អ្នកជំនាញសេដ្ឋកិច្ច ដាក់ការរំពឹងថា ប្រទេសកម្ពុជា នឹងក្លាយជាហង្សនៅអាស៊ី !

ភ្នំពេញ ៖ ស្របពេលជាមួយគ្នា ដែល បណ្ដាប្រទេសមួយចំនួនដូចជា ៖ ចិន, ហុងកុង និង សិង្ហបុរី ត្រូវបានគេប្រដូចថា ជាស្ដេចនាគ ជាស្ដេចខ្លាខាងផ្នែកសេដ្ឋកិច្ច នៅក្នុងតំបន់អាស៊ីនោះ លោក ហង្ស ព្រីន្សយ៉ា ដែលជាអ្នកសេដ្ឋកិច្ច និងជាអ្នកជំនួញដីធ្លីធំមួយ ក៏បានដាក់ការរំពឹងថា ប្រទេសកម្ពុជា នឹងក្លាយជាហង្ស ខាងផ្នែកសេដ្ឋកិច្ច នៅក្នុងតំបន់អាស៊ី។

ការថ្លែងរបស់ លោក ហង្ស ព្រីន្សយ៉ា ខាងលើនេះ បានធ្វើឡើងនៅក្នុងពិធីចុះអនុស្សរណៈ(MOU )ជាមួយក្រុមហ៊ុនយក្សធំមួយរបស់ប្រទេសចិន និងប្រទេសថៃ នៅសណ្ឋាគារហ៊ីម៉ាវ៉ារី នាថ្ងៃទី២៨ ខែ មីនា ឆ្នាំ២០១៩។

បច្ចុប្បន្ន លោក ហង្ស ព្រីន្សយ៉ា ដែលជាម្ចាស់ក្រុមហ៊ុនហង្សម្ចាស់ដី ក៏បានបោះទុនវិនិយោគលើវិស័យកសិកម្មរាប់ពាន់ហិកតា លើខេត្តចំនួន៤រួមមាន ៖ កំពត ,ពោធិ៍សាត់, មណ្ឌលគីរី និង សៀមរាប។

លោក ហង្ស ព្រីន្សយ៉ា បានលើកឡើងថា មិនយូរនោះទេ ប្រទេសកម្ពុជា នឹងក្លាយជាហង្សដ៏ស្រស់ស្អាតមួយ ដែលបណ្ដាប្រទេសណាមួយ ជាពិសេស គឺមហាយក្សចិន សុទ្ធតែចង់ធ្វើជាដៃគូវិនិយោគ ដោយសារតែកម្ពុជា មានសក្ដានុពលធំសម្បើម ដែលក្រុមអ្នកវិនិយោគទាំងនោះ ត្រូវការបោះទុន។

ម្យ៉ាងទៀត ពិធីចុះអនុស្សរណៈរវាងក្រុមហ៊ុនលោក ដែលបានធ្វើឡើងជាមួយក្រុមហ៊ុនធំ២ មកពីចិន និងថៃនោះ ក្រុមហ៊ុនចិន Harvest Chain Company Limited ដែលមានមូលដ្ឋាននៅក្នុងប្រទេសចិន តំណាងដោយ លោក ស៊ូ ចុងប៉ី នាយកប្រតិបត្តិ បានប្រកាសជួយជំរុញលើវិស័យកសិកម្មរបស់ក្រុមហ៊ុនហង្សម្ចាស់ដី ដោយយល់ព្រមទទួលទិញកសិផលដែលក្រុមហ៊ុន និងពលរដ្ឋដាំដុះបាន ពិសេសគឺផ្លែធូរេន យកទៅកាន់ទីផ្សារចិន ដើម្បីឲ្យកសិករទទួលបានផលចំណេញខ្ពស់។

លោកនិយាយទៀតថា ក្រុមហ៊ុនចិន បានធានាផ្ដល់ពូជ និងបច្ចេកទេសលើផ្ទៃដីរហូតដល់២ម៉ឺនហិកតា ដើម្បីធ្វើឲ្យវិស័យកសិកម្មនៅក្នុងប្រទេសកម្ពុជា មានការរីកចម្រើន ឲ្យដូចគ្នានឹងប្រទេសជិតខាង។ អនុស្សរណៈនៅក្នុងថ្ងៃនោះ ក្រុមហ៊ុនធំមួយរបស់ថៃ គឺក្រុមហ៊ុន រាច្ឆាកនណាកន សាប់ផ្លាយឯ.ក(Rachchanakorn Supply Co.,LTD) តំណាងដោយលោក រ៉ាឆាភុល ខូតកែវ ជានាយកប្រតិបត្តិ ក៏បានប្រកាសផ្គត់ផ្គង់តម្រូវការផ្សេងៗជួយជំរុញដល់វិស័យកសិកម្មនៅកម្ពុជា ជួយគ្រប់គ្រងអចលនទ្រព្យរវាងថៃ និងកម្ពុជា ជួយផ្នែកបច្ចេកទេស និងសុខុមាលភាពលើផលដំណាំ និងផ្ដល់ជី ក៏ដូចជាសម្ភារៈផ្នែកកសិកម្មគ្រប់ទម្រង់ ដើម្បីឲ្យការវិនិយោគលើការបង្កើតចម្ការរបស់ក្រុមហ៊ុនម្ចាស់ដី ឲ្យបានដំណើរការទៅមុខផងដែរ។

លោក ហង្ស ព្រីន្សយ៉ា បញ្ជាក់ថា ជាមួយនឹងការជ្រោមជ្រែងពីមហាយក្សចិន និងក្រុមហ៊ុនជាដៃគូនៅក្នុងប្រទេសថៃ លោកកាន់តែមានជំនឿចិត្តថាកម្ពុជា នឹងក្លាយជាហង្សផ្នែកសេដ្ឋកិច្ចនៅក្នុងតំបន់អាស៊ីដោយមិនលំបាកនោះទេ ស្របគ្នាដែលអ្នកវិនិយោគធំៗមកពីបណ្ដាប្រទេសផ្សេងៗ ក៏ចុះមកបោះទុនលើវិស័យសាងសង់អគារខ្ពស់ៗ សណ្ឋាគារ បើករមណីយដ្ឋាន តំបន់កម្សាន្ត កំពង់ផែ ព្រលានយន្តហោះ ខណៈដែលគម្រោងដីធ្លី ក៏កាន់តែមានសន្ទុះ។

បន្ថែមពីលើនេះ លោក ហង្ស ព្រីន្សយ៉ា ក៏បានទទូចឲ្យបងប្អូនដែលចង់វិនិយោគទិញដីចម្ការពីក្រុមហ៊ុនហង្សម្ចាស់ដីរបស់លោកកុំមានភាពស្ទាក់ស្ទើរ ដោយសារតែក្នុងពេលនេះ ក្រុមហ៊ុនចិនដ៏ធំ និងក្រុមហ៊ុនល្បីនៅថៃ បានយល់ព្រមទទួលទិញផលដំណាំនៅពេលបានផលរួចរាល់អស់ហើយ ក្នុងពេលដែលក្រុមការងារបច្ចេកទេសក្នុងការមើលថែដំណាំរបស់បងប្អូនក្រោយពេលទិញចម្ការពីគម្រោង "ឋានព្រះឥន្ទ" របស់លោកក៏មិនភ័យរឿងខ្វះអ្នកជំនាញថែទាំខាងផ្នែកបច្ចេកទេសរយៈពេល៤ឆ្នាំ ទៅ៦ឆ្នាំ តាមកិច្ចកុងត្រា៕