ភ្នំពេញ ៖ បន្ទាប់ពីមានសេចក្ដីរាយការណ៍មកថា មានហេតុការណ៍ភ្លើងឆេះនោះ លោក សុខ ពេញវុធ អភិបាល នៃអភិបាលខណ្ឌដូនពេញ បានចុះបញ្ជាផ្ទាល់ភ្លាមៗនៅកន្លែងកើតហេតុ ជាមួយម៉ូតូទឹករបស់រដ្ឋបាលខណ្ឌ៣ ទៅ៤គ្រឿង ដើម្បីបាញ់ទឹកពន្លត់ភ្លើងទាន់សភាពការណ៍ កុំឲ្យរាលដាលកាន់តែធំដុំឡើងផងដែរ។
ជាក់ស្តែង នៅថ្ងៃអាទិត្យ ១៣កើត ខែមាឃ ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី១៧ ខែកុម្ភៈ ឆ្នាំ២០១៩ វេលាម៉ោង១១និង០០នាទីព្រឹក លោក សុខ ពេញវុធ អភិបាល នៃគណៈអភិបាល ខណ្ឌដូនពេញ បានដឹកនាំកម្លាំងគណៈបញ្ជាការឯកភាពខណ្ឌដូនពេញ ចុះអន្តរាគមន៍លើករណីអគ្គិភ័យមួយកន្លែង កើតឡើងក្នុងតំបន់អភិវឌ្ឍបឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថា មូលហេតុដែលឆេះនោះ អាចបណ្តាលមកពីមានអ្នកជក់បារី ហើយបានបោះកន្ទុយបារីចោល ប៉ះនឹងកម្ទេចស្មៅអាប់ៗ នៅទីនោះ ទើបកើតជាអណ្ដាតភ្លើងឆាបឆេះឡើង រាលដាលដល់ដើមត្រែងងាប់ៗ ដែលគេកាត់ចោលនៅទីនោះផង ក៏ឆេះឡើងបង្កជាការភ្ញាក់ផ្អើលឡើងតែម្ដង។
ប្រភពព័ត៌មានបានបន្តទៀតថា ក្នុងហេតុការណ៍ដែលឆេះនោះ ក៏ត្រូវបានកម្លាំងប្រជាការពារខណ្ឌដែលខណៈនោះ ឃើញវត្តមានលោកអភិបាលខណ្ឌដូនពេញ ក៏បានចុះមកបញ្ជាផ្ទាល់ផងដែរ ដែលត្រូវបានអន្តរាគមន៍ពន្លត់ដោយម៉ូតូទឹក របស់រដ្ឋបាលខណ្ឌដូនពេញចំនួន០៤គ្រឿង នាំគ្នាបាញ់ទឹកពន្លត់ភ្លើងរហូតរលត់ទាំងស្រុងទៅវិញ នៅម៉ោង១១និង៣០នាទី នាថ្ងៃដដែល ផងដែរ ដោយមិនចាំបាច់រំខានដល់កងអន្តរាគមន៍ឡានទឹករាជធានីភ្នំពេញឡើយ៕
Source: Kampuchea Thmey Daily
0 Comments