ក្រោយប្រកួតចាញ់ក្រុម Hanoi FC ដោយលទ្ធផល ១០ទល់០ កាលពីចុងខែកុម្ភៈ កន្លងក្នុងវគ្គជម្រុះពូលF នៃពានរង្វាន់លំដាប់ទី២ ប្រចាំទ្វីបអាស៊ី AFC Cup 2019 នៅល្ងាចថ្ងៃអង្គារ ទី១២ ខែមីនា ឆ្នាំ២០១៩ នេះក្រុមណាហ្គាវើល របស់កម្ពុជា នឹងបន្តប្រកួតវគ្គជម្រុះតាមពូលជាបន្តទៀត ដោយត្រូវទទួលក្រុម Yangon United របស់មីយ៉ាន់ម៉ា ម្តងនៅរាជធានីភ្នំពេញ។
យោងតាមការបញ្ជាក់របស់សហព័ន្ធកីឡាបាល់ទាត់ទ្វីបអាស៊ី (AFC) នៅក្នុងប្រកួតលើកទី២ប្រចាំពូលF នេះត្រូវដឹកនាំដោយលោកអាជ្ញាកណ្ដាលជនជាតិប៉ាឡេស្ទីន Baraa Aisha ខណៈការប្រកួតត្រូវធ្វើឡើងនៅវេលាម៉ោង៦:៣០នាទីល្ងាចថ្ងៃទី១២ ខែមីនា ឆ្នាំ២០១៩ លើទីលានពហុកីឡដ្ឋានជាតិ ព្រមទាំងមានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ។ លោក Barra Aisha ត្រូវបាន AFC កោះហៅឱ្យដឹកនាំប្រកួតសំខាន់ៗមួយចំនួននៅក្នុងទ្វីបអាស៊ីត្រឹមឆ្នាំ២០១៨ ថ្មីៗនេះទាំងក្នុងពានរង្វាន់ AFC Cup, AFC Champion League និងពានរង្វាន់ AFC Asian Games ជាដើម។
ក្រុម Yangon United ដឹកនាំដោយលោកMyo Min Tun ដែលជាគ្រូបង្វឹកបាននាំយកសមាជិកតែ១៨នាក់ប៉ុណ្ណោះ មកប្រកួតនៅរាជធានីភ្នំពេញ ខណៈកីឡាករមួយចំនួន៥រូបគឺKyaw Zin Htet, Pyae Phyo Zaw, Min Kyaw Khant, Maung Maung Lwin និង Nyein Chan Aung ជាប់ឈ្នះក្នុងក្រុមជម្រើសជាតិមីយ៉ាន់ម៉ា ត្រៀមប្រកួតមិត្តភាពអន្តរជាតិជាមួយក្រុមជម្រើសជាតិឥណ្ឌូណេស៊ី និងតៃវ៉ាន់ នៅចុងខែមីនា នេះ។
ចំណែកក្រុមណាហ្គាវើល របស់លោក មាស ចាន់ណា វិញគឺត្រូវការស្តារកិត្តិយសឡើងវិញក្រោយបរាជ័យយ៉ាងចាស់ដៃនៅរដ្ឋធានីហាណូយ ខណៈកីឡាករទាំងអស់សុទ្ធតែបានប្រមូលផ្តុំនិងហ្វឹកហាត់រួមគ្នាបានមួយរយៈមកហើយ។ ៣ពិន្ទុក្នុងប្រកួតនេះគឺចាំបាច់ណាស់សម្រាប់ណាហ្គាវើល ដែលតំណាងឲ្យកម្ពុជា ដើម្បីស្រវាកៅអីឡើងទៅវគ្គបន្ត។
ក្នុងនាមជាម្ចាស់ជើងឯកនៃពានរង្វាន់លីគកំពូលកម្ពុជា (Metfone Cambodian League 2018) ក្លិបណាហ្គាវើល បានចាប់ឆ្នោតស្ថិតនៅពូល F ជាមួយក្រុមខ្លាំងដល់ទៅ៣ពីតំបន់អាស៊ានផ្សេងទៀត ដោយក្នុងនោះមានក្រុម Hanoi FC (ម្ចាស់ជើងឯកលីគកំពូលវៀតណាម) Tampines Rovers (ជើងឯករងលីគកំពូលសិង្ហបុរី) និង Yangon United (ជើងឯកលីគកំពូលមីយ៉ាន់ម៉ា)។ សម្រាប់តំណាងចំណាត់ថ្នាក់បណ្តោះអាសន្នក្រោយប្រកួតបានម្នាក់១លើកមកឃើងថាក្រុម Hanoi FC ឈរលេខ១ មាន៣ពិន្ទុដូចគ្នានឹងក្រុមលេខ២ Tampines Rover ហើយក្រុម Yangon United ឈរលេខ៣និងណាហ្គាវើល ឈរលេខ៤មិនទាន់មានពិន្ទុកាន់ដូចគ្នា។ ពានរង្វាន់ AFC Cup វគ្គជម្រុះតាមពូលនឹងចាប់ផ្ដើមនៅចុងខែ កុម្ភៈ តទៅតាមរូបមន្តវិលជុំសន្សំពិន្ទុ សរុបស្មើ៦ប្រកួត (ក្នុងដីនិងក្រៅដី) ដើម្បីយកតែមួយក្រុមឡើងទៅវគ្គបន្ត ដោយគ្រោងនឹងបញ្ចប់ការប្រកួតទាំងមូលនៅដើមខែតុលា ឆ្នាំ២០១៩។
នេះជាឆ្នាំទី១ សម្រាប់ណាហ្គាវើល ក្នុងការប្រកួតនៅវគ្គបែងចែកពូលបន្ទាប់ពីបានក្លាយជាម្ចាស់ជើងឯកលីគកំពូលកម្ពុជា ឆ្នាំ២០១៨ ខណៈកាលពីឆ្នាំ២០១៧ ធ្លាប់បានចូលរួមប្រកួតម្តងតែត្រូវប្រកួតជម្រុះនៅវគ្គជម្រុះបឋម។ សូមរំលឹកថា សម្រាប់ឆ្នាំ ២០១៨ក្នុងពានរង្វាន់ AFC Cup ជើងឯកបានទៅក្លិប Al-Quwa Al-Jawiya របស់អ៊ីរ៉ាក់ក្រោយឈ្នះក្លិប Altyn Asyr របស់ទួរមេនីស្ថាន ក្នុងលទ្ធផល ២-០ នាវគ្គផ្ដាច់ព្រ័ត្រលើទីលានកីឡដ្ឋានBasra Sports City ក្នុងទីក្រុង Basraក្រោមក្រសែភ្នែកទស្សនិកជនប្រមាណជាង២ម៉ឺននាក់ កាលពីចុងខែតុលាកន្លងទៅថ្មីៗនេះ៕
Source: Kampuchea Thmey Daily
0 Comments