តុលាការ​ថៃ​ហាមឃាត់​គណបក្ស​ដែល​តែងតាំង​ម្ចាស់ក្សត្រី​ជា​បេក្ខជន​សម្រាប់​តំណែង​នាយករដ្ឋមន្ត្រី

តុលាការ​ធម្មនុញ្ញ​ថៃ​កាលពី​ថ្ងៃ​ព្រហស្បតិ៍​បាន​បញ្ជា​ឲ្យ​រំលាយ​គណបក្សប្រឆាំង​មួយ​ដោយសារតែ​ការតែងតាំង​បងស្រី​របស់​ព្រះមហាក្សត្រ​ឲ្យ​ធ្វើជា​បេក្ខជន​របស់ខ្លួន​សម្រាប់​តំណែង​នាយករដ្ឋមន្ត្រី​នៅក្នុង​ការបោះឆ្នោត​របស់​ប្រទេស​នៅ​ថ្ងៃទី​២៤​ខែមីនា។

ចៅក្រម Taweekiet Meenakanit បាន​និយាយ​នៅក្នុង​សេចក្តីសម្រេច​ថា “​តុលាការ​បាន​បញ្ជា​ឲ្យ​គណបក្ស​នេះ​ត្រូវ​រំលាយ​”​។ សេចក្តីសម្រេច​នេះ​ក៏បាន​ហាមប្រាម​សមាជិក​ក្រុមប្រឹក្សា​និតិប្រតិបត្តិ​នៃ​គណបក្ស​ថៃ​រក្សា​ជាតិ​ពី​ការចូល​ប្រឡូក​ក្នុង​ឆាកនយោបាយ​រយៈពេល​១០​ឆ្នាំ​ផងដែរ​។​

គណៈកម្មការ​បោះឆ្នោត​បា​ន​ស្នើសុំ​ឲ្យ​តុលាការ​រំលាយ​គណបក្ស​នេះ​ក្រោយពី​បានតែងតាំង​ម្ចាស់​ក្ស​ត្រី Ubolratana Rajakanya Sirivadhana Barnavadi ឲ្យ​ឈរឈ្មោះ​សម្រាប់​តំណែង​នាយករដ្ឋមន្ត្រី​នៅក្នុង​ការបោះឆ្នោត​ជា​លើកដំបូង​ចាប់តាំងពី​រដ្ឋប្រហារ​ឆ្នាំ​២០១៤​មក។

នៅ​ថ្ងៃ​នៃ​ការតែងតាំង​នោះ ប្អូនប្រុស​របស់​ព្រះ​នាង​គឺ​ព្រះមហាក្សត្រ Maha Vajiralongkorn បានចេញ​រាជបញ្ជា​មួយ​ដែល​ហៅថា​ការតែងតាំង​នេះ​ថា​មិន​សមរម្យ​និង​មិន​ស្របតាម​រដ្ឋធម្មនុញ្ញ​។​

ថៃ​រក្សា​ជាតិ​គឺជា​គណបក្ស​ថ្មី​ដែលមាន​ទំនាក់ទំនង​យ៉ាង​ជិតស្និទ្ធ​ជាមួយ​អតីត​នាយករដ្ឋមន្ត្រី​ថាក់ស៊ីន​ស៊ីណាវ៉ាត្រា​ដែល​បានរស់នៅ​ក្នុងការ​និរទេស​ខ្លួន​ចាប់តាំងពី​គាត់​បាន​បាត់បង់​អំណាច​កាលពី​ឆ្នាំ​២០០៦​ហើយ​ត្រូវ​រង​ការចោទប្រកាន់​ពីបទ​ពុករលួយ​។​

សមាជិក​លេចធ្លោ​ជាច្រើន​នាក់​នៃ​គណបក្ស​ភឿ​ថៃ​ដែលជា​គណបក្ស​បង្កើតឡើង​ដោយ​លោក​ថាក់ស៊ីន​គឺ​បាន​ទៅ​ចូលរួម​ជាមួយ​គណបក្ស​ថៃ​រក្សា​ជាតិ​នៅពេល​វា​ត្រូវបាន​បង្កើតឡើង​កាលពី​ឆ្នាំមុន​។​

គួរ​បញ្ជាក់ថា ព្រះ​នាង Ubolratana បាន​លះបង់​ងារ​ជា​រាជវង្ស​ក្នុង​ឆ្នាំ​១៩៧២​ប៉ុន្តែ​នៅតែ​ត្រូវបាន​គេ​ចាត់ទុកថា​ជា​សមាជិក​ជាន់ខ្ពស់​នៃ​រាជវង្សានុវង្ស​ដែល​ត្រូវបាន​គេ​គោរព​យ៉ាង​ខ្ពង់ខ្ពស់​នៅក្នុង​ប្រទេស​ថៃ​។​

យោងតាម​ការ​បង្ហោះ​របស់​ព្រះ​នាង​នៅលើ Instagram បាន​ឲ្យ​ដឹងថា ម្ចាស់​ក្ស​ត្រី​ដែល​បាន​បំបែក​ប្រពៃណី​រាជវង្ស​សម្រាប់​ការប៉ុនប៉ង​ចូលប្រឡូក​ក្នុង​ឆាកនយោបាយ​អង្គ​នេះ​គឺ​កំពុង​ស្ថិតនៅ​ក្នុងប្រទេស​អាល្លឺម៉ង់​៕ REUTERS

​

Source: Kampuchea Thmey Daily