ភ្នំពេញ ៖ នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានប្រាប់អ្នកកាសែតនាល្ងាចថ្ងៃទី ១១មីនា ឆ្នាំ២០១៩នេះថា លោកឧកញ៉ា គិត ធៀង ម្ចាស់ក្លិបកម្សាន្តរ៉ុក ត្រូវបានចាប់ខ្លួនហើយតាមដីការបស់តុលាការបញ្ជូនទៅស្នងការនគរបាលរាជធានីភ្នំពេញ ដើម្បីធ្វើការសាកសួរពាក់ព័ន្ធនិងករណីគ្រឿងញៀន។
ការចាប់ខ្លួនឧកញ៉ាគិត ធៀងនេះ ត្រូវបានធ្វើឡើងប៉ុន្មានម៉ោងក្រោយសម្ដេចនាយករដ្ឋមន្ត្រីហ៊ុន សែន បានជំរុញឲ្យរកឲ្យឃើញអ្នកនៅពីក្រោយអំពើល្មើសគ្រឿងញៀននៅក្លឹបរ៉ុក។
ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រ សេដ្ឋកិច្ចRULES ជាង៣ពាន់នាក់ ដែលបានបញ្ចប់ការសិក្សា ដោយជោគជ័យដែលធ្វើឡើងនៅមជ្ឈមណ្ឌលកោះពេជ្រ កាលពីព្រឹកថ្ងៃចន្ទ ទី១១ ខែមីនា ឆ្នាំ២០១៩ សម្ដេចតេជោហ៊ុន សែន រំលឹកអំពីករណីក្លឹបកម្សាន្តរ៉ុកលក់គ្រឿងញៀនថា ត្រូវតែរកឲ្យឃើញដល់ឫសគល់និងអ្នកនៅពីក្រោយនៃអំពើល្មើសគួរឲ្យស្អប់ខ្ពើមនោះ។
សម្តេចអគ្គមហាសេនាបតីតេជោ ហ៊ុន សែន បានសង្កត់ធ្ងន់ថា ឥឡូវនេះស្ថានភាពបានផ្លាស់ប្តូរច្រើនហើយ វាស្ទើរតែទាំងស្រុងអម្បាញ់មិញខ្ញុំព្រះករុណាខ្ញុំ បានធ្វើដំណើរមកតាមផ្លូវនេះស្ទើរតែរៀងរាល់ថ្ងៃធ្វើដំណើរឆ្លងកាត់សាលាមួយនេះដែលនៅមិនឃ្លាតឆ្ងាយពីសាលាបឹងត្របែក គឺសាកលវិទ្យាល័យប៉ុន្តែឆ្លងកាត់អាកន្លែងចង្រៃមួយនោះ ដែលទើបរកឃើញថ្មីៗ ក្លឹបរ៉ក ដ៏មានការ ភ្ញាក់ផ្អើលផងដែរ។
សម្តេចតេជោ ហ៊ុន សែន មានប្រសាសន៍បន្តថា ហេតុអ្វីបានជាកន្លែងមួយនេះទៅជាតំបន់បំផ្លាញនូវសេចក្តីសុខរបស់ប្រជាជន ? សម្តេចពិតជាមានការរីករាយណាស់ដែល នគរបាលរបស់យើងបានបង្ក្រាបទាន់ពេលវេលាគួរតែបង្ក្រាប ឲ្យបានមុននឹងទៅទៀតប៉ុន្តែយើងទើបនឹងបង្ក្រាបបាន ជិតក្បែរសាលាស្រាប់តែមានកន្លែងគ្រឿងញៀនមិនតូចនៅ កន្លែងនេះទៅវិញ។ ដូច្នេះសម្តេចសង្ឃឹមថា ក្រសួងមហាផ្ទៃនឹងបន្តចាត់វិធានការលើបញ្ហានេះបូកជាមួយនឹងដំណើរការក្តីរបស់ តុលាការត្រូវតែម៉ឺងម៉ាត់ជាមួយនឹងការមិនវិលត្រឡប់ នៃអំពើពាលាអាវ៉ាសែសម្រាប់កន្លែងមួយនេះ( មជ្ឈមណ្ឌល រ៉ក ) ដែលត្រូវដាក់ទោសទណ្ឌឲ្យបានធ្ងន់ធ្ងរត្រូវស្វែងរក ឲ្យដល់ទីជម្រៅនូវមេក្លោងរបស់វានេះ។ អញ្ចឹងត្រូវរកឲ្យឃើញ ព្រោះអ្វីដែលមានក្នុងដៃរួចមកហើយជាមធ្យោបាយឈានទៅរកការជីកឫសគល់នៃ អ្នកជួញគ្រឿងញៀនក៏ដូចជាអ្នកពាក់ព័ន្ធក្នុងសំណុំរឿងមួយនេះ។
