ភ្នំពេញ ៖ លោកសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាលបានជំរុញឲ្យគ្រូពេទ្យកម្ពុជាបង្កើនសមត្ថភាពរបស់ខ្លួនបន្ថែមទៀត ដើម្បីដើរឲ្យទាន់បច្ចេកវិទ្យាទំនើបវិស័យសុខាភិបាលនាពេលបច្ចុប្បន្ន។
លោករដ្ឋមន្ដ្រីក៏បានណែនាំឲ្យក្រុមគ្រូពេទ្យកម្ពុជាទាំងអស់ ត្រូវខិតខំសិក្សារៀនសូត្រឲ្យកាន់តែមានសមត្ថភាពនិងជំនាញខ្ពស់ថែមទៀតពិសេសផ្នែកជំងឺត្រចៀក ច្រមុះនិងបំពង់ខណៈបច្ចុប្បន្នបច្ចេកវិទ្យាផ្នែកវិស័យសុខាភិបាលកាន់តែរីកចម្រើនឥតឈប់ឈរ។
ជាមួយគ្នានេះដែរ លោក រដ្ឋមន្ត្រីបានស្នើដល់ដៃគូសហប្រតិបត្ដិការទាំងអស់បន្ដជួយបណ្ដុះបណ្ដាលដល់គ្រូពេទ្យកម្ពុជាពិសេសលើជំនាញត្រចៀក ច្រមុះ បំពង់ក ក្បាល និងកដើម្បីលើកកម្ពស់សមត្ថភាពគ្រូពេទ្យឲ្យកាន់តែប្រសើរឡើងថែមទៀតស្របទៅតាមតំបន់និងសកលលោក។
ថ្លែងនៅក្នុងពិធីបើកវេទិកាវេជ្ជសាស្ត្រ សមាគមគ្រូពេទ្យត្រចៀក ច្រមុះ បំពង់ក សល្យសាស្ត្រ ក្បាល និងកម្ពុជានៅសណ្ឋាគារ ភ្នំពេញកាលពីពេលថ្មីៗនេះលោករដ្ឋមន្ត្រីបានមានប្រសាសន៍ថាកាលណាគ្រូពេទ្យមានសមត្ថភាពនិងជំនាញខ្ពស់នោះនឹងជួយលើកកម្ពស់គុណភាព និងសុវត្ថិភាពវិស័យសុខាភិបាលហើយកាត់បន្ថយការចេញទៅស្វែងរកការព្យាបាលជំងឺរបស់ប្រជាពលរដ្ឋនៅក្រៅប្រទេសផងដែរ។
លោករដ្ឋមន្ដ្រី សង្ឃឹមយ៉ាងមុតមាំថា ដៃគូពាក់ព័ន្ធទាំងអស់នេះ នឹងបន្ដជួយគាំទ្របន្ថែមទៀត ទាំងការបណ្ដុះបណ្ដាល បច្ចេកទេស និងផ្សេងទៀត ដើម្បីជួយលើកកម្ពស់វិស័យសុខាភិបាល ក្នុងបម្រើនូវសេវាសុខភាព ជូនដល់ប្រជាពលរដ្ឋ ឲ្យបានកាន់តែប្រសើរឡើង។
លោកសាស្ត្រាចារ្យ ម៉ម ប៊ុនហេង ក៏បានថ្លែងអំណរគុណដល់ដៃគូពាក់ព័ន្ធទាំងអស់ ដែលបានខិតខំប្រឹងប្រែងបន្ដជួយគាំទ្រកន្លងមកនេះ ដែលបានចូលរួមចំណែកយ៉ាងច្រើន ជួយដល់សុខុមាលភាពរបស់ប្រជាជនកម្ពុជា។
លោកសាស្ត្រាចារ្យជំនួយ ប៉ូ រដ្ឋា ប្រធានសមាគមគ្រូពេទ្យត្រចៀក ច្រមុះ បំពង់ក សល្យសាស្ត្រ ក្បាល និងក កម្ពុជាបានមានប្រសាសន៍ថាសមាគមតែងតែសហការជាមួយជាមួយក្រុមគ្រូពេទ្យនៅតាមបណ្តាប្រទេសមួយចំនួនដូចជាបារាំថ ម៉ាឡេស៊ី អង់គ្លេស អាមេរិក អូស្ត្រាលី នេប៉ាល់ សាំងហ្គាពួរដើម្បីជួយវះកាត់ជូនដល់ប្រជាពលរដ្ឋកម្ពុជានិងជួយបង្ហាត់បង្រៀនជំនាញឬផ្លាស់ប្តូរបទពិសោធន៍ថ្មីៗបន្ថែមទៀតដល់ក្រុមគ្រូពេទ្យថ្មីៗនិងនិស្សិតដើម្បីឲ្យពួកគេមានសមត្ថភាពកាន់តែខ្ពស់មានសីលធម៌វិជ្ជាជីវៈថ្លៃថ្នូរស្តង់ដារតែមួយ ប្រើភាសាតែមួយដើម្បីព្យាបាលដល់អ្នកជំងឺប្រកបដោយប្រសិទ្ធភាព។
ជាងនេះទៅទៀត ក្រុមគ្រូពេទ្យកម្ពុជាបានសហការជាមួយក្រុមគ្រូពេទ្យមកពីប្រទេសកូរ៉េបានធ្វើការវះកាត់ជំងឺគថ្លង់ជូនដល់ប្រជាពលរដ្ឋពិសេសកុមារ នៅមន្ទីរពេទ្យព្រះអង្គឌួងដែលធ្វើឲ្យពួកគេអាចមានជីវិតថ្មីអាចស្តាប់ ឬ និយាយបានដូចមនុស្សទូទៅព្រមទាំងអាចចូលរួមនៅក្នុងសកម្មភាពនានាក្នុងសង្គមបានពេញលេញ៕
Source: Kampuchea Thmey Daily
0 Comments