ភ្នំពេញ ៖ អ្នកជំនាញមកពីប្រទេសជប៉ុន បានបង្ហាញពីវិធីសាស្ដ្រអប់រំបែបជប៉ុនមួយចំនួនដល់ឪពុកម្តាយ និងអាណព្យាបាលកុមារកម្ពុជាដើម្បីឲ្យពួកគេអប់រំបន្តដល់កូនចៅឲ្យក្លាយជាពលរដ្ឋសកលនិងជាទំពាំងស្នងឬស្សីសម្រាប់ប្រទេសជាតិទៅថ្ងៃអនាគត។
ថ្លែងនៅក្នុងសិក្ខាសាលាស្ដីពីគុណភាពជីវិតកុមារ ក្រោមប្រធានបទ«អប់រំកុមារឱ្យក្លាយជាពលរដ្ឋសកល»ដែល រៀបចំឡើងដោយវិទ្យុផ្កាឈូកនៅមជ្ឈមណ្ឌលសហប្រតិបត្តិការកម្ពុជាជប៉ុន លោក តិស្យូ ហាតាយូឆិ (Testuo Hatta Youji)អ្នកជំនាញអប់រំមកពីប្រទេសជប៉ុនបានធ្វើការណែនាំដល់អាណាព្យាបាលឪពុកម្តាយកុមារកម្ពុជាទាំងអស់អប់រំចំណេះដឹងនិងសុខភាពតាមរយៈការអានសៀវភៅទាក់ទងនឹងការអប់រំឬរឿងនិទានផ្សេងៗដល់កុមារតាំងពីតូចរហូតដល់អាយុ៥ឆ្នាំដើម្បីពង្រឹងខួរក្បាលនិងការចងចាំរបស់កុមារព្រមទាំងដឹកនាំកុមារដើរឲ្យបាន៣ម៉ឺនជំហានក្នុង១ថ្ងៃដើម្បីឲ្យកុមារមានរាងកាយមាំមួនមានសុខភាពល្អនិងជៀសផុតពីការឆ្លងជំងឺតម្កាត់ផ្សេងៗ។
លោក តិស្យូ ហាតាយូឆិ បានមានប្រសាសន៍ថា ជាងនេះទៅទៀតកុមារត្រូវអានសៀវភៅឲ្យបាន២ពាន់ក្បាលដល់កុមារអាយុក្រោម១២ឆ្នាំដើម្បីពង្រឹងការចងចាំនិងឲ្យខួរក្បាលកុមារមានភាពរហ័សរហួននិងឆ្លាតវ័យពិសេស មិនត្រូវឲ្យកុមារក្រោមអាយុ១២ឆ្នាំប្រើប្រាស់ទូរស័ព្ទដៃឡើយព្រោះអាចបណ្តាលឲ្យកុមារក្លាយជាក្មេងឯកោ មានចរិតឆាប់ខឹងនិងមិនសូវមានទំនាក់ទំនងនៅក្នុងសង្គម។
ការអញ្ជើញអ្នកជំនាញអប់រំមកពីប្រទេសជប៉ុននេះគឺដើម្បីបង្កើនការយល់ដឹងអំពីវិធីសាស្ដ្រក្នុងការអប់រំនិងរៀបចំអនាគតកុមារតូចៗដល់អាណាព្យាបាលមួយចំនួននេះ ព្រោះថាបច្ចុប្បន្នមានអាណាព្យាបាលខ្លះនៅមិនទាន់ចេះពីរបៀបថែទាំនិងការអប់រំកូនចៅឲ្យបានល្អប្រសើរនៅឡើយទេ។ចំណែកគ្រួសារខ្លះទៀតដោយ សារតែជាប់រវល់នឹងកិច្ចការរកស៊ីមិនសូវមានពេលវេលាគ្រប់គ្រាន់សម្រាប់អប់រំប្រៀនប្រដៅដល់កូនចៅរបស់ខ្លួនធ្វើឲ្យពួកគេក្លាយជាក្មេងមិនល្អនៅក្នុងសង្គមផងដែរ។
