ភ្នំពេញ ៖ នៅវេលាម៉ោង៨និង៣០នាទី ព្រឹកថ្ងៃទី២៩ ខែមីនា ឆ្នាំ២០១៩នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានអញ្ជើញជាអធិបតីក្នុងវេទិការាជរដ្ឋាភិបាល-ផ្នែកឯកជន លើកទី១៨ ដែលប្រារព្ធធ្វើឡើងនៅវិមានសន្តិភាព។
វេទិកានេះមានការអញ្ជើញចូលរួមផងដែរ ពីមន្ត្រីជាន់ខ្ពស់រាជរដ្ឋាភិបាលកម្ពុជា និង អ្នកវិនិយោគ ធុរជនដែលកំពុងវិនិយោគ និង រកស៊ីនៅក្នុងប្រទេសកម្ពុជា។ វេទិកានេះ នឹងមានការជជែកដោយបើកចំហរវាង សម្ដេចតេជោ ហ៊ុន សែន ជាមួយថ្នាក់ដឹកនាំក្រសួងស្ថាប័នពាក់ព័ន្ធ និងអ្នករកស៊ីនៅកម្ពុជា ទៅលើបញ្ហាពាក់ព័ន្ធការវិនិយោគ ការធ្វើពាណិជ្ជកម្ម និងធ្វើធុរកិច្ចជាដើម។
សម្ដេចតេជោ ហ៊ុន សែន ធ្លាប់បានគូសបញ្ជាក់ថា ក្នុងវេទិកានេះ សម្តេចនឹងប្រកាសដាក់ចេញការធ្វើកំណែទម្រង់ជាច្រើន ដើម្បីធានាដល់ការធ្វើពាណិជ្ជកម្មរបស់កម្ពុជា ក៏ដូចជាធានាដល់ការប្រកួតប្រជែងទំនិញរបស់កម្ពុជានៅលើទីផ្សារអន្តរជាតិ។ ជាពិសេសនៅទីផ្សារក្នុងសហគមន៍អឺរ៉ុបបើទោះបីសហគមន៍អឺរ៉ុប បន្តផ្តល់ប្រព័ន្ធអនុគ្រោះពន្ធ ឬ ព្យួរក៏ដោយនោះ។
កំណែទម្រង់ដែលសម្ដេចធ្លាប់បានលើកឡើងថា នឹងប្រកាសនៅក្នុងវេទិកានេះ មានដូចជា ការកាត់បន្ថយថ្ងៃឈប់សម្រាក ការបញ្ចេញកញ្ចប់ថវិកាសម្រាប់អន្តរាគមន៍លើបញ្ហានានា រួមនឹងការដាក់ចេញនូវយន្តការជាច្រើនផ្សេងៗទៀតដែលសុទ្ធសឹងជាការសម្រួលដល់ការធ្វើធុរកិច្ចរបស់ធុរជន៕
Source: Kampuchea Thmey Daily
0 Comments