ភ្នំពេញ ៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានអះអាងថា ប៉ុន្មានសប្តាហ៍ថ្មីៗនេះ បុគ្គល សម រង្ស៊ី ដែលជាទណ្ឌិតជនជាតិខ្មែរមានសញ្ជាតិបរទេស បានធ្វើការអំពាវនាវឥតឈប់ឈរដល់សហគមន៍អន្តរជាតិ ឲ្យចោទសួរពីធម្មានុរូបភាពរបស់រាជរដ្ឋាភិបាលកម្ពុជា និងអំពាវនាវឲ្យកងយោធពលខេមរភូមិន្ទ និងប្រជាជន ងើបបះបោរប្រឆាំងរាជរដ្ឋាភិបាល ដែលបានជាប់ឆ្នោតតាមលទ្ធិប្រជាធិបតេយ្យ ជាមួយនឹងសំឡេងឆ្នោតយ៉ាងច្រើនលើសលប់របស់ម្ចាស់ឆ្នោត។
តាមអ្នកនាំពាក្យក្រសួងការបរទេស សកម្មភាពរបស់បុគ្គល សម រង្ស៊ី អតីតមេដឹកនាំបក្សប្រឆាំងរយៈពេលប៉ុន្មានសប្តាហ៍ចុងក្រោយនេះ គឺជាការអុចអាល និងញុះញង់ ដើម្បីមហិច្ឆតាអំណាចប៉ុណ្ណោះ ដូច្នេះរាជរដ្ឋាភិបាល នឹងទប់ស្កាត់តាមគ្រប់មធ្យោបាយ នៃការប៉ុនប៉ងនានា ដែលមានបំណងការបង្កអស្ថិរភាព និងបំផ្លិចបំផ្លាញមាតុភូមិ ក៏ដូចជាសុភមង្គលរបស់ប្រជាជន នេះបើតាមសេចក្តីថ្លែងការណ៍ចុះថ្ងៃទី០៩ ខែកុម្ភៈ ឆ្នាំ២០១៩។
សេចក្តីថ្លែងការណ៍របស់អ្នកនាំពាក្យបានបញ្ជាក់យ៉ាងនេះថា ក្រសួងការបរទេស ថ្កោលទោសយ៉ាងដាច់អហង្ការចំពោះទង្វើរបស់ទណ្ឌិត សម រង្ស៊ី ដែលបានអំពាវនាវមិនឲ្យកងទ័ពស្តាប់បញ្ជា និងឲ្យមានការបះបោរ និងសេចក្តីថ្លែងការណ៍ដ៏ពិសពុលរបស់ជនរូបនេះ។ ក្នុងការអះអាងដែលគ្មានមូលដ្ឋានថា ការបោះឆ្នោតជាសកលកាលពីខែកក្កដា ឆ្នាំ២០១៨ មិនមានធម្មានុរូបភាព បុគ្គលរូបនេះបានប្រើប្រាស់វោហារសាស្ត្រនយោបាយដដែលៗ ចំពោះរាល់ការបោះឆ្នោតថ្នាក់ជាតិ ចាប់តាំងពីឆ្នាំ១៩៩៨ មក ដែលបុគ្គលនេះ និងគណបក្សដែលគាត់ដឹកនាំ បានទទួលបរាជ័យរហូតមក”។
អ្នកនាំពាក្យបញ្ជាក់ថា នៅពេលដែលទណ្ឌិត សម រង្ស៊ី អួតអាងខ្លួនឯងថា ជាវីរបុរស និងទុក្ករបុគ្គលនៃលទ្ធិប្រជាធិបតេយ្យនោះ នៅក្នុងបណ្តាប្រទេសអឺរ៉ុប និងអារ្យប្រទេសធំៗផ្សេងទៀត បុគ្គលរូបនេះគួរត្រូវបានចាត់ទុកជាជនប្រជាភិថុតិ ជនប្រជាកលនិយមប្រកបដោយគ្រោះថ្នាក់ ជាតិនិយមហួសហេតុ និងប្រកាន់ពូជសាសន៍ ដែលដើរឃោសនាឲ្យមានការបែកបាក់ក្នុងសង្គម និងការផ្លាស់ ប្តូររបបដោយមធ្យោបាយហិង្សា។ អ្នកបោះឆ្នោតកម្ពុជាបានបដិសេធដាច់អហង្ការនូវគោលបំណងទុច្ចរិតនេះ និងបានជ្រើសរើសមាគ៌ាប្រជាធិបតេយ្យ តាមរយៈដំណើរការបោះឆ្នោត។
