ភ្នំពេញ ៖ យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា ឆ្នាំ២០១៨កន្លងទៅនេះ ក្រសួងបានចេញសៀវភៅការងារជនបរទេសថ្មី និងចុះទិដ្ឋាការចូលដល់ជនបរទេសចំនួន៩៣៣៨៧នាក់កើនឡើងជាងឆ្នាំ២០១៧កន្លងទៅ ដែលបានផ្តល់ប្រមាណតែ៥៦៩៧៥នាក់ប៉ុណ្ណោះ. ប៉ុន្តែបើគិតពីឆ្នាំ២០១៤ដល់ឆ្នាំ២០១៨ក្រសួងបានផ្តល់សរុបចំនួន១៩៩៣៩៣នាក់ក្នុងនោះឆ្នាំ២០១៦ផ្តល់១៥៦០១នាក់ ឆ្នាំ២០១៥ផ្តល់២២៩២៧នាក់ និងឆ្នាំ២០១៤ផ្តល់១០៥០៣នាក់។
ទន្ទឹមនឹងនេះឆ្នាំ២០១៨នេះដែរ ក្រសួងក៏បានពន្យារសុពលភាពលើប័ណ្ណនិងសៀវភៅការងារជនបរទេសចំនួន៤១៨១៤នាក់ ខណៈឆ្នាំ២០១៧កន្លងទៅក្រសួងមិនបានពន្យារដល់ជនបរទេសណាមួយនោះទេ។
របាយការណ៍ដដែលបានឲ្យដឹងថា ចាប់ពីឆ្នាំ២០១៤ដល់ឆ្នាំ២០១៨ក្រសួង បានចុះអធិការកិច្ចហត្ថកម្មជនបរទេសបានចំនួន១២៩៦០សហគ្រាសគ្រឹះស្ថាននិងពិនិត្យឃើញមានជនបរទេសសរុប៩៧៩៧៥នាក់ ក្នុងនោះ៩២,៧ភាគរយមានប័ណ្ណការងារនិងសៀវភៅការងារជនបរទេស។ក្នុងនោះនៅឆ្នាំ២០១៤មានចំនួន១៦០៤រោងចក្រមានជនបរទេសចំនួន១២០៧៤នាក់ហើយអ្នកដែលមានប័ណ្ណនិងសៀវភៅការងារចំនួន៩២៨៨នាក់និងអ្នកដែលមិនមានចំនួន៣១៧៦នាក់។ ឆ្នាំ២០១៥មានចំនួន២៦៦៥រោងចក្រមានជនបរទេសចំនួន១៨៧៩២នាក់ហើយអ្នកដែលមានប័ណ្ណនិងសៀវភៅការងារចំនួន១៦៨០៣និងអ្នកដែលមិនមានចំនួន១៩៨៩នាក់។
ឆ្នាំ២០១៦មានចំនួន៣៣៣៦រោងចក្រមានជនបរទេសចំនួន២៤៤១៤នាក់ហើយអ្នកដែលមានប័ណ្ណនិងសៀវភៅការងារចំនួន២៣២១១នាក់និងអ្នកដែលមិនមានចំនួន១៦០៩នាក់។ ឆ្នាំ២០១៧មាន៣៥៣៩រោងចក្រមានជនបរទេសចំនួន៣០៤៥៣នាក់ហើយអ្នកដែលមានប័ណ្ណនិងសៀវភៅការងារចំនួន២៩៤២២នាក់និងអ្នកដែលមិនមានចំនួន១០៣១នាក់និងឆ្នាំ២០១៨មាន១៨១៦រោងចក្រមានជនបរទេសចំនួន១៨១៦នាក់ហើយអ្នកដែលមានប័ណ្ណនិងសៀវភៅការងារចំនួន១២០៨៨នាក់និងអ្នកដែលមិនមាន១៥៤នាក់។
ជាមួយគ្នានេះដែរក្រសួងបានចេញសៀវភៅការងារជនបរទេសថ្មីនិងចុះទិដ្ឋាការជួនដល់ជនបរទេសសរុបចំនួន១៩៩៣៩៣នាក់និងបានពន្យាសុពលភាពលើប័ណ្ណនិងសៀវភៅការងារជនបរទេសចំនួន៨៤៧៣១នាក់ដោយប្រមូលចំណូលមិនមែនសារព់ពន្ធតាមរយៈការប្រមូលអាករជនបរទេសបានថវិកាប្រមាណ១៣៨៩៦៩លានរៀល។
លោក បណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈបានប្រកាសដាក់ចេញទិសដៅចំនួន២៤ចំណុចដើម្បីឱ្យមន្ត្រីរាជការក្រោមឱវាទក្រសួងបន្តខិតខំប្រឹងប្រែងអនុវត្តនិងបំពេញភារកិច្ចការងាររបស់ខ្លួនឲ្យទទួលបានលទ្ធផលល្អប្រសើរសម្រាប់ឆ្នាំ២០១៩នេះ។
លោករដ្ឋមន្ត្រីបានបន្តថា ក្នុងចំណោមទិសដៅ២៤ចំណុចនោះក្នុងនោះរួមមានការពង្រឹងសមត្ថភាពមន្ត្រី និងអង្គភាពក្នុងការផ្តល់សេវាសាធារណៈនានា ប្រកបដោយភាពទន់ភ្លន់ ក្រមសីលធម៌វិជ្ជាជីវៈ និងទាន់ពេលវេលាជូនប្រជាពលរដ្ឋ ជាពិសេសកម្មករនិយោជិត ស្របតាមគោលការណ៍វិមជ្ឈការ និងវិសហមជ្ឈការ។
ពង្រឹងគុណភាព និងប្រសិទ្ធភាពអធិការកិច្ចការងារ ដោយដាក់ឱ្យប្រើប្រាស់របាយការណ៍អធិការកិច្ចការងាររួម លើប្រព័ន្ធទិន្នន័យស្វ័យប្រវត្តិកម្មដែលអាចធ្វើការសំយោគ និងវាយតម្លៃលក្ខខណ្ឌការងារដោយស្វ័យប្រវត្តិនិងកែសម្រួលវិធីសាស្ត្រចុះធ្វើអធិការកិច្ចការងារ ដោយផ្អែកលើកម្រិតហានិភ័យរបស់សហគ្រាស គ្រឹះស្ថាន និងកំណត់ការធ្វើអធិការកិច្ចការងារលើសហគ្រាស គ្រឹះស្ថាននាំចេញចំនួន ១លើកក្នុង១ឆ្នាំជាដើម៕
Source: Kampuchea Thmey Daily
0 Comments