លោក ហ៊ុន ម៉ានី ជួបសំណេះសំណាលជាមួយថ្នាក់ដឹកនាំ មន្ត្រី សមាជិក សមាជិកា ស ស យ ក ខេត្តរតនគិរី

រតនគិរី ៖ នៅថ្ងៃទី២៨ ខែមីនា ឆ្នាំ២០១៩ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញជាអធិបតីក្នុងពិធីសំណេះសំណាលជាមួយថ្នាក់ដឹកនាំ សមាជិក សមាជិកា ក្នុងរចនាសម្ព័ន្ធ ស ស យ ក ខេត្តរតនគិរី ដែលមាន លោក ថង សាវុន អភិបាលខេត្តរតនគិរី និងជាប្រធានសហភាពសហព័ន្ធយុវជនកម្ពុជាខេត្ត ព្រមទាំងថ្នាក់ដឹកនាំមន្ត្រីរាជការជាច្រើនរូបក៏បានអញ្ជើញចូលរួមសរុបប្រមាណជាង៣០០នាក់ នៅសាលមហោស្រព សម្ដេចតេជា ហ៊ុន សែន ស្ថិតក្នុងបរិវេណមន្ទីរវប្បធម៌ និងវិចិត្រសិល្បខេត្ត។

លោក ហ៊ុន ម៉ានី បានមានប្រសាសន៍ថា មនុស្សម្នាក់ៗ ត្រូវតែប្រឹងប្រែងដោយខ្លួនឯង ដើម្បីឆ្ពោះទៅមុខ ពោរពេញដោយការអភិវឌ្ឍជាសសរទ្រូងប្រទេសជាតិ ជាពិសេសយុវជនជំនាន់ក្រោយ ប្រមូលផ្ដុំយុវជនគ្រប់ទិសទី ជាមហាកម្លាំងសាមគ្គីក្នុងការរួមចំណែកកសាងបន្ថែម និងលើក
កម្ពស់ប្រទេសកម្ពុជាជាមួយឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម។

សហភាពសហព័ន្ធយុវជនកម្ពុជា ជារណសិរ្សទូលំទូលាយ នៃយុវជនកម្ពុជា ដែលបានបន្តបេសកកម្មពីសមាគមយុវជនសាមគ្គីសង្គ្រោះជាតិកម្ពុជា និងសមាគមយុវជនកម្ពុជា ដែលបានបដិសន្ធិនៅថ្ងៃទី០២ ខែធ្នូ ឆ្នាំ១៩៧៨ ក្នុងគោលដៅសំខាន់បំផុតដើម្បីប្រមូលផ្ដុំយុវជនគ្រប់ទិសទី ជាមហាកម្លាំងសាមគ្គី ក្នុងការរួមចំណែកកសាងប្រទេសកម្ពុជាជាមួយឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម។

នាឱកាសនោះដែរ លោក ហ៊ុន ម៉ានី បានបញ្ជាក់យ៉ាងដូច្នេះថា «សហភាពសហព័ន្ធយុវជនកម្ពុជា នឹងបន្ដសកម្មភាពចូលរួមជាវិជ្ជាមានដល់សង្គមកម្ពុជា ជាពិសេសការបន្ដចូលរួមជាមួយរាជរដ្ឋាភិបាល អង្គការ ស្ថាប័នដៃគូ និងបុគ្គល ដែលមានបេះដូង និងបេសកកម្មដូចគ្នាលើការកសាងអភិវឌ្ឍន៍កម្ពុជាមួយរឹងមាំ និងកាន់តែមានការទទួលស្គាល់ទាំងក្នុងកម្រិតជាតិ និងអន្តរជាតិ»។ និងដោយផ្អែកលើមូលដ្ឋានធនធានមនុស្ស យុវជនកម្ពុជាដែលមានការទទួលខុសត្រូវ មានឧត្ដមគតិ មនសិការ ស្នេហាជាតិ ដើម្បីជាសសរទ្រូង នៃឆ្អឹងខ្នងដ៏រឹងមាំសម្រាប់ប្រទេសជាតិ នាពេលបច្ចុប្បន្ន និងអនាគត។

បន្ថែមពីនេះ ស ស យ ក បន្តជំរុញយុវជន ឲ្យចូលរួមកម្មវិធីស្ម័គ្រចិត្ត កម្មវិធីសិក្សា កម្មវិធីមនុស្សធម៌ ឬការងារស្ម័គ្រចិត្តនៅតាមសហគមន៍ ដើម្បីយុវជនបានសាកល្បងចំណេះដឹង ទេពកោសល្យ ការច្នៃប្រឌិត និងទទួលបានបទពិសោធន៍ដើម្បីជាឧត្ដមប្រយោជន៍របស់ជាតិ។

ប្រធានសហភាពសហព័ន្ធយុវជនកម្ពុជា (ស.ស.យ.ក) បានអះអាងថា សមិទ្ធផលជាច្រើនដែលសហភាពសហព័ន្ធយុវជនកម្ពុជា សម្រេចបានក្នុងរយៈពេល៦ឆ្នាំកន្លងមក ប៉ុន្តែក្នុងចំណោមសមិទ្ធផលទាំងអស់នោះ លោកកត់សម្គាល់ថា សមិទ្ធផលដែលធំជាងគេបំផុតនោះ គឺការទទួលស្គាល់ និងការទទួលស្វាគមន៍ ពីសំណាក់ប្រជាពលរដ្ឋគ្រប់មជ្ឈដ្ឋានទាំងអស់។ ក្នុងរយៈពេល៦ឆ្នាំមកនេះ ប្រជាពលរដ្ឋបានឃើញដោយខ្លួនឯងនូវសកម្មភាព ក្នុងសង្គមរបស់ ស.ស.យ.ក ដោយមិនចាំបាច់មានការណែនាំអ្វីនោះទេ ព្រោះសកម្មភាពទាំងអស់នោះ ត្រូវលះបង់ ដើម្បីតែពលរដ្ឋទាំងអស់។

ជាមួយគ្នានេះ លោក ហ៊ុន ម៉ានី ក៏បានគូសបញ្ជាក់អំពីសមិទ្ធផលមួយចំនួនផងដែរ ដែលទទួលស្គាល់ជាអន្តរជាតិ ពោលគឺការបំបែកកំណត់ត្រាពិភពលោក រួមមាន នំអន្សមយក្ស, រាំម៉ាកឌីហ្សូន, ក្រមាវែងជាងគេលើពិភពលោក និងទូក «ង» វែងជាងគេលើពិភពលោក។

ដោយឡែកសម្រាប់ថ្នាក់ជាតិ រួមមាន មួកយក្ស, ពងមាន់យក្ស, អង្រុតយក្ស, ចាប៉ីដងវែងធំជាងគេ និងសមិទ្ធផលជាច្រើនផ្សេងៗទៀត។ ហើយចំពោះយន្តការដែល ស.ស.យ.ក ត្រូវអនុវត្តបន្ដទៀតនៅពេលខាងមុខនោះ គឺការបន្ដសកម្មភាពសង្គម ដែលបានអនុវត្តនាពេលកន្លងមក ព្រោះថា ស.ស.យ.ក ជាវេទិកាមួយដែលបង្កើតឲ្យយុវជន យុវនារី ដែលមានឆន្ទៈក្នុងការធ្វើការងារសង្គម មិនថាកីឡា វប្បធម៌ មនុស្សធម៌ ផ្ដល់ឈាម ឬការពិនិត្យសុខភាព ទៅដល់ប្រជាពលរដ្ឋដោយឥតគិតថ្លៃ៕