ភ្នំពេញ ៖ សន្តិសុខឯកជនដែលបម្រើការងារនៅក្នុងមន្ទីរពេទ្យកាល់ម៉ែតម្នាក់ ត្រូវបានគេប្រទះឃើញចង.កសម្លាប់ខ្លួន នៅក្នុងម៉ូតូកង់បីឥណ្ឌា ដែលចតនៅជាប់របងខាងក្រៅក្បែរអគារបេះដូងស្ថិតខាងត្បូងស្ថានទូតបារាំង បង្កជាការភ្ញាក់ផ្អើលកាលពីព្រឹកថ្ងៃទី២៨ ខែកុម្ភៈ ឆ្នាំ២០១៩ក្នុងសង្កាត់ស្រះចកខណ្ឌដូនពេញ។
សមត្ថកិច្ចបានមូលដ្ឋានបានឲ្យដឹងថា ជនរងគ្រោះដែលស្លាប់ជាប់ចំណងត្រង់កលានអណ្តាតនៅក្នុងម៉ូតូកង់បីឥណ្ឌានោះឈ្មោះឃឹម សុខា ហៅ ហ៊ុល ភេទប្រុស អាយុប្រហែល៤០ឆ្នាំ មានមុខរបរជាសន្តិសុខឯកជន បម្រើការងារនៅមន្ទីរពេទ្យកាល់ម៉ែតមានរហ័សនាម(Z ៦៤)ស្នាក់នៅផ្ទះជួលក្បែរខាងក្រោយអគារប៉ាស្ទ័រ ក្នុងសង្កាត់ស្រះចក ខណ្ឌដូនពេញនិងមានស្រុកកំណើតនៅខេត្តព្រៃវែង។
ប្រភពព័ត៌មានពីកន្លែងកើតហេតុបានឲ្យដឹងថា រយៈពេលប៉ុន្មានថ្ងៃនេះជនរងគ្រោះដែលជាសន្តិសុខបម្រើការងារនៅមន្ទីរពេទ្យកាល់ម៉ែតរូបនោះ ត្រូវបានបញ្ឈប់ពីការងារដោយមានកំហុសផ្ទាល់ខ្លួនពីបញ្ហាអ្វីមួយដែលជនរងគ្រោះប្រព្រឹត្តិខុសតិចតួចដោយខ្លួនឯង ហើយត្រូវខាងថ្នាក់លើបានសម្រេចបញ្ឈប់ពីការងារនៅខាងក្នុងមន្ទីរពេទ្យដោយឲ្យមកយាមមើលការខុសត្រូវខាងក្រៅរបងមន្ទីរពេទ្យវិញ។
ប្រភពព័ត៌មានបានបន្តទៀតថា ទន្ទឹមនឹងថ្នាក់លើសម្រេចផ្អាកការងាររបស់សន្តិសុខរូបនោះគាត់ក៏បានត្អូញត្អែរថា ចាប់ពីថ្ងៃនេះទៅគាត់នឹងបាត់បង់នូវអ្វីៗទាំងអស់ជាពិសេសចំណូលដែលរកបានបន្តិចបន្តួចប្រចាំថ្ងៃ ដែលដោះបំណុលគេនោះ គឺត្រូវចប់តែម្តង។ ចឹងជនរងគ្រោះក៏ត្អូញទៀតថា គាត់ទៅមុខទៀតមានតែស្លាប់ទេព្រោះអ្វីៗត្រូវបានចប់អស់ហើយនោះ។
ប្រភពព័ត៌មានបានបន្តទៀតថា បន្ទាប់ពីត្រូវផ្អាកការងាររបស់សន្តិសុខរូបនោះ ហើយគាត់(ជនរងគ្រោះ)បានជួលម៉ូតូកង់បីឥណ្ឌាគេរត់ដោយឆ្លៀតពីពេលទំនេរដែលយាមនៅខាងក្រៅរបងមន្ទីរពេទ្យដែលក្នុង១យប់បានតម្លៃ១ម៉ឺនរៀលប៉ុណ្ណោះ។ ចំណែកម៉ូតូកង់បីដែលជនរងគ្រោះជួលគេយកប្លង់ផ្ទះទៅដាក់នោះគឺក្នុង១យប់ពីរម៉ឺនរៀល។
