ភ្នំពេញ ៖ យុវជនម្នាក់ កើតទុក្ខ មិនសុខចិត្ត បានសម្រេចមកប្ដឹងប៉ូលិសមូលដ្ឋាន ឲ្យជួយស្រាវជ្រាវចាប់ជនដៃដល់ ដែលជាបុរសម្នាក់ទៀត រឿងដកកាំភ្លើងមកភ្ជង់ ហើយស្រែកសម្លុតថា “ហែងមើលមុខសង្សារអញ ចង់ញ៉ែសង្សារអញមែន? ហើយក៏ទះរូបគេ២កំផ្លៀង ព្រមទាំងដកកាំភ្លើងគំរាមបាញ់លើរូបគេ និងបក្ខពួកគេ រួចបើករថយន្តគេចបាត់ បង្កឲ្យមានការភ្ញាក់ផ្អើលឡើង នៅវេលាម៉ោង០៤និង១០នាទីទៀបភ្លឺ ឈានចូលថ្ងៃព្រហស្បតិ៍ ទី០៧ ខែកុម្ភៈ ឆ្នាំ២០១៩នេះ នៅចំណុចកន្លែងលក់ស្រាក្រឡុកមួយកន្លែង ក្រោយព្រះបរមរាជវាំង ផ្លូវលេខ២១៤ កែងផ្លូវលេខ១៩ ស្ថិតក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ។
យុវជន ដែលមកប្តឹងសមត្ថកិច្ចនោះ ឈ្មោះ រុណ ហុង ហៅញាញ អាយុ២២ឆ្នាំ មុខរបរចុងភៅ នៅសណ្ឋាគារមួយកន្លែង ស្នាក់នៅបន្ទប់ផ្ទះជួល ផ្លូវ១៤៤ សង្កាត់ផ្សារកណ្ដាល ខណ្ឌដូនពេញ ភ្នំពេញ។ ចំណែកយុវជនម្នាក់ទៀត ជាមិត្តភ័ក្ដិ មិនត្រូវបានស្គាល់អត្តសញ្ញាណនោះទេ។
បើតាមសម្ដីយុវជនរងគ្រោះ បានរៀបរាប់ប្រាប់សមត្ថកិច្ចថា នៅមុនពេលកើតហេតុ រូបគេបានមកហូបអីជាមួយមិត្តភ័ក្ដិ៣នាក់ទៀត នៅម្ដុំក្រោយព្រះបរមរាជវាំង ដោយបានជជែកគ្នាអំពីបាល់ទាត់ យ៉ាងសប្បាយ ក្អាកក្អាយ លុះពេលផឹកអស់៣ថូ យុវជនរងគ្រោះ បានលូកដៃយកទូរស័ព្ទពីមិត្តភ័ក្ដិតែជ្រុលប៉ះថូដាក់ស្រា បណ្ដាលឲ្យធ្លាក់បែកថូអស់១ ទើបភ្ញាក់ផ្អើលដល់អ្នកអង្គុយផឹកជិតនោះ ងាកមើលផងដែរ តែរូបគេក៏បានទទួលខុសត្រូវ និងព្រមចេញសំណងលើការខូចខាតនោះដែរ ដោយខាងអ្នកគិតលុយប្រាប់ថា ថូស្រានោះ តម្លៃតែ៥ដុល្លារ ប៉ុណ្ណោះ ទើបយុវជនរងគ្រោះក៏ព្រមសងថ្លៃខូចខាតនោះគ្រប់ចំនួនផងដែរ។
យុវជនរងគ្រោះបន្តថា បន្ទាប់មក រូបគេក៏បានហៅស្រា១ថូទៀត ផឹក ជជែកគ្នាបន្តទៀត ខណៈដែលការប្រកួតបាល់ទាត់កំពុងល្អមើល ពួកគេក៏បាននិយាយថា បាល់នឹងចាំមើលខ្លាស៊ីគោហើយ ហើយក៏ស្រែកសប្បាយ ក្អាកក្អាយ បន្តទៀត ដោយមិនបានចាប់អារម្មណ៍នឹងអ្នកអង្គុយជិតគ្នានោះទេ រហូតមកដល់មុនពេលកើតហេតុបន្តិច ខ្លួនក៏បានប្រាប់ឲ្យគេមកគិតលុយ ក៏នាំគ្នាត្រឡប់ទៅផ្ទះមុនជាមួយមិត្តភ័ក្ដិម្នាក់ទៀត ខណៈពេលកំពុងអូសម៉ូតូចេញ ស្រាប់តែមានបុរសម្នាក់ ដើរចេញពីកន្លែងផឹកស៊ីនោះដែរ រួចដើរយ៉ាងលឿនទៅយកកាំភ្លើងខ្លីមួយដើម (មិនស្គាល់ម៉ាក ) ពីក្នុងរថយន្ត TOYOTA PRIUS ពណ៌ស មួយគ្រឿង (មិនចាំស្លាកលេខ ) ហើយសៀតចង្កេះ ដើរត្រឡប់មករកពួកគេទាំង២នាក់ រួចស្រែកសម្លុតថា “ហែងមើលមុខសង្សារអញ ចង់ញ៉ែសង្សារអញមែន” ហើយខ្លួនក៏តបទៅវិញថា អត់ទេបង “ខ្ញុំមិនបានដឹងផង ” ស្រាប់តែបុរសម្នាក់នោះ ទះរូបខ្លួនចំនួន២កំផ្លៀង ហើយខ្លួន លើកដៃរង ហើយគ្រវី ដៃចុះឡើងៗ កុំឲ្យវាយទៀត ហើយបុរសម្នាក់ នោះ បានយកកាំភ្លើងខ្លីដែលកំពុងកាន់ជាប់ដៃម្ខាងទៀតនោះ អាមេ រួចបម្រុងវាយទៅលើមិត្តភ័ក្ដិរបស់ខ្លួន(ជនរងគ្រោះ) ទើបមិត្តភ័ក្ដិរបស់ខ្លួន លើកដៃរង ហើយគ្រវី ដៃចុះឡើងៗដែរ ទើបបុរសម្នាក់នោះ យកដៃមកវាយមិត្តភ័ក្ដិរបស់ខ្លួន២ដៃចំក្បាលពីក្រោយ ចង់ផ្កាប់មុខ។ ភ្លាមៗនោះ ពួកគេទាំង២នាក់ ដឹងកាលៈទេសៈទាន់ ក៏បានលើកដៃសំពះសុំទោស ហើយនិយាយថា “បងអើយខ្ញុំ អត់មានបានមើលមុខ ឬញ៉ែសង្សារបងទេ ” ហើយក៏ឡើងម៉ូតូ ជិះឌុបគ្នាចេញទៅ ហើយបុរសនោះ ក៏ទះ ២ដៃចំក្បាលពីក្រោយទៀត រួចកាន់កាំភ្លើងដើរត្រឡប់ទៅបើករថយន្ត ចេញទៅបាត់តែម្ដង។
យុវជនរងគ្រោះ បន្តថា ដោយសារតែរូបគេមិនដឹងអ្វីសោះ បែរជាមកចោទថា រកញ៉ែសង្សាររបស់គាត់ ទាំងរូបគេមិនដឹងថា សង្សារគាត់នោះ មុខយ៉ាងម៉េចផង ព្រោះរវល់តែមើលបាល់ទាត់សោះ ក៏ស្រាប់តែបុរសនោះ មកប្រើហិង្សាលើពួកគេ ហើយដកកាំភ្លើងមកភ្ជង់ពួកគេទៀត ដូចជាប្រមាថជីវិតពួកគេពេកហើយ ទើបគេកើតទុក្ខមិនសុខចិត្ត ជិះម៉ូតូមកប៉ុស្តិ៍នគរបាលជ័យជំនះ រៀបរាប់ប្រាប់ លោកពូ មេប៉ុស្តិ៍ ឲ្យបានដឹង ហើយដាក់ពាក្យប្ដឹងតែម្ដង។
បច្ចុប្បន្ន ក្រោយពីកើតហេតុ យុវជនរងគ្រោះ បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលជ័យជំនះ នៃអធិការដ្ឋាននគរបាលខណ្ឌដូនពេញ ដើម្បីឲ្យជួយស្រាវជ្រាវ តាមចាប់បុរសដៃដល់នោះ ដោយមិនដឹងថា ជាមន្ត្រីរាជការ ឬមានតួនាទីអ្វីនោះទេ បានជាមានប្រើប្រាស់កាំភ្លើងសំញែង ឡើង ក ពើងទ្រូង ហើយយកមកភ្ជង់គំរាមកំហែង ប្រជាពលរដ្ឋ នៅតាមទីសាធារណៈបែបនេះនោះទេ៕
Source: Kampuchea Thmey Daily
0 Comments