មន្ត្រីជាន់ខ្ពស់ក្រសួងមហាផ្ទៃ ណែនាំឲ្យអាជ្ញាធរខេត្តប៉ៃលិន បង្ក្រាបបទល្មើសផ្សេងៗបន្ថែមទៀត

ប៉ៃលិន ៖ មានប្រសាសន៍លើកឡើងក្នុងពិធីប្រកាស តែងតាំងអភិបាលរងខេត្តប៉ៃលិន នារសៀលថ្ងៃទី២៧ ខែកុម្ភៈ ឆ្នាំ២០១៩ នៅសាលាខេត្តប៉ៃលិន លោក ឡេង វី រដ្ឋលេខាធិការក្រសួងមហាផ្ទៃ និងជាតំណាងដ៏ខ្ពស់ខ្ពស់របស់ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញឲ្យអាជ្ញាធរខេត្តប៉ៃលិន បង្ក្រាបបទល្មើសផ្សេងៗបន្ថែមទៀត ដើម្បីរក្សាឲ្យបាននូវសុខសុវត្ថិភាព និងសន្តិសុខសង្គមជូនពលរដ្ឋតាមមូលដ្ឋាន។

ពិធីនេះមានការអញ្ជើញចូលរួមពី លោក ឡី ចាន់ឆាយ ប្រធានក្រុមប្រឹក្សាខេត្ត,លោក ផាន់ ចានធុល អភិបាល នៃគណៈអភិបាលខេត្តប៉ៃលិន ព្រមទាំងគណៈប្រតិភូអមដំណើរគណៈអធិបតី, មន្ត្រីរាជការតាមមន្ទីរស្ថាប័នជុំវិញខេត្ត សមត្ថកិច្ចទាំងបីស្ថាប័ន ,អភិបាលក្រុង/ស្រុក, មេឃុំ/ចៅសង្កាត់ យ៉ាងច្រើនកុះករ។

លោក ផាន់ ចានធុល អភិបាល នៃគណៈអភិបាលខេត្តប៉ៃលិន មានប្រសាសន៍បានក្រើនរំលឹកដល់អភិបាលរងខេត្ត ដែលត្រូវបានតែងតាំងថ្មី ត្រូវខិតខំបំពេញការងារ ដោយស្មារតីយកចិត្តទុកដាក់ និងមានការទទួលខុសត្រូវខ្ពស់ ប្រឹងប្រែងឲ្យអស់ពីកម្លាំងកាយចិត្ត ប្រាជ្ញាស្មារតី ដើម្បីបំពេញការងារជូនតម្រូវការ ជូនប្រជាពលរដ្ឋឲ្យកាន់តែសកម្មថែមទៀត ជាពិសេស ត្រូវសហការ សាមគ្គីគ្នា ដើម្បីឲ្យខេត្ត មានការអភិវឌ្ឍន៍ជាបន្តបន្ទាប់ទៅទៀត។

ថ្លែងនៅក្នុងឱកាសនោះដែរ លោក ឡេង វី រដ្ឋលេខាធិការក្រសួងមហាផ្ទៃ និងជាតំណាងដ៏ខ្ពស់ខ្ពស់របស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានធ្វើការផ្ដាំផ្ញើដល់លោកអភិបាលរងខេត្តប៉ៃលិន ដែលទើបតែងតាំងថ្មីថា ៖ ត្រូវចូលរួមគ្រប់គ្រងដឹកនាំ ធ្វើយ៉ាងណាឲ្យ រាល់ភារកិច្ច ដែលរាជរដ្ឋាភិបាលដាក់ចេញមក ត្រូវអនុវត្តន៍ ឲ្យបានជោគជ័យ ជាពិសេសចូលរួមគ្រប់គ្រងអភិវឌ្ឍន៏ខេត្ត និងការបម្រើសេវាសាធារណៈជូនប្រជាពលរដ្ឋឲ្យកាន់តែល្អប្រសើរថែមទៀត។

លោកជាគណៈអធិបតី បន្តថា ចំពោះបញ្ហាសន្តិសុខសណ្ដាប់ធ្នាប់សាធារណៈ និងសន្តិសុខសង្គម អាជ្ញាធរមូលដ្ឋាន ត្រូវតែយកចិត្តទុកដាក់ឲ្យបានខ្ពស់ ពោលគឺអាជ្ញាធរគ្រប់លំដាប់ថ្នាក់ ជាពិសេសអាជ្ញាធរមានសមត្ថកិច្ច ត្រូវតែធ្វើការទប់ស្កាត់ជាមុន ចំពោះអំពើប្លន់ប្រដាប់អាវុធ ចោរលួច ការចែកចាយ ប្រើប្រាស់គ្រឿងញៀន នៅក្នុងមូលដ្ឋានរបស់ខ្លួន ធ្វើឲ្យប្រជាពលរដ្ឋមានភាពកក់ក្ដៅនៅក្នុងចិត្ត និងមានជំនឿទុកចិត្តលើអាជ្ញាធរ គប្បីយើងទាំងអស់គ្នា ដែលជាអ្នកបម្រើប្រជាពលរដ្ឋ ត្រូវតែធ្វើសកម្មភាព ឲ្យបានខ្លាំងក្លាក្នុងការបង្ក្រាប ឲ្យបានជាដាច់ខាត ចំពោះទង្វើខុសច្បាប់ដែលកើតមាន ។

ជាមួយគ្នានេះ លោកក៏បានជំរុញឲ្យអភិបាលរងខេត្ត ដែលទើបតែងតាំង ត្រូវធ្វើយ៉ាងណាសហការជាមួយ អាជ្ញាធរពាក់ព័ន្ធគ្រប់លំដាប់ថ្នាក់ ដើម្បីថែរក្សាការពារសន្តិសុខសណ្ដាប់ធ្នាប់សាធារណៈ ជូនបងប្អូនប្រជាពលរដ្ឋឲ្យបានល្អប្រសើរផងដែរ។

សូមបញ្ជាក់ថា លោក ឃ្លោក នួយ សមាជិកក្រុមប្រឹក្សាខេត្តប៉ៃលិន ត្រូវរាជរដ្ឋាភិបាលកម្ពុជា ប្រកាសតែងតាំងជាអភិបាលរង នៃគណៈអភិបាលខេត្តប៉ៃលិន ជំនួស លោក សោ មុន្នីរ័ត្ន ជាអភិបាលរងខេត្តប៉ៃលិនចាស់ ដែលទទួលគ្រោះថ្នាក់ចរាចរណ៍ រហូតបាត់បង់ជីវិត ក្នុងការបំពេញបេសកកម្មការងារផងដែរ៕