លោកស្រី យូកុ អ៊ុយយ៉ាម៉ា នាយិកាសាលាមតេ្តយ្យ យូស៊ីណូ អ៊ីណូម៉ាយនៃប្រទេសជប៉ុនបានមានប្រសាសន៍ថាដើម្បីអប់រំកុមារឱ្យក្លាយជាពលរដ្ឋសកល គឺត្រូវរួមគ្នាខិតខំប្រឹងប្រែងអប់រំកូនៗកុមារតូចៗតាំងពីក្មេងទាំងនៅផ្ទះនិងនៅតាមសាលាមតេ្តយ្យដើម្បីឲ្យកុមារទទួលបាននូវការអប់រំល្អនិងក្លាយជាទ្រព្យសម្បត្តិមហាសាល។
លោកស្រីបានបន្តថា«ក្មេងៗទាំងអស់នៅប្រទេសកម្ពុជា ជាទ្រព្យសម្បត្តិមហាសាលរបស់ប្រទេសកម្ពុជា ចំណែកឯកុមារៗនៅប្រទេសជប៉ុនក៏ជាទ្រព្យសម្បត្តិមហាសាលរបស់ប្រទេសជប៉ុនផងដែរ។ ដូច្នេះយើងទាំងអស់គ្នាចាំបាច់ត្រូវតែធ្វើការអប់រំដល់កុមារនៅក្នុងប្រទេសនីមួយៗ ដើម្បីទទួលបាននូវអនាគតនៃប្រទេសជាតិរបស់យើងផងដែរ»។
លោក រស់សុវាចា អ្នកនាំពាក្យក្រសួងអប់រំយុវជននិងកីឡាបានឲ្យដឹងថាប្រទេសកម្ពុជាមានវប្បធម៌និងប្រពៃ ណីសម្រាប់ការអប់រំដល់កូនចៅរបស់ខ្លួនឲ្យក្លាយជាកូនល្អសិស្សល្អនិងមិត្តល្អនៅក្នុងសង្គមនិងជាទំពាំងស្នងឫស្សីដ៏រឹងមាំដើម្បីធ្វើឲ្យប្រទេសជាតិកាន់តែរីកចម្រើនថែមទៀតទៅថ្ងៃអនាគត។
ទន្ទឹមនឹងនេះលោកបានបន្តថាក្រសួងក៏បានលើកកម្ពស់ការអាននៅកម្រិតបឋមសិក្សារហូតដល់គ្រប់កម្រិតពិសេសបានបង្កើតទិវាជាតិអំណានដើម្បីឲ្យសិស្សានុសិស្សមានទម្លាប់ការអានឲ្យបានច្រើនដើម្បីបង្កើនចំណេះដឹងនិងជំរុញឲ្យលោកគ្រូអ្នកគ្រូបង្កើនការអប់រំពីសីលធម៌និងសុជីវធម៌ដល់សិស្សានុសិស្សតាមថ្នាក់ឲ្យក្លាយជាមនុស្សល្អនៅក្នុងសង្គម។
សូមបញ្ជាក់ផងដែរថានេះគឺជាលើកទី២៥ហើយដែល វិទ្យុផ្កាឈូកបានសហការជាមួយដៃគូពាក់ព័ន្ធ រួមមានមូលនិធិអៀង គណៈកម្មាធិការប្រយុទ្ធប្រឆាំងផលិតផលក្លែងក្លាយ សមាគមពាណិជ្ជកម្ម និងវិនិយោគកម្ពុជាជប៉ុន(CJBI) និងដៃគូពាក់ព័ន្ធ បានរៀបចំសិក្ខាសាលានិងវេទិកាជជែកពិភាក្សាជារៀងរាល់ខែ៕
Source: Kampuchea Thmey Daily
0 Comments