ប្រភពព័ត៌មានបានបន្តទៀតថា នៅយប់ថ្ងៃទី២៧ ខែកុម្ភៈ ជនរងគ្រោះបានស្លៀកពាក់សម្លៀកបំពាក់ជាសន្តិសុខរបស់មន្ទីរពេទ្យកាល់ម៉ែតដដែល ស្រាប់តែនៅព្រលឹមស្រាងៗខណៈដែលសន្តិសុខផ្សេងទៀតក្រោកពីដេកដើម្បីរៀបចំបោសសំអាតសំរាមឃើញម៉ូតូកង់បីនោះមិនចេញទៅណា ហើយម្យ៉ាងវិញទៀតម៉ូតូកង់បីឥណ្ឌានោះមានបិទវាំងននជិតទាំងសងខាងផងក៏ដើរទៅមើលស្រាប់តែភ្ញាក់ព្រើតពេលដែលឃើញជនរងគ្រោះដែលជាសន្តិសុខ ជាមេផងបានស្លាប់បាត់ដោយមានខ្សែចំណងចងភ្ជាប់កជាមួយនឹងដំបូលម៉ូតូកង់បីឥណ្ឌានោះ ដៃទាំងពីរគងលើពូកកង់បីហាក់បីដូចជាមិនទំនងគួរឲ្យស្លាប់ទាល់តែសោះ។
ប្រភពព័ត៌មានបានបន្តទៀតថា បន្ទាប់ពីមានហេតុការណ៍ដូច្នេះគេឃើញប្រពន្ធនិងកូនៗរបស់ជនរងគ្រោះមានមកដល់នាំគ្នាស្រែកទ្រហោយំសោកបោកខ្លួនមិនគួរលោកឪពុកនឹងប្តីជាស្រឡាញ់របស់ខ្លួនមិនគួរណាគិតខ្លីបែបនេះឡើយ ហើយប្រពន្ធរបស់ជនរងគ្រោះយំៗទាល់តែសន្លប់ហើយក៏ត្រូវបានគេនាំគ្រៀកបញ្ជូនទៅពេទ្យដើម្បីសង្គ្រោះផងដែរ។
ក្រោយពីមានហេតុការណ៍ដូច្នេះហើយ កម្លាំងមូលដ្ឋានបានចុះមកគ្រប់គ្រងកន្លែងកើតហេតុហើយរាយការណ៍ទៅផ្នែកជំនាញកោសល្យវិច័យចុះមកពិនិត្យនឹងបញ្ជូនទៅតម្កល់នៅសាលនៃមន្ទីរពេទ្យលាងឈាមជាស៊ី ដើម្បីប្រគល់ជូនក្រុមគ្រួសារសម្រេចធ្វើបុណ្យតាមប្រពៃណី។
ពាក់ព័ន្ធនឹងសម្លាប់ខ្លួនរបស់សន្តិសុខរូបនោះ នៅរសៀលថ្ងៃដដែល លោកម៉ៅ រាសីប្រធានរដ្ឋបាលមន្ទីរពេទ្យបានឲ្យដឹងថា សន្តិសុខដែលបានសម្លាប់ខ្លួននោះមិនមែនជាបុគ្គលិក ឬ សន្តិសុខរបស់មន្ទីរពេទ្យផ្តាច់មុខនោះទេ គឺសន្តិសុខរូបនោះគឺគ្រប់គ្រងដោយលោកថន ពិសិដ្ឋ ជាកូនរបស់លោកចេង វុត្ថា ដែលគាត់មានកុងត្រាជាមួយមន្ទីរពេទ្យក្នុងការរៀបចំសន្តិសុខសណ្តាប់ធ្នាប់និងគ្រប់ចំណតយានយន្តនៅក្នុងមន្ទីរពេទ្យតែប៉ុណ្ណោះ លោកថន ពិសិដ្ឋ ត្រូវគ្រប់គ្រងឲ្យបានល្អប្រសើរតែប៉ុណ្ណោះ។ ចំពោះសន្តិសុខរបស់គាត់(លោក ថន ពិសិដ្ឋ )គាត់មានកូនចៅគាត់ប៉ុន្មាននាក់គឺជាការគ្រប់គ្រងដោយខ្លួនគាត់ចឹងពាក្យដែលថា ជាសន្តិសុខរបស់មន្ទីរពេទ្យកាល់ម៉ែតគឺលោកម៉ៅ រាសី ជាប្រធានរដ្ឋបាលនៃមន្ទីរពេទ្យកាល់ម៉ែតសូមបដិសេធ និងសូមសាធារណជនកុំច្រឡំតទៅទៀត។
