ភ្នំពេញ ៖ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានលើកឡើងថា គោលនយោបាយជាតិស្ដីពីមុខរបរ និងការងារឆ្នាំ២០១៥-២០២៥ កាន់តែមានភាពសំខាន់ ជាពិសេសការត្រៀមចាប់យកនូវការវិវត្តន៍ថ្មីៗដើម្បីឆ្លើយតបទៅនឹងសភាពការណ៍របស់កម្ពុជា និងពិភពលោកក្នុងការបង្កើននូវល្បឿនរីកចម្រើននៃសេដ្ឋកិច្ចកម្ពុជាបន្ថែមទៀត។
លោកបណ្ឌិតអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការអន្តរក្រសួងបានលើកឡើងបែបនេះនៅក្នុងឱកាសអញ្ជើញ ដឹកនាំកិច្ចប្រជុំគណៈកម្មការអន្តរក្រសួងដើម្បីពិនិត្យនិងអនុម័តលើរបាយការណ៍វឌ្ឍនភាពឆ្នាំ២០១៧ នៃការអនុវត្តគោលនយោបាយជាតិស្ដីពីមុខរបរ និងការងារឆ្នាំ២០១៥-២០២៥កាលពីព្រឹកថ្ងៃទី១១ ខែមីនា ឆ្នាំ២០១៩នៅសណ្ឋាគារ Great Duke។
កិច្ចប្រជុំលើកទី៣ របស់គណៈកម្មការអន្តរក្រសួងសម្រាប់ដឹកនាំ ត្រួតពិនិត្យ និងវាយតម្លៃលើការអនុវត្តគោលនយោបាយជាតិស្ដីពីមុខរបរ និងការងារឆ្នាំ២០១៥-២០២៥នេះ ក៏មានការចូលរួមពីសមាជិកគណៈកម្មការអន្តរក្រសួងសមាជិកអនុគណៈកម្មការអន្តរក្រសួងនិងតំណាងគណៈកម្មការរាជធានី ខេត្ត នានា ។
សេចក្ដីព្រាងរបាយការណ៍វឌ្ឍនភាពសម្រាប់ឆ្នាំ២០១៧ នៃការអនុវត្តគោលនយោបាយជាតិស្ដីពីមុខរបរ និងការងារឆ្នាំ២០១៥-២០២៥ នេះត្រូវបានគណៈកម្មការពិនិត្យ កែសម្រួល និងអនុម័ត ហើយនឹងធ្វើការបោះពុម្ពផ្សព្វផ្សាយ។
នៅក្នុងកិច្ចប្រជុំនោះលោកបណ្ឌិតរដ្ឋមន្ត្រីបានបញ្ជាក់ថា «ក្នុងបរិបទនៃការប្រកួតប្រជែងទាំងថ្នាក់តំបន់ និងពិភពលោកគោលនយោបាយជាតិស្ដីពីមុខរបរ និងការងារឆ្នាំ២០១៥-២០២៥ នេះ កាន់តែមានភាពសំខាន់ ជាពិសេសការត្រៀមចាប់យកនូវការវិវត្តន៍ថ្មីៗដើម្បីឆ្លើយតបទៅនឹងសភាពការណ៍របស់កម្ពុជា និងពិភពលោកក្នុងការបង្កើននូវល្បឿនរីកចម្រើននៃសេដ្ឋកិច្ចកម្ពុជាបន្ថែមទៀត»។
គួរបញ្ជាក់ថា គោលនយោបាយ ជាតិ ស្ដីពីមុខរបរនិងការងារឆ្នាំ២០១៥ ២០២៥ត្រូវបានប្រកាសដាក់ឲ្យអនុវត្តន៍កាលពីរសៀលថ្ងៃទី២២ ខែតុលា ឆ្នាំ២០១៥ នៅវិមាន សន្តិភាពក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងមានការចូលរួមរបស់លោក Maurizio Bussi នាយកការិយាល័យអង្គការ អន្តរជាតិខាងការងារប្រចាំប្រទេសកម្ពុជា ឡាវ និងថៃ អង្គទូតនៃបណ្ដាប្រទេសជាមិត្តប្រចាំកម្ពុជា និងមន្ត្រី មកពីក្រសួង ស្ថាប័នពាក់ព័ន្ធជាច្រើនរូបទៀត៕
Source: Kampuchea Thmey Daily
0 Comments