ព្រៃវែង ៖ រឿងរ៉ាវករណីឃាតកម្មខ្មាន់កាំភ្លើង ដែលជាកូន និងក្មួយ លោក ឧកញ៉ា ជឹម សុខ បាញ់១០គ្រាប់ស្រោចសម្លាប់ជនរងគ្រោះ ដោយចោទថាជាចោរលួចឡាននោះ លទ្ធផលត្រូវបានតុលាការឃុំខ្លួនជនត្រូវចោទ៥នាក់ ពីរបទល្មើសផ្សេងគ្នា។
នៅល្ងាចថ្ងៃទី២៨ ខែមីនា ឆ្នាំ២០១៩ លោកកែ សាខន អនុប្រធានសាលាដំបូងខេត្តព្រៃវែង និងចៅក្រមស៊ើបសួរ បានសម្រេចចេញដីកាឃុំខ្លួនជនត្រូវចោទចំនួន៥នាក់ ដោយដាក់ពន្ធនាគារជាបណ្ដោះអាសន្ន។
ជនជាបចោទខាងលើ គឺទី១-ឈ្មោះ ជឹម រតនៈ ភេទប្រុស អាយុ២៩ឆ្នាំ និង ២-ឈ្មោះ ជឹម វិន ភេទប្រុស អាយុ២៥ឆ្នាំ ដោយអ្នកទាំងពីរ ជាប់ចោទពីបទឃាតកម្ម និងប្រើប្រាស់អាវុធដោយគ្មានការអនុញ្ញាត ដែលបានប្រព្រឹត្ត នៅភូមិគោកសណ្ដែក ឃុំរក្សជ័យ ស្រុកបាភ្នំ ខេត្តព្រៃវែង កាលពីវេលាម៉ោង២៣និង០០យប់ ថ្ងៃទី២៣ ខែមីនា ឆ្នាំ២០១៩។ ដោយយោងតាម មាត្រា១៩៩ នៃក្រមព្រហ្មទណ្ឌ នៃព្រះរាជាណាចក្រកម្ពុជា ដែលត្រូវផ្ដន្ទាទោសដាក់ពន្ធនាគារចាប់ពី១០ ទៅ១៥ឆ្នាំ។
ដោយឡែកជនត្រូវចោទ៣នាក់ទៀត គឺ ទី១-ឈ្មោះ សេង ឈិន ភេទប្រុស អាយុ២៥ឆ្នាំ ជាម្ចាស់បណ្ដឹង ដែលផ្ដល់ព័ត៌មានមក ឈ្មោះ ផាន់ សុឌី ឲ្យជួយចាប់ចោរលួចឡាន។ ទី២-ឈ្មោះ ផាន់ សុឌី ភេទប្រុស អាយុ៣១ឆ្នាំ នៅភូមិតាម៉ៅ ឃុំកំពង់សឹង ស្រុកព្រះស្ដេច ខេត្តព្រៃវែង បច្ចុប្បន្នជាជាងជួសជុលឡាននៅភ្នំពេញ និងទី៣-ឈ្មោះ ភាព ផានី ភេទប្រុស អាយុ៣៨ឆ្នាំ ជាពលរដ្ឋនៅឃុំកំពង់សឹង អ្នកផ្ដល់ព័ត៌មានមកប៉ូលិស។ អ្នកទាំងបី ជាប់ចោទពីបទ ប្ដឹងបរិហារបង្កាច់កេរ្តិ៍ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ដែលបានប្រព្រឹត្តនៅភូមិគោកសណ្ដែក ឃុំរក្សជ័យ ស្រុកបាភ្នំ ខេត្តព្រៃវែង កាលពីវេលាម៉ោង២៣និង០០យប់ថ្ងៃទី២៣ ខែមីនា ឆ្នាំ២០១៩ តាមមាត្រា៣១១,៣១២ និង មាត្រា៤៩៥ នៃក្រមព្រហ្មទណ្ឌ នៃព្រះរាជាណាចក្រកម្ពុជា ដែលត្រូវផ្ដន្ទាទោសពី១ខែ ទៅ១ឆ្នាំ និងពិន័យជាទឹកប្រាក់ពី១សែន ទៅ២លានរៀល។
