ធន់ ចាន់តាក់ អ្នកប្រដាល់សមាគមកីឡាក្រសួងការពារជាតិ បានវាយចាញ់អ្នកប្រដាល់ថៃ ចាក់រ៉ូត ភេត (Chakrout Phat) ក្នុងការជួបប្រកួតគ្នាទម្ងន់៦៣,៥ ០០ គ.ក្រ នៅលើសង្វៀនBoostrong Fighter On Fire របស់SEATV កាលពីថ្ងៃអាទិត្យទី១០កុម្ភៈ ២០១៩ ។
ចាន់តាក់ ដែលជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់នោះ បានវាយចាញ់ចាក់រ៉ូត ភេត នៅពីរទឹកចុងក្រោយ។ ក្នុងទឹកទី៤ ធន់ ចាន់តាក់ ត្រូវអាជ្ញាកណ្ដាលរាប់៨ បន្ទាប់ពីត្រូវកណ្តាប់ដៃរបស់ចាក់រ៉ូត ភេត នោះ ហើយនៅទឹកទី៥ ចាន់តាក់ ក៏ចាញ់ប្រៀបថៃដែរ ដូចច្នេះហើយទើបចប់ការប្រកួត ធន ចាន់តាក់ ចាញ់ថៃចាក់រ៉ូត ភេត ដោយពិន្ទុ ។
ចាក់រ៉ូត ភេត ជាជើងខ្លាំងដែលមានស្នៀតទាត់ និងកណ្តាប់ដៃល្អ ។ដូចនេះហើយ ធន់ ចាន់តាក់ប្រកួតលើកនេះ គេជួបការលំបាកច្រើន ព្រោះអ្នកប្រដាល់ថៃរូបនេះ មានស្នៀតប្រដាល់ល្អនិងខ្លាំង ។ អ្នកប្រដាល់ថៃរូបនេះ មានប្រវត្តិប្រកួតចំនួន៥៣លើក ឈ្នះ៤៣លើកចាញ់០៩លើកនិង ស្មើ០១លើក ។
ចំពោះការប្រកួតមិត្តភាពរវាងខ្មែរនិងខ្មែរវិញ សួង សុវណ្ណថា អ្នកប្រដាល់ក្លិបបូរីរាជសីហ៍មានរិទ្ធ ដែលឡើងសងសឹកជាមួយថន ភឿត អ្នកប្រដាល់ក្លិបឃ្លាំងមឿងកីឡាខេត្តពោធិសាត់នោះ បានសន្លប់ខ្លួនឯងនៅក្នុងទឹកទី២ ដោយជង្គង់របស់ថន ភឿត ។
ប៉ុន្តែយ៉ាងណា សួង សុវណ្ណថា គេជាអ្នកទទួលបានជ័យជំនះ ព្រោះថន ភឿត ត្រូវទទួលពិន័យដែលវាយខុសលក្ខណៈបច្ចេកទេស ដោយវាយបំពានថែមទៅលើសុវណ្ណថា ពេលដែលអាជ្ញាកណ្តាលស្រែកឃាត់អោយឈប់វាយហើយនោះ ។
គួរបញ្ជាក់ថា សួង សុវណ្ណថា បានវាយចាញ់ថន ភឿត ដោយពិន្ទុចំនួន២លើកមកហើយ កាលពីក្នុងឆ្នាំ២០១៧កន្លងមក តែការចាញ់របស់គេនេះ ធ្វើអោយគេមិនអស់ចិត្តនោះឡើយ ។ យ៉ាងណា សួង សុវណ្ណថា បើពុំមានឧប្បតិហេតុកើតឡើងនោះទេ ប្រហែលជានៅតែយ៉ាប់ជាមួយថន ភឿត ដដែលហ្នឹង ត្បិតអ្នកប្រដាល់ថនភឿតនេះ គេល្អនិងខ្លាំង ហើយមួយទៀត សុវណ្ណថាឥឡូវគេក៏វាយធ្លាក់ដែរ។
សល់ ពិសិដ្ឋ អ្នកប្រដាល់ក្លិបកុសលកីឡា បានប្រកួតចាញ់ពិន្ទុណាក់ សុខា អ្នកប្រដាល់ក្លិបយុវវាលស្បូវខណ្ឌច្បារអំពៅ ហើយឆោម ប៊ុនឡុង អ្នកប្រដាល់ក្លិបអាណាចក្រគុនខ្មែរ បានផ្តួល ម៉ន ចិន្តា អ្នកប្រដាល់ក្លិបការិយាល័យ កងទ័ពជើងគោក ក្នុងទឹកទី២៕
ជម្រុះខ្សែក្រវាត់Wurkz ជុំទី២ : ហេង វាសនា ជួប Yorth Katang You ឯ ចាន់ សំអាត ជួប Chhav Vallit
ការប្រកួតជម្រុះដណ្តើមខ្សែក្រវាត់ជើងឯកWurkz ទម្ងន់៦០គីឡូក្រាម នៅសង្វៀនទូរទស្សន៍SEATV កាលពីថ្ងៃអាទិត្យទី១០កុម្ភះ ដែលជាការប្រកួតជម្រុះសប្តាហ៍ទី៤ ជុំទី២ រវាងអ្នកប្រដាល់កម្ពុជា ហេង វាសនា ក្លិបព្រៃទទឹង ខេត្តបាត់ដំបង និងអ្នកប្រដាល់ថៃ Yorth Katang You ហើយអ្នកប្រដាល់កម្ពុជាចាន់ សំអាត ក្លិបអប់រំកាយកីឡាស្រុកអន្លង់វែង និងអ្នកប្រដាល់ថៃ Chhav Vallit ។
សម្រាប់លទ្ធផលនៃជំនួបរវាងហេង វាសនា និង Yorth Katang You នេះ គឺវាសនាឈ្នះ Katang You ដោយពិន្ទុដាច់តែម្តង ។ ជាមួយនឹងជ័យជម្នះនេះ ហេង វាសនា បាន៤ ពិន្ទុ ហើយអ្នកប្រដាល់ថៃ Yorth Katang You ឆ្លងកាត់ពីរប្រកួតដូចគ្នា គេក៏បាន៤ពិន្ទុដែរ គឺឈ្នះ១ចាញ់១ប្រកួតដូចគ្នា ។
ចំពោះការជួបគ្នារវាង ចាន់ សំអាត ក្លិបអប់រំកាយកីឡាស្រុកអន្លង់វែង និង Chhav Vallit វិញ ចសំអាតត្រូវដកចេញពីការប្រកួតដោយសារមានរបួសធ្ងន់ធ្ងរ ហើយដូរដាក់ឲ្យសារឿន ច័ន្ទ ប្រកួតជំនួសវិញ ។
សម្រាប់ការប្រកួតនេះ សារឿន ច័ន្ទ គេវាយបានយ៉ាងល្អ ដោយវាយអ្នកប្រដាល់ថៃ Chhav Vallit អោយបោះបង់ចោលការប្រកួតក្នុងទឹកទី៣ប៉ុណ្ណោះ៕
Source: Kampuchea Thmey Daily
0 Comments