សូមរំលឹកថា កាលពីថ្ងៃ ទី ២៣ខែកុម្ភៈ ឆ្នាំ ២០១ វេលាម៉ោង ០១ និង៣០ នាទីរំលង អធ្រាត្រដឹកនាំបញ្ជាផ្ទាល់របស់ ឧត្តមសេនីយ៍ឯកអគ្គស្នងការរង និង ជាស្នងការនគរបាល រាជធានីភ្នំពេញស ថេត និងដោយមានការដឹកនាំ សម្របសម្រួលពីលោកលី សុផាណា ព្រះរាជអាជ្ញារងនៃ អយ្យការ អមសាលាដំបូងរាជធានី ភ្នំពេញការិយាល័យនគរបាល ព្រហ្មទណ្ឌកម្រិតស្រាល រាជធានីភ្នំពេញសហការ ជាមួយកម្លាំងអធិការដ្ឋាននគរបាលខណ្ឌចំការមន និង កម្លាំងអន្តរាគមន៍ ពិសេសស្នងការដ្ឋាននគរបាល រាជធានីភ្នំពេញបានបង្ក្រាបក្នុង បទល្មើសជាក់សែ្តងទីតាំងមជ្ឈមណ្ឌលកម្សាន្តរ៉កផ្លូវព្រះមុន្នីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ពាក់ព័ន្ធករណីប្រើប្រាស់សម្រួល និងចាត់ចែងដោយខុសច្បាប់នូវសារធាតុញៀន។
ក្នុងប្រតិបត្តិការបង្ក្រាបនោះ កម្លាំងចម្រុះបានត្រួតពិនិត្យ ទីតាំងខាងលើ ចំនួន ១៥ បន្ទប់ រក ឃើញ ឃាត់ខ្លួនមនុស្ស ចំនួន ៣១១នាក់( ប្រុស២៥៦នាក់ស្រី៥៥នាក់ ) និងចាប់យកបានវត្ថុ តាងពាក់ព័ន្ធបទល្មើសមួយចំនួន បញ្ជូនមកការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញដើម្បីសាកសួរ។
វត្ថុតាងសារធាតុញៀនចាប់យកសរុបរួម ថ្នាំគ្រាប់អិចស្តាស៊ី គ្រវី ១២ គីឡូក្រាម ២១៩.២៦ ក្រាម កេតាមីន (Ketamine) ៨ គីឡូក្រាម ៩៣៥.០៦ ក្រាម , ថ្នាំបន្សាប (Nimetazepam)៣០៥.១០ក្រាម , មេតំហ្វេតាមីន (ICE)១.៦ ក្រាម , ហេរ៉ូ អ៊ីន (Heroine) ០.៦១ក្រាម , សរុបសារធាតុ ញៀនទម្ងន់ ២១ គីឡូក្រាម ៤៦១,៦៣ ក្រាម , កញ្ឆា ក្រៀម ទម្ងន់ ៦៦,៤៣ ក្រាម , ធ្វើ តេ ស្តិ៍ បឋមមិនច្បាស់លាស់ទម្ងន់ ១៥,១៤គីឡូក្រាម ( សង្ស័យ ធាតុគីមី ) សំបកវេចខ្ចប់ ( សំបក កែវ ចំនួន ២៤៧ , សំបកកេសនិងថង់ផ្លាស្ទីកមួយ ចំនួន ) ទម្ងន់ ប្រហែល ១២គីឡូក្រាមសរុប រួមទម្ងន់ ៖ ៤៩,៤៤ គីឡូក្រាម។
ប្រភពដែលជិតស្និទ្ធលោកឧកញ៉ាគិត ធាង បានឲ្យដឹងថា ខណៈពេលនេះលោកឧកញ៉ាមិននៅក្នុងប្រទេសកម្ពុជា ឡើយចាប់តាំងពីថ្ងៃសមត្ថកិច្ចបង្ក្រាបមជ្ឈមណ្ឌលកំសាន្តរ៉ក ដែលជាកន្លែងប្រើប្រាស់គ្រឿងញៀននិងជាកន្លែងបំផ្លាញ សង្គមជាតិធ្វើឲ្យប្រទេសជាតិបាក់មុខមាត់នោះ ។
ប៉ុន្តែមនុស្សទាំង៣១១នាក់ គឺមានតែ១៧នាក់ប៉ុណ្ណោះ ជាប្រភេទក្មេងញៀនថ្នាំត្រូវបានបញ្ជូនមកតុលាការ ។ ចំណែកជនជាតិចិនចំនួន១៣នាក់ ត្រូវបញ្ជូនទៅប្រទេសកំណើត។ រីឯមនុស្សជាង២០០នាក់ផ្សេងទៀត ត្រូវបានដោះលែងវិញទាំងអស់ សូម្បីឧកញ៉ាគិត ធាង ជាម្ចាស់អាជីវកម្មដែលបានធ្វើកិច្ចសន្យាជាមួយអាជ្ញាធរមិនឲ្យមានការជួញដូរគ្រឿងញៀនក៏អត់មានទោសពៃរ៍ ឬ ត្រូវចាប់ខ្លួនមកសួរនាំអំពីការចរាចរគ្រឿងញៀនយ៉ាងសន្ធឹកនេះដែរ៕
Source: Kampuchea Thmey Daily
0 Comments