សូមរម្លឹកថា ករណីឃាតកម្មបាញ់១០គ្រាប់ ស្រោចយ៉ាងព្រៃផ្សៃ កាលពីវេលាម៉ោង២៣និង០០នាទីយប់ ថ្ងៃទី២៣ ខែមីនា ឆ្នាំ២០១៩ នៅចំណុចភូមិឃុំខាងលើ ខណៈជនរងគ្រោះកំពុងបើកបររថយន្ត បណ្ដាលឲ្យជនរងគ្រោះ ឈ្មោះ ម៉ន រ៉ាវុធ ភេទប្រុស អាយុ៣២ឆ្នាំ មុខរបរជាងម៉ៅការសំណង់ មានស្រុកកំណើតនៅ ឃុំឈើកាច់ ស្រុកបាភ្នំ ខេត្តព្រៃវែង ហើយបច្ចុប្បន្នស្នាក់នៅ ខណ្ឌពោធិ៍សែនជ័យ រាជធានីភ្នំពេញ ស្លាប់ក្នុងថ្លុកឈាមនៅក្នុងរថយន្ត និងអ្នករួមដំណើរ ឈ្មោះ វ៉ាន ខេមរិន ភេទប្រុសអាយុ២៧ឆ្នាំ នៅភូមិឈើកាច់ ឃុំឈើកាច់ ស្រុកបាភ្នំ ខេត្តព្រៃវែង រងរបួសស្រាល។
ដើមចមដែលបណ្តាលឲ្យមានករណីនេះគឺ ដំបូង ជនរងគ្រោះ ឈ្មោះ យ៉ន រ៉ាវុទ្ធ ជាម្ចាស់រថយន្ត បានយកប្រាក់៣,០០០ដុល្លារ ពីឈ្មោះ សេង ឈិន ទៅលស់ យករថយន្តរបស់ខ្លួន ដែលបានបញ្ចាំ រួចយករថយន្តនោះ មករកស៊ីជាមួយគ្នា ដោយជួលឲ្យជនជាតិចិន បានរយៈពេល៣ខែ
ហើយក្នុង១ខែ ទទួលបាន៤៥០ដុល្លារ ចែកចែកគ្នាបាន២២៥ដុល្លារម្នាក់។
លុះដល់ថ្ងៃកើតហេតុ ដោយសាររថយន្តនោះខូច និងដោយមានការខ្វែងគំនិតគ្នានោះ ជនរងគ្រោះ
បានយករថយន្តនោះ មកជួសជុល ដែលជាមូលហេតុ បណ្តាលឲ្យ ឈ្មោះ សេង ឈិន ចោទថា ជាករណីលួចឡាន និងបានទាក់ទងទៅសមត្ថកិច្ចឲ្យតាមចាប់។
ទន្ទឹមនឹងនោះ សមត្ថកិច្ចPMបានបើកឡានដេញតាមពីក្រោយ ជាមួយ ឈ្មោះ សេង ឈិន និងឈ្មោះ ផាន់ សុឌី ដោយដេញតាមតាំងពីគល់ស្ពានអ្នកលឿងត្រឡប់មកផ្លូវជាតិលេខ១១ ទិសដៅឆ្ពោះទៅទីរួមខេត្តព្រៃវែង លុះមកដល់ផ្លូវបំបែក ទៅផ្សារស្នេហ៍ស្រុកបាភ្នំ ជនរងគ្រោះបានបើករថយន្តសំដៅទៅទីរួមស្រុកបាភ្នំ ហើយនៅពេលមកដល់ចំណុចកើតហេតុ ស្រាប់តែសមត្ថកិច្ចមួយក្រុមដឹកនាំដោយ លោក ជា ឡាឌីន នាយប៉ុស្តិ៍កំពង់សឹង មកស្ទាក់ពីមុខ ហើយឈ្មោះ ជឹម រតនៈ និង ឈ្មោះ ជឹម វិន បានដកកាំភ្លើង បាញ់ស្រោចមកលើជនរងគ្រោះ ចំនួន១០គ្រាប់ បណ្ដាលឲ្យស្លាប់តែម្ដង។
ក្រោយមក សមត្ថកិច្ច នាយកដ្ឋានព្រហ្មទណ្ឌកម្រិតធ្ងន់ ក្រសួងមហាផ្ទៃ សហការជាមួយស្នងការខេត្តព្រៃវែង ធ្វើការស្រាវជ្រាវ ចាប់ជនពាក់ព័ន្ធជាបន្តបន្ទាប់រហូតដល់៥នាក់ ខាងលើ យកមកផ្ដន្ទាទោសតាមច្បាប់៕
Source: Kampuchea Thmey Daily
0 Comments