ភេទប្រុស អាយុ ៣៨ឆ្នាំ មានទីលំនៅភូមិ ភ្នំដី ឃុំច្បារមន ស្រុកច្បារមន ខេត្តកំពង់ស្ពឺ របួសធ្ងន់។ 2/ រថយន្តម៉ាក CRV ពណ៌ទឹកប្រាក់ ពាក់ស្លាកលេខ ភ្នំពេញ 2M-2821 ចតនៅលើចិញ្ចើមផ្លូវក្រួសក្រហម អ្នកបើកបរឈ្មោះ សុទ រិទ្ធី ភេទប្រុស អាយុ ៣៨ឆ្នាំ មានទីលំនៅភូមិ ០៤ សង្កាត់លេខ ០៤ ក្រុងព្រះសីហនុ ខេត្តព្រះសីហនុ ស្លាប់ក្នុងរថយន្ត។ 3/ រថយន្តម៉ាកហ៊ីយ៉ាន់ដាយ ១តោនម្ភៃប្រាំ ពណ៌ខៀវ ពាក់ស្លាកលេខ ភ្នំពេញ 2W-0660 ចតនៅលើចិញ្ចើមផ្លូវក្រួសក្រហម។ 4/ រថយន្តម៉ាកហ៊ីយ៉ាន់ដាយ ១តោនម្ភៃប្រាំ ពណ៌ខៀវ ពាក់ស្លាកលេខ ភ្នំពេញ 2J-1267 ចតនៅចិញ្ចើមផ្លូវក្រួសក្រហម។ 5/ រថយន្តធុនតូច ម៉ាក ALTO. SUZUKI ពណ៌ស ពាក់ស្លាកលេខ ភ្នំពេញ 2F-0885 ចតនៅចិញ្ចើមផ្លូវក្រួសក្រហម។
បច្ចុប្បន្នវត្ថុតាងរថយន្តទាំង ៥គ្រឿង សមត្ថកិច្ចបានស្ទូចយកទៅរក្សាទុកនៅអធិការដ្ឋាននគរបាលស្រុកកំពង់សិលាដើម្បីបន្តនីតិវិធី។ ចំណែកសពរង់ចាំគ្រួសារ មកទទួលយកទៅធ្វើបុណ្យតាមប្រពៃណី៕