ការកែលម្អជួសជុលរូបសំណាកតាកែវយាយកែវ និងរូបសំណាកផ្កាឈូក ចំណាយថវិកាជិត៣ម៉ឺនដុល្លារសហរដ្ឋអាមេរិក

តាកែវ ៖ រូបសំណាកលោកតាកែវ លោកយាយកែវ និងរូបសំណាកផ្កាឈូកថ្មី ដែលស្ថិតនៅភូមិ ថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ ខាងលិចផ្សារធំ តាកែវ ដែលទើបស្ថាបនារួចរាល់ជាស្ថាពរ ក្រោមការផ្ដួចផ្ដើមសាងសង់ និងជួសជុលរបស់ លោក អ៊ូច ភា អភិបាលខេត្តតាកែវ និងលោកជំទាវ រួមជាមួយមន្ត្រីរាជការទូទាំងខេត្ត ចំណាយថវិកាអស់ជិត៣ម៉ឺនដុល្លារសហរដ្ឋអាមេរិក។

លោក អ៊ូច ភា អភិបាលខេត្តតាកែវ បានថ្លែងប្រាប់ ក្នុងឱកាសរៀបចំពិធីអភិសេករូបសំណាកតាកែវយាយកែវ និងរូបសំណាកផ្កាឈូក កាលពីរសៀលថ្ងៃទី២៨ ខែមីនា ឆ្នាំ២០១៩ ថា អាជ្ញាធរខេត្ត មិនបានធ្វើការសាងសង់រូបសំណាកតាកែវ យាយកែវថ្មីនោះទេ ពោលគឺ អាជ្ញាធរគ្រាន់តែធ្វើការជួសជុល កែលំអរូបសំណាកចាស់ ដែលមានសភាពទ្រុឌទ្រោម ឲ្យល្អប្រសើរឡើងវិញ ព្រមទាំងរៀបចំ សួនច្បារកែលំអសោភ័ណភាពល្អ នៅកន្លែងតម្កល់រូបសំណាកតែប៉ុណ្ណោះ។

លោកអភិបាលខេត្តបានបន្តថា ចំពោះថវិកាចំណាយលើការសាងសង់សួនច្បារ និងជួសជុលរូបសំណាក តាកែវយាយកែវ និងរូបសំណាកផ្កាឈូកថ្មីនេះ គឺអាជ្ញាធរ មិនបានយក ថវិកាជាតិយកមកធ្វើនោះទេ។ ថវិកា នៃគម្រោងនេះ គឺបានមកពីការរៃអង្គាស ពីបងប្អូនប្រជាពលរដ្ឋ នៅក្នុងខេត្ត និងសប្បុរសជននានា ដោយប្រមូលថវិកា បានជាង៣ម៉ឺនដុល្លារ សម្រាប់គម្រោង នៃការសាងសង់សួនច្បារ និងការជួសជុលរូបសំណាក តាកែវយាយកែវនេះ។

លោក អ៊ូច ភា អភិបាលខេត្តតាកែវ បានបន្ថែមថា នៅក្នុងគម្រោងជួសជុល និងផ្លាស់ទីតាំង រូបសំណាកតាកែវយាយកែវនេះ គឺមានការគាំទ្រច្រើនពីសំណាក់បងប្អូនប្រជាពលរដ្ឋ ក្នុងខេត្តតាកែវ យ៉ាងផុលផុសផងដែរ តាមរយៈការបង្ហោះការគាំទ្រ នៅលើបណ្តាញទំនាក់ទំនងសង្គមហ្វេសប៊ុក ម្យ៉ាងទៀតការផ្លាស់ប្តូរទីតាំងនេះ ក៏ដើម្បីឲ្យមានភាពទូលាយ ងាយស្រួល ដល់ប្រជាពលរដ្ឋ ធ្វើដំណើរ ទៅមក និងបង្កលក្ខណៈងាយស្រួល ដល់ប្រជាពលរដ្ឋមកគោរពបូជា រូបសំណាកនេះផងដែរ។

សូមបញ្ជាក់ឲ្យដឹងថា ការកសាងជួសជុលរូបសំណាកតាកែវយាយកែវ និងរូបសំណាកផ្កាឈូកថ្មីនេះ ខាងមន្ទីរសាធារណការ និងដឹកជញ្ជូន ខេត្តតាកែវ ដឹកនាំដោយ លោក ណុប នី ដែលជាអ្នកទទួលខុសត្រូវ ក្នុងការស្ថាបនាសាងសង់ និងជួសជុល ត្រូវចំណាយពេលស្ថាបនាមានរយៈពេលជាង៣ខែ និងចំណាយថវិកាជិត៣ម៉ឺនដុល្លារសហរដ្ឋអាមេរិក៕