ប្រជាពលរដ្ឋ ក្នុងស្រុកមេមត់ ប្រារព្ធពិធីចាប់ត្រីបឹងត្រពាំងក្រំ ដើម្បីរក្សាប្រពៃណីដូនតាខ្មែរ

ត្បូងឃ្មុំ ៖ ជារៀងរាល់ឆ្នាំនៅក្នុងខែកុម្ភៈនេះ បន្ទាប់ពីប្រមូលផលកសិកម្មរួចរាល់អស់ហើយនោះ បងប្អូនប្រជាពលរដ្ឋតែងតែប្រារព្ធពិធី ចាប់ត្រី នៅរមណីយដ្ឋានបឹងត្រពាំងក្រំ ស្ថិតក្នុងភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ ដើម្បីរំលឹករក្សាអភិរក្សកេរ្តិ៍តំណែលពីបុរាណតរៀងមក ក្នុងតំបន់នេះ។

ប្រជាពលរដ្ឋប្រមាណជាង៣ពាន់នាក់ មកពី ឃុំជាំក្រវៀន ឃុំជាំ ស្រុកមេមត់ ខេត្តត្បូងឃ្មុំ និងខ្លះទៀត មកពីខេត្តកំពង់ចាម ខេត្តព្រៃវែង និងខេត្តស្វាយរៀង ផងដែរ បានចូលរួមក្នុងពិធីនោះ ក្នុងស្មារតីភាតរភាពសាមគ្គីភាព ស្រលាញ់រាក់ទាក់គ្នា ប្រកបដោយ សីលធម៌ សុជីវធម៌ យ៉ាងល្អផូរផង់ និងមានលក្ខណៈជាតិនិយមគួរជាទីមោទនៈ។

លោក រិន សំអឿន អាយុ៣៣ឆ្នាំ រស់នៅភូមិសាទុំ ឃុំជាំក្រវៀន ស្រុកមេមត់ បានបញ្ជាក់ឱ្យដឹងថា គាត់មានឧបករណ៍អង្រុតយកមកចុះរុតចាប់ត្រី រាល់ឆ្នាំ តែឆ្នាំនេះត្រីមិនសម្បូរទេ ទឹកបឹងត្រពាំងរាក់ គឺនៅរដូវវស្សាដីហូរចូលក្នុងត្រពាំង មូលហេតុអស់ព្រៃឈើ មានចម្ការជុំវិញបឹងច្រើន ឆ្នាំនេះចាប់បានត្រីតូចៗ យកទៅធ្វើម្ហូបជាលក្ខណៈគ្រួសារ។

លោកយាយ ស្បោង អ៊ូច ក្នុងវ័យជាង៧០ឆ្នាំ បានបញ្ជាក់ឱ្យដឹងដែរថា ពីដើមមុននឹងចុះចាប់គេធ្វើពិធីសែនសុំម្ចាស់ទឹក ម្ចាស់ដី សុំឱ្យត្រីដែលមានធ្មុងទាំងឡាយ ដូចជាត្រីឆ្លាំង ត្រីអណ្តែង ត្រីកញ្ចុះ ជាដើម សូមឱ្យស្លូតដូចត្រីកំភ្លាញ ធ្វើដូចនេះ ពេលបងប្អូនប្រជាពលរដ្ឋចុះចាប់ត្រីមិនមានបញ្ហាមុតត្រីអ្វីនោះទេ នេះជាទំនៀមបុរាណយើង។