សេចក្តីថ្លែងការណ៍របស់បុគ្គលរូបនេះ មិនត្រឹមតែមើលស្រាលយ៉ាងធ្ងន់ធ្ងរដល់គណបក្សនយោបាយចំនួន១៩ទៀត ដែលបានចូលរួមបោះឆ្នោតប៉ុណ្ណោះទេ តែថែមទាំងមើលស្រាលដល់ឆន្ទៈម្ចាស់ឆ្នោតប្រមាណ៨៣,២ភាគរយ ដែលបានបោះឆ្នោតគាំទ្រដល់គណបក្សប្រជាជនកម្ពុជា ដែលកំពុងកាន់អំណាចដោយសំឡេងភាគច្រើនលើសលប់។ កំណើនសេដ្ឋកិច្ចដ៏ខ្លាំងក្លាក្នុងអត្រា៧,៧ភាគរយ ក្នុងរយៈកាលជាងពីរទស្សវត្សរ៍ រួមជាមួយនឹងស្ថិរភាពនយោបាយ ការបែងចែកផ្លែផ្កានៃវិបុលភាពប្រកបដោយសមធម៌ គឺជាមូលដ្ឋានពន្យល់យ៉ាងច្បាស់នូវជម្រើសដ៏ឧត្តុង្គឧត្តមរបស់ប្រជាជនកម្ពុជា ដែលប្រាថ្នាចង់បានមាគ៌ាជាបន្តប្រកបដោយសន្តិភាព និងការអភិវឌ្ឍសេដ្ឋកិច្ច-សង្គម។ ការអំពាវនាវទាំងនេះ គឺគ្រាន់តែជាការអុចអាល និងញុះញង់ ដើម្បីតែមហិច្ឆតាចង់បានអំណាចរបស់ទណ្ឌិតរូបនេះតែប៉ុណ្ណោះ។ រាជរដ្ឋាភិបាលនឹងប្រឆាំងទប់ស្កាត់តាមគ្រប់មធ្យោបាយ ចំពោះរាល់ការប៉ុនប៉ងនានា និងការធ្វើអន្តរាគមន៍ពីភាគីទី៣ ក្នុងការបង្កអស្ថិរភាព និងបំផ្លិចបំផ្លាញមាតុភូមិ ក៏ដូចជាសុភមង្គលរបស់ប្រជាជនយើង។ យើងនឹងការពារប្រជាជាតិយើង ប្រឆាំងទល់នឹងកលល្បិចទាំងនេះ ទោះក្នុងតម្លៃណាក៏ដោយ។
អ្នកនាំពាក្យក្រសួងការបរទេសបញ្ជាក់ថា រាជរដ្ឋាភិបាលត្រូវបានជាប់ឆ្នោតដោយត្រឹមត្រូវ បង្កើតឡើងដោយស្របច្បាប់ និងត្រូវបានទទួលស្គាល់ជាផ្លូវការដោយបណ្តាប្រទេសជាច្រើន រួមទាំងប្រទេសនានានៅក្នុងសហភាពអឺរ៉ុប និងប្រទេសកាន់លទ្ធិប្រជាធិបតេយ្យសំខាន់ៗផ្សេងៗទៀត។ ព្រះរាជាណាចក្រកម្ពុជា រីករាយជាមួយនឹងចំណងមិត្តភាពជាប្រពៃណី និងកិច្ចសហប្រតិបត្តិការដ៏ល្អប្រសើរជាមួយប្រទេសទាំងអស់នៅលើពិភពលោក។ នៅក្នុងស្មារតីនេះហើយ ដែលយើងបានអំពាវនាវមិនឲ្យមានការជ្រៀតជ្រែកកិច្ចការផ្ទៃក្នុង និងឲ្យមានការគោរពអធិបតេយ្យភាពរបស់កម្ពុជា ដើម្បីឲ្យកម្ពុជាអាចបន្តដំណើរលើមាគ៌ារបស់ខ្លួនឆ្ពោះទៅរកសាមគ្គីភាពជាតិ ការពង្រឹងថែមទៀតនូវលទ្ធិ ប្រជាធិបតេយ្យសេរីពហុបក្ស ការលើកកម្ពស់សិទ្ធិមនុស្ស និងនីតិរដ្ឋ ដើម្បីថែរក្សាសន្តិភាព ស្ថិរភាព ឯកភាពជាតិ និងសណ្តាប់ធ្នាប់សាធារណៈ៕
Source: Kampuchea Thmey Daily
0 Comments