លោក ម៉ៅ រាសី បានបញ្ជាក់ទៀតថា ចំពោះបញ្ហាដែលចោទថា ខាងមន្ទីរពេទ្យជាអ្នកបញ្ឈប់ការងាររបស់សន្តិសុខរូបនោះ គឺខាងថ្នាក់លើរបស់មន្ទីរពេទ្យពុំបានដឹងឡើយ។
ជាមួយនឹងបញ្ហានោះដែរ លោក ថន ពិសិដ្ឋ ដែលជាប្រធានសន្តិសុខ នៅក្នុងមន្ទីរពេទ្យកាល់ម៉ែតបានឲ្យដឹងនៅរសៀលថ្ងៃដដែលនេះដែរថា លោក ឃីម សុខា (ជនរងគ្រោះ)ពិតជាកូនចៅរបស់គាត់ពិតមែន គឺមិនមែនជាសន្តិសុខផ្ទាល់របស់មន្ទីរពេទ្យកាល់ម៉ែតនោះទេ។
លោកថន ពិសិដ្ឋ បន្តទៀតថា ពាក្យចចាមអារ៉ាមថា គាត់ត្រូវបានខាងមន្ទីរពេទ្យបញ្ឈប់ពីការងារក្នុងរយៈពេល៣ទៅ៤ថ្ងៃនេះ គឺមិនពិតនោះទេគឺគាត់(ជនរងគ្រោះ)មិនត្រឹមតែជាសន្តិសុខធម្មតាដូចអ្នកដទៃនោះទេ គឺគាត់មានតួនាទីជាជំនួយការការរបស់ខ្ញុំ(ថន ពិសិដ្ឋ)គឺមានតួនាទីជាមេបន្ទាប់របស់សន្តិសុខដទៃទៀតផងដែរ។ តែអ្វីដែលជាពាក្យចចាមអារ៉ាមថា បានបញ្ឈប់ពីការងារនោះគឺគាត់(ថន ពិសិដ្ឋ )សូមជម្រាបថា គាត់ជនរងគ្រោះមិនត្រឹមជាជំនួយការរបស់គាត់ប៉ុណ្ណោះទេគឺគាត់ជាបងប្អូនរបស់ខ្ញុំទៀតផង។
លោកថន ពិសិដ្ឋ ប្រធានសន្តិសុខឯកជននៅមន្ទីរពេទ្យកាល់ម៉ែតបានបន្តទៀតថា ជាក់ស្តែងនៅយប់មិញនេះគាត់(ថន ពិសិដ្ឋ)ប្រាប់ទៅជនរងគ្រោះត្រូវពង្រឹងការងារទាំងខាងក្នុងនឹងខាងក្រៅធ្វើយ៉ាងគ្រប់គ្រងឲ្យល្អលើសន្តិសុខផ្សេងទៀតជៀសវាងធ្វើឲ្យបាត់សណ្តាប់នឹងរបៀបរៀបរយនៅក្នុងមន្ទីរពេទ្យនឹងនៅខាងក្រៅរបងរបស់មន្ទីរពេទ្យ។ ព្រោះអីយប់មិញនៅថ្ងៃទី២៧ ជាថ្ងៃដែលគាត់(ជនរងគ្រោះ)ប្រចាំការនៅខាងក្រៅរបងមន្ទីរពេទ្យក៏ស្រាប់តែព្រលឹមឡើងគាត់បានទទួលព័ត៌មានថា ជនរងគ្រោះគាត់ចង.កសម្លាប់ខ្លួនដូច្នេះតែម្តង ធ្វើឲ្យគាត់នឹកស្មានមិនដល់ឡើយ។
លោក ថន ពិសិដ្ឋ បញ្ជាក់ថា សព្វថ្ងៃនេះគាត់សន្តិសុខឯកជនរបស់គាត់ដែលបម្រើការងារនៅខាងក្នុងនិងនៅខាងក្រៅមន្ទីរពេទ្យគឺមានចំនួនជាង៤០នាក់ឯណោះដែលគ្រប់គ្រងប្រាក់ខែដោយខ្លួនគាត់ផ្ទាល់មិនមែនជាសន្តិសុខរបស់មន្ទីរពេទ្យនោះទេ។
លោកបញ្ជាក់ទៀតថា លោកកំពុងតែចាត់ចែងធ្វើបុណ្យតាមប្រពៃណីជាមួយក្រុមគ្រួសាររបស់ជនរងគ្រោះនៅវត្តទួលសង្កែ៕
Source: Kampuchea Thmey Daily
0 Comments