ភ្នំពេញ ៖ តាមសេចក្តីណែនាំអគ្គនាយកដ្ឋានពន្ធនាគារក្រសួងមហាផ្ទៃចុះថ្ងៃទី០៤ ខែមីនា ឆ្នាំ២០១៩ បានឲ្យដឹងថា អគ្គនាយកដ្ឋានពន្ធនាគារ បានសម្រេចបញ្ឈប់លែងឲ្យមានការប្រើប្រាស់ប្រព័ន្ធទូរស័ព្ទ ដែលដាក់ឲ្យជនជាប់ឃុំប្រើប្រាស់តទៅទៀត ចាប់ពីថ្ងៃទី០៤ ខែមីនា ឆ្នាំ២០១៩ រហូតដល់មានបទបញ្ជាជាថ្មី។
សេចក្តីណែនាំអគ្គនាយកដ្ឋានពន្ធនាគារក្រសួងមហាផ្ទៃបានបញ្ជាក់ថា ដោយអនុវត្តតាមបទបញ្ជាដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី០៤ ខែមីនា ឆ្នាំ២០១៩ នៅក្នុងពិធីបើកការដ្ឋានសាងសង់សំណង់ផ្សេងៗក្នុងគម្រោងការពារទឹកជំនន់ និងកែលម្អប្រព័ន្ធប្រឡាយលូក្នុងរាជធានីភ្នំពេញ អគ្គនាយកដ្ឋានពន្ធនាគារ សូមធ្វើការណែនាំដល់ប្រធានមណ្ឌលកែប្រែរាជធានី ខេត្ត ចំនួន៤ចំណុច។
ទី១, បញ្ឈប់ការប្រើប្រាស់ប្រព័ន្ធទូរស័ព្ទ ដែលដាក់ឲ្យជនជាប់ឃុំប្រើប្រាស់ ចាប់ពីថ្ងៃទី០៤ ខែមីនា ឆ្នាំ២០១៩ រហូតដល់មានបទបញ្ជាជាថ្មី។ ទី២, បង្កើនការបង្ការទប់ស្កាត់រាល់សកម្មភាពការលួចលាក់នាំទូរស័ព្ទចល័តចូលមណ្ឌលអប់រំកែប្រែ និងពន្ធនាគារ និងពង្រឹងការត្រួតពិនិត្យឆែកឆេរដកហូតទូរស័ព្ទក្នុងមណ្ឌលកែប្រែ និងពន្ធនាគារ។ ទី៣, ករណីរកឃើញទូរស័ព្ទដែលបម្រុងនាំចូល ឬរកឃើញទូរស័ព្ទក្នុងពន្ធនាគារ ត្រូវធ្វើកំណត់ហេតុដកហូតរក្សាទុកហើយចំពោះជនដែលប្រព្រឹត្តបទល្មើសត្រូវមានវិធានការតាមផ្លូវច្បាប់ដូចមានចែងក្នុងមាត្រា៥៧១ និងមាត្រា៥៧២ នៃក្រមព្រហ្មទណ្ឌព្រះរាជាណាចក្រកម្ពុជា និងដាក់វិន័យតាមបទបញ្ជាផ្ទៃក្នុងពន្ធនាគារ និងទី៤, ត្រូវរាយការណ៍អំពីសភាពការណ៍ និងលទ្ធផលនៃការចាត់តាំងអនុវត្តសេចក្តីណែនាំនេះ តាមរយៈរបាយការណ៍ប្រចាំថ្ងៃ មកនាយកដ្ឋានពន្ធនាគារ។
សូមបញ្ជាក់ថា មានប្រសាសន៍នៅក្នុងពិធីបើកការដ្ឋានសាងសង់ សំណង់ផ្សេងៗ ក្នុងគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញ ជំហានទី៤ កាលពីថ្ងៃទី៤ ខែមីនា ឆ្នាំ២០១៩ សម្ដេចតេជោ ហ៊ុន សែន បញ្ជាឲ្យបញ្ឈប់ការប្រើប្រាស់ទូរស័ព្ទ នៅតាមពន្ធនាគារ ខណៈមានអ្នកទោសមួយចំនួនទាក់ទងមកខាងក្រៅតាមទូរសព្ទ ដើម្បីរត់ការដោះលែង ដោយគ្មានញញើតច្បាប់។ សម្ដេចតេជោបញ្ជាក់ថា សូមឲ្យបណ្ដាគ្រប់ពន្ធនាគារ ទាំងឡាយបញ្ឈប់ការប្រើប្រាស់ ទូរស័ព្ទទៅ។ ករណីនេះ សម្តេចបានប្រាប់ទៅលោក អង្គ វង្សវឌ្ឍានា លោកឧត្តមសេនីយ៍ ឆៃស៊ី ណារិទ្ធ និងលោកស្រី អឹង កន្ថាផាវី បានដឹងរួចហើយ។ សម្តេចបន្តថា ការប្រើប្រាស់ប្រព័ន្ធទូរស័ព្ទចេញពីពន្ធនាគារនេះ នៅតែមានបន្ត ហើយរត់ការ ដើម្បីយករួចខ្លួន៕
Source: Kampuchea Thmey Daily
0 Comments