លោក អ៊ូច យឿន មេឃុំជាំក្រវៀន និងជាប្រធានគណៈកម្មការរៀបចំកម្មវិធីចាប់ត្រីបឹងត្រពាំងក្រំ បានបញ្ជាក់ឱ្យដឹងថា ថ្ងៃនេះជាថ្ងៃនក្ខត្តឫក្សដ៏ល្អត្រចះត្រចង់ ដែលបងប្អូនប្រជាពលរដ្ឋ បាននាំគ្នាជាឯកច្ឆន្ទប្រារព្ធពិធីចាប់ត្រីបឹងត្រពាំងក្រំរបស់យើង ជារៀងរាល់ឆ្នាំនៅក្នុងខែកុម្ភៈនេះ រយៈពេល៣ថ្ងៃ គឺចាប់ពីថ្ងៃទី ៨.៩ និងថ្ងៃទី១០ ខែកុម្ភៈ នេះតែម្តង។ នៅពីរថ្ងៃដំបូងគឺថ្ងៃទី៨ និងថ្ងៃទី៩ គឺបងប្អូនបានមកជួបជុំគ្នា ដើរលែងកម្សាន្ត ទស្សនាទេសភាពស្ថិតនៅជុំវិញតំបន់បឹងត្រពាំងក្រំ ដែលមានកេរ្តិ៍ ដំណែលពីដូនតាយើង រួមមាន៖ ថ្មតាជ្រូក ដីពណ៌ឈាម ក្បាលតាជក តាព្រាម កន្លែងឡស្រា និងស្រះទឹកនាងលើមជាដើម។ ក្រៅពីដើរទស្សនាកម្សាន្តពីប្រវត្តិ និងកេរ្តិ៍ដំណែល យ៉ាងជក់ចិត្ត សប្បាយអឺងកង នាពេលថ្ងៃនោះ នៅពេលរាត្រី មានកម្មវិធី រាំច្រៀងតាមលក្ខណៈប្រពៃណីខ្មែរផងដែរ។ បន្ទាប់គឺ នៅថ្ងៃទី១០ ខែកុម្ភៈ នេះ គឺជាថ្ងៃបងប្អូនប្រជាពលរដ្ឋយើង ប្រមាណជាង៣ពាន់នាក់ មកពីឃុំជាំក្រវៀន ឃុំជាំ ស្រុកមេមត់ ខេត្តត្បូងឃ្មុំ ខេត្តកំពង់ចាម ខេត្តព្រៃវែង និងខេត្តស្វាយរៀង បានមកប្រារព្ធពិធីចាប់ត្រី នេះដែរ។

លោកមេឃុំបានបញ្ជាក់ទៀតថា បឹងត្រពាំងក្រំមានទំហំ១០០បួនជ្រុង ចំពោះបងប្អូនប្រជាពលរដ្ឋមកចាប់ត្រីនេះគឺ មានឧបករណ៍របៀបបុរាណរួមមាន៖ អង្រុត ឈ្នាង ឆ្នុក ត្រក ទ្រូ លប ។ល។ នៅម៉ោង១១ និង៣០នាទីថ្ងៃនេះដែរ គឺបងប្អូន នាំគ្នាចុះចាប់ត្រីរួមគ្នាតែម្តង។ ឆ្នាំនេះត្រីមានដូចជាត្រីក្រាញ់ ត្រីឆ្លូញ ត្រីទួក ត្រីអណ្តែង ត្រីកញ្ចុះ ត្រីកន្ត្រប់ ត្រីតាអោន និងត្រីកំភ្លាញ ។ល។ ហើយ ត្រីមិនសម្បូរដូចឆ្នាំទៅទេ ដោយសារបឹងរាក់ ក្នុង១ឆ្នាំយើងអនុញ្ញាត បើកឱ្យបងប្អូនចាប់បានតែម្តងទេ។ ផុតពីថ្ងៃយើងប្រារព្ធពិធីចាប់ត្រី គឺយើងមានកម្លាំងប្រជាការពារភូមិ និងកម្លាំងប៉ុស្តិ៍ការពារ មិនឱ្យមានការនេសាទដោយយកឧបករណ៍ហាមឃាត់ល្មើសច្បាប់មករកនោះទេ ធ្វើបែបនេះ គឺដើម្បីការពារត្រីបឹងធម្មជាតិរបស់យើង៕