នាយករដ្ឋមន្ត្រីអង់គ្លេសលោកស្រី Theresa May បានត្រឡប់មកជួបមេដឹកនាំសហភាពអឺរ៉ុបនៅទីក្រុងប្រ៊ូសសែលវិញកាលពីថ្ងៃព្រហស្បតិ៍ ខណៈដែលលោកស្រីកំពុងស្វែងរកមធ្យោបាយមួយដើម្បីចៀសវាងការគ្មានកិច្ចព្រមព្រៀង Brexit ក្នុងរយៈពេល៥០ថ្ងៃ។
ការរំពឹងទុកសម្រាប់ការធ្វើដំណើរនេះ គឺមានកម្រិតតិចតួចណាស់កាលពីថ្ងៃពុធខណៈថ្នាក់ដឹកនាំសហភាពអឺរ៉ុបលោក Donald Tusk និងលោក Jean-Claude Juncker បានបំផ្លាញក្តីសង្ឃឹមរបស់លោកស្រី May នៃការឈ្នះលើការផ្លាស់ប្តូរកិច្ចព្រមព្រៀងដកខ្លួននេះ។
ប្រធានគណៈកម្មការអឺរ៉ុបលោក Juncker បានប្រាប់ក្រុមអ្នកយកព័ត៌មានថា លោកស្រី May បានដឹងនិងទទួលស្គាល់រួចទៅហើយថា សហភាពអឺរ៉ុបនឹងមិនបើកកិច្ចចរចានេះឡើងវិញទេ។
ហើយលោក Tusk ដែលតំណាងឲ្យរដ្ឋាភិបាលសមាជិកសហភាពអឺរ៉ុបក្នុងនាមជាប្រធានក្រុមប្រឹក្សាអឺរ៉ុបបានបង្កកំហឹងដោយសារការថ្កោលទោសអ្នកនយោបាយគាំទ្រ Brexit សម្រាប់ការបរាជ័យចំពោះផែនការនេះ។
លោក Juncker បាននិយាយបន្ទាប់ពីកិច្ចពិភាក្សាជាមួយនាយករដ្ឋមន្ត្រីប្រទេសអៀរឡង់លោក Leo Varadkar ថា “លោកស្រី May បានដឹងរួចទៅហើយថា គណៈកម្មាធិការនេះមិនបានត្រៀមខ្លួនសម្រាប់បើកបញ្ហានេះឡើងវិញទេ”។
យោងតាមចំណុចនៃកិច្ចពិភាក្សាដែលផ្តល់ដោយការិយាល័យ Downing Street មុនដំណើរទស្សនកិច្ចនេះបានបង្ហាញថា លោកស្រី May នឹងសារភាពថា “ការធានាឲ្យបាននូវការផ្លាស់ប្តូរបែបនេះនឹងមិនងាយស្រួលនោះទេ”។
ប៉ុន្តែលោកស្រីនឹងបន្ថែមថា “កាលពីសប្តាហ៍មុន សភាបានបញ្ជាក់យ៉ាងច្បាស់ជាលើកដំបូងថា ខ្លួនអាចគាំទ្រកិច្ចព្រមព្រៀងដកខ្លួននេះដែលអាចមានការប្រែប្រួលដល់ចំណុចបម្រុង”។
ការជាប់គាំងនៅទីក្រុងប្រ៊ូសសែលបាននាំឲ្យមានការព្រួយបារម្ភកាន់តែខ្លាំងឡើងថា ចក្រភពអង់គ្លេសអាចនឹងចាកចេញពីសហភាពអឺរ៉ុបដោយគ្មានកិច្ចព្រមព្រៀងនៅថ្ងៃទី២៩ខែមីនាដែលនឹងធ្វើឲ្យរំខានដល់ការធ្វើពាណិជ្ជកម្មនិងការផ្គត់ផ្គង់ដល់ការផលិត៕ AFP
Source: Kampuchea Thmey Daily
0 Comments