ស្វាយរៀង ៖ កាលពីព្រឹកថ្ងៃព្រហស្បតិ៍ ៨រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែមីនា ឆ្នាំ២០១៩ លោក ម៉ែន វិបុល អភិបាល នៃគណៈអភិបាលខេត្តស្វាយរៀង និងលោកជំទាវ ឈុន ណារី បានអញ្ជើញជាអធិបតីក្នុងពិធីសម្ពោធ ផ្សារប្រសូត្រទី១ ស្រុកស្វាយទាប ខេត្តស្វាយរៀង។
អញ្ជើញចូលរួមក្នុងពិធីនេះមានលោកអភិបាលរងខេត្ត លោកនាយកទីចាត់ការហិរញ្ញវត្ថុសាលាខេត្ត លោកស្រីនាយករងរដ្ឋបាលសាលាខេត្ត លោកអភិបាលស្រុកស្វាយទាប ក្រុមប្រឹក្សាស្រុក មន្ត្រីរាជការ កងកម្លាំងទាំងបី យុវជនកាយរឹទ្ធិ យុវជនកាកបាទក្រហម និងអាជីវករ បងប្អូនប្រជាពលរដ្ឋសរុបប្រមាណជាង៣០០នាក់។
លោកម៉ែន វិបុល អភិបាលខេត្ត បានមានប្រសាសន៍ទៅកាន់ ពាណិជ្ជករ អាជីវករ អាជ្ញាធរដែនដី មន្ត្រីរាជការ សិស្សានុសិស្ស យុវជន ប្រជាពលរដ្ឋនៅក្នុងពិធីសម្ពោធនោះថា ការដាក់ឱ្យដំណើរការ ផ្សារប្រសូត្រទី១នៅពេលនេះ គឺមានសារសំខាន់ណាស់ ព្រោះផ្សារនេះ នឹងផ្ដល់ជាទីកន្លែងសមរម្យ ដល់ប្រជាពលរដ្ឋអាជីវករក្នុងការលក់ដូរ ប្រកបរបបចិញ្ចឹមជីវិត ប្រចាំថ្ងៃ ហើយផ្សារនេះក៏ជាទីកន្លែងប្រមូលផ្តុំ ផ្នែកពាណិជ្ជកម្ម ឧស្សាហកម្ម កសិផល និងការរស់នៅបែបទាន់សម័យ និងសប្បាយរីករាយ ដើម្បីបំពេញសេចក្ដីត្រូវការរបស់យុវជន កម្មករ កម្មការិនី និងប្រជាពលរដ្ឋទូទៅ ចូលមកទិញអីវ៉ាន់នានាតាមសេចក្ដីត្រូវការរបស់ពួកគាត់។
លោកបន្តថា ទីកន្លែងនេះពីមុនមិនមានកន្លែងលក់ដូរសមរម្យសម្រាប់បងប្អូនអាជីវករទេ ក្រោយពីការវិនិយោគសាងសង់រួចរាល់ ផ្សារនេះ មានកម្ពស់២ជាន់ មានចំនួន១៥០តូប បំពាក់ដោយជណ្តើរយន្តនៅជាន់ទី១ថែមទៀតផង ទាំងនេះបានចូលរួមចំណែកផ្ដល់នូវ សោភណភាពសម្រាប់ស្រុកស្វាយទាប ក៏ដូចជាខេត្តស្វាយរៀង កំពុងមានសក្ដានុពលសេដ្ឋកិច្ច ជាពិសេសផ្នែកឧស្សាហកម្មរោងចក្រ ដែលផ្តើមចេញពីការខិតខំ របស់រាជរដ្ឋាភិបាល ដែលបានដឹកនាំប្រទេសរួចផុតពីសង្គ្រាម ការកាប់សម្លាប់នៅរបបប្រល័យពូជសាសន៍ ការបែកបាក់សាមគ្គីជាតិ ឱ្យក្លាយជាប្រទេសមួយ ដែលទទួលបានសុខសន្តិភាពពេញផ្ទៃប្រទេស មានឯករាជ្យភាព និងអនុវត្តរបបលទ្ធិប្រជាធិបតេយ្យ សេរីពហុបក្ស ការគោរពសិទ្ធិមនុស្ស គោលការណ៍ច្បាប់ និងការអភិវឌ្ឍរហូតដល់បច្ចុប្បន្ន៕
Source: Kampuchea Thmey Daily
0 Comments