បន្ទាយមានជ័យ ៖ អ្នកជិតខាង២គ្រួសារឈ្លោះគ្នារាល់ថ្ងៃ ឈានដល់ប្រើហិង្សាដាល់ស្ត្រីម្នាក់ឲ្យសន្លប់ ត្រូវបានកម្លាំងមូលដ្ឋានកងរាជអាវុធហត្ថក្រុង ដឹកនាំដោយ លោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ ចុះបង្ក្រាបឃាត់ខ្លួនបាន១នាក់នៅវេលាម៉ោង៧យប់ ថ្ងៃទី២៧ ខែកុម្ភៈ ឆ្នាំ២០១៩ ចំណុចភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
បន្ទាប់ពីឃាត់ខ្លួនហើយ ជនសង្ស័យ ត្រូវបានបញ្ជូនមកទីបញ្ជាការកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌ បានឲ្យដឹងថា យោងតាមបណ្ដឹងរបស់ជនរងគ្រោះ ឈ្មោះ រ៉េត រួម ភេទស្រី អាយុ៥៣ឆ្នាំ រស់នៅភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យបានបំភ្លឺឲ្យដឹងថា ជនសង្ស័យមាន ឈ្មោះ សាវឹង មករា ភេទប្រុស អាយុ២៦ឆ្នាំ ស្នាក់នៅក្នុងភូមិគាប សង្កាត់ទឹកថ្លា ក្រុងសិរីសោភ័ណ។ កន្លងមក គ្រួសាររបស់ជនរងគ្រោះ និងគ្រួសាររបស់ជនសង្ស័យតែងតែឈ្លោះប្រកែកគ្នា មិនដែលត្រូវគ្នាម្តងណាឡើយ នៅថ្ងៃកើតហេតុម្តាយរបស់ជនសង្ស័យ និងជនសង្ស័យ បានមកឈ្លោះជេរប្រមាថខ្លួនដល់មុខផ្ទះ ខ្លួនក៏បានឈ្លោះប្រកែកតពាក្យសំដីគ្នា ស្រាប់តែជនសង្ស័យដើរចូលមកហើយដាល់ជនរងគ្រោះ ចំនួន២ដៃ បណ្តាលឲ្យដួលសន្លប់លែងដឹងខ្លួនតែម្តង។
ក្រោយពីធ្វើការសាកសួរ ជនសង្ស័យបានឆ្លើយសារភាពថា ខ្លួនពិតជាបានដាល់ជនរងគ្រោះឲ្យសន្លប់ពិតប្រាកដមែន ដោយសារកំហឹងខ្លាំងពេក។
លោកបានបញ្ជាក់បន្ថែមទៀតថា ផ្អែកលើចម្លើយសារភាពរបស់ជនសង្ស័យ ឃើញថា មានតម្រុយពិរុទ្ធភាព នៃបទល្មើសជាក់លាក់ ជនសង្ស័យខាងលើ អាចត្រូវចោទពីបទ ហិង្សាដោយចេតនា កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការ ដើម្បីចាត់ការទៅតាមច្បាប់៕
Source: Kampuchea Thmey Daily